Arvadını küçədə xəncərlə öldürdü: uşağının qarşısında

"Ölkə.Az"-ın xəbərinə görə, ağır cinayət hadisəsi paytaxtın Binəqədi rayonu, Beynəlxalq Avtovağzalının yaxınlığında baş verib.

Biləcəri qəsəbə sakini 33 yaşlı Nicat Əmmədov Binəqədi rayonu ərazisində ailə-məişət münaqişəsi zəminində həyat yoldaşı Leyla Məmmədovanı qətlə yetirib. 40-cı polis bölməsi əməkdaşlarının keçirdikləri əməliyyat-axtarış tədbirləri nəticəsində qəsdən adam öldürməkdə şübhəli bilinən Nicat Məmmədov saxlanılıb və rayon prokurorluğuna təhvil verilib.

Meytin müayinəsi zamanı məlum olub ki, Leyla Məmmədovanın sinə və boğaz nahiyələrində 27 ədəd deşilmiş-kəsilmiş yara aşkar edilib.

İstintaqla müəyyən olunub ki, oktyabrın 6-da Nicat Məmmədov özünə məxsus avtomobillə atası, azyaşlı oğlu və həyat yoldaşını Yasamal rayonunda yaşayan qayınanasıgilə apararkən yolda arvadı ilə aralarında mübahisə yaranıb. Bu məqsədlə əsəbiləşən Nicat həyat yoldaşını öldürmək qərarına gəlib.

Bakı Beynəlxalq Avtovağzalının qarşısında idarə etdiyi avtomobili saxlayıb və düşərək maşının yük yerindən kustar üsulla hazırlanmış xəncəri götürüb qapını açaraq qadının sinəsinə iki zərbə endirib. Bu zaman avtomaşında olan Nicatın atası onun hərəkətlərinin qarşısını almağa çalışıb və onu yerə yıxıb. Bundan istifadə edən Leyla Məmmədova maşından düşərək qaçıb.
Atasının əlindən çıxan Nicat Məmmədov yerdəki xəncəri götürüb yoldaşının arxasınca qaçaraq ona çatıb. Əlindəki xəncərlə arvadının bədəninin müxtəlif nahiyyələrinə ardıcıl xəsarətlər yetirib.

Yerə yıxılan qadının yalvarışlarına məhəl qoymayaraq Leyla Məmmədovanı xüsusi amansızlıqla qəsdən həyatdan məhrum edib.

İş üzrə dindirilən Nicat Məmmədov ifadəsində bildirib ki, anasının xalası nəvəsi Leyla Məmmədova ilə 2013-cü ildə ailə həyatı qurub. Nigahdan 3 övladları dünyaya gəlib. Evləndikdən sonra valideynləri ilə birğə Biləcəri qəsəbəsində yaşayıblar. Özəl şirkətlərin birində eskpeditor işləyib. 2019-cu ilin iyun ayından Leyla ilə münasibətləri pisləşməyə başlayıb. Buna yoldaşının onun valideyinləri ilə birlikdə yaşamaq istəməməsi səbəb olub. Bundan başqa Leyla ondan boşanıb atası evinə gedəcəyini və uşaqlarının özü saxlayacağını bildirib.

Hadisə baş verən günü Leyla yenidən ona atasıgilə getmək istədiyini deyib. Nicat Leylaya fikrindən daşınmasını və belə hərəkətlər etməməsini bildirsə də, xeyri olmayıb. Arvadı əşyalarını yığmağa başladıqda artıq atasının evinə getmək fikrinin qəti olduğunu anlayıb dəhlizdən iri xəncəri götürüb avtomobilinin yük yerinə qoyub. Leyla ilə maşına əyləşib getmək istədik də atasıda onlarla gedəcəyini deyib. Nicat etiraz etsə də, atası israrla gedəcəyini bildirib qabaq oturacağa əyləşib. Leyla arxa sağ tərəfdə qucağında isə oğlu oturub.

Yola çıxdıqdan bir qədər sonra arvadı yenidən ona "adam olmadığını" deyib. Leyla yol boyu deyindiyi üçün Nicat avtovağzalın yanında maşını saxlayıb yük yerinə qoyduğu xəncəri götürüb:

“Qapını açdım 2 dənə zərbə sinəsindən vurdum. Atam maşından düşüb yapışdı boğazımdan qoymurdu məni vurmağa. Yıxıldım bıçaq düşdü əlimdən. Həmin vaxt Leyla da maşından düşüb qaçdı. Qaçıb çatdım başladım yenə vurmağa yıxıldı yerə. Yadımda deyil neçə zərbə vurmuşam. Sonra polislər gördü məni əlimdəki xəncəri atdım yerə təslim oldum”.

Məhkəmə prosesi zamanı Nicat Məmmədov ittiham üzrə özünü təqsirli bilib.

Zərərçəkmiş şəxsin hüquqi varisi təqsirləndirilən şəxsə ən ağır cəza verilməsini xahiş edib.

Sonda məhkəmənin hökmü ilə CM-nin 120.2.4 (xüsusi amansızlıqla qəsdən adam öldürmə), 221.3 (xuliqanlıq silah və ya silah qismində istifadə olunan əşyalarla törədildikdə) və 228.4-cü (qanunsuz olaraq soyuq silahjı əldə etmə) maddələri ilə təqsirli bilinərək 19 il müddətinə azadlıqdan məhrum olunub.

Ölkə.Az