“Erməniləri sevən bakılı jurnalist”: “Əsas məqsədim Azərbaycanı layiqincə təmsil etməkdi”

“Hər zaman Prezidentimizin arxasındayam”

Bir neçə gün öncə yerli və erməni mətbuatında Vyanada “Eurovision 2015”lə bağlı keçirilən mətbuat konfransında Azərbaycanı təmsil edən gəncin Ermənistan təmsilçisi “Genealogy” qrupunu erməni dilində salamlayaraq, sual verməsi ilə bağlı xəbərlər yayılmışdı.

Bildirilir ki, özünü tam təqdim etməyən, yalnız “Azərbaycandan Rəşad” kimi təqdim edən jurnalist ermənicə “barev, Hayastan”, yəni “salam, Ermənistan” deyib. Jurnalist daha sonra qrupun üzvü İnqa Arşakyana üz tutub və ikinci dəfə “Eurovision”a qatılmaqda özünü necə hiss etdiyini soruşub.

Ölkə.Az olaraq həmin gənclə əlaqə saxlayaraq, məsələ ilə bağlı suallarımızı ünvanladıq.

Əvvəlcə özünü təqdim et.

Rəşad Mustafazadə, 20 yaşım var, “INFE Azerbaijan” fan klubunun vitse-prezidenti. Azərbaycanda bir çox layihələrdə fəal iştirak etmişəm. Eyni zamanda “Azərbaycan-Albaniya” birliyinin yaradıcısıyam. Xarici ölkələrdə bir sıra layihələrdə Azərbaycanı təmsil etmişəm.

“Eurovision”a bağlılığın nə zaman başlayıb?

2003-cü ildən “Eurovision”u izləyir, 2009-dan fanatlıq edir, 2013-cü ildən isə fan kluba rəhbərlik edirəm.

Bu günə qədər hansı ölkələrdə olmusan və səfərlərinin məqsədi əsasən nə olub?

Almaniya, Albaniya, Türkiyə və digər ölkələrdə “Eurovision” və digər beynəlxalq dərəcəli layihələrlə bağlı səfərlərim olub. Hər birində əsas məqsədim Azərbaycanı layiqincə təmsil etməkdi. Hal-hazərda isə Avstriyada eyni missiyanı davam etdirirəm.

Avstriyaya səfərin barədə danış.

Mən bir müddət “Eurovision” yarışmasına akreditasiyamın hazır olmasını gözləyirdim. Hazır olandan sonra mətbuat olaraq bura qatıldım. Qeyd edim ki, akreditasiyam beynəlxalq dərəcəlidir və üzərində hansı ölkəyə aid olduğum yazılmır.

Sən jurnalistsənmi?

Xeyr, mən jurnalist deyiləm. Sadəcə olaraq, aldığımız akreditasiya mətbuat üçündür. Mən “Eurovision” fanatıyam və jurnalistika ilə heç bir bağlılığım yoxdur. Ara-sıra həvəskar videoreportajlar hazırlayaraq, sosial şəbəkələrdə yerləşdirirəm.

Vyanaya gedərkən hədəf kimi nəyi seçmişdin?

Əlbəttə, bir gənc kimi öz ölkəmizi layiqincə təmsil etmək və burada olan digər ölkələrin nümayəndələrinə azərbaycanlıların nə qədər sülhsevər olduğunu və Azərbaycanın yüksək inkişafa çatdığını nümayiş etdirmək.

Son bir neçə gündə qınaq obyektinə çevrildin. Daha doğrusu, erməni nümayəndələrini onların dilində salamlamağın bəzi dairələrdə qıcıq yaratdı. Səncə, bunun səbəbi nədir?

Azərbaycan xalqı həqiqətən də çox sülhsevər xalqdır və cənab Prezidentimiz çıxışarında da düşmənimizə sülhlə qalib gələcəyimizi bildirir. Erməni lobbisi azərbaycanlıları barbar xalq kimi tanıtmağa çalışır. Onlar bizim sülhsevər olmadığımızı isbat etmək istəyirlər, lakin mən bu çıxışım, erməni nümayəndələrini onların dillərində salamlamağımla göstərməyə çalışdım ki, biz hər zaman sülhün tərəfindəyik. Onlara ünvanladığım sual isə çox primitiv bir sual idi. Mən onlardan 2009-cu illə 2015 arasında hansə fərqlərin hiss edildiyini soruşdum. Eyni sualı mən bir çox iştirakçılara, o cümlədən təmsilçimiz Elnura da vermiş və ondan azərbaycan dilində mahnı oxumasını xahiş etmişdim.

Başa düşə bilmirəm ki, niyə bizim bəzi KİV-lər yaxşıları qabartmır, əksinə, qarışqadan fil düzəltməyə çalışır. Əgər mən burada yanlış hərəkət etsəydim, Azərbaycan nümayəndə heyəti bununla bağlı iradlarını bildirərdi. Əksinə Vyanada olan 40-dan çox ölkənin nümayəndə heyəti və dünya mətbuatı bu hərəkətimi alqışladı. Onlardan bəziləri mənə yaxınlaşaraq xoş təəssüratlarını bildirir və atdığım addımın heç də hər bir azərbaycanlı üçün asan olmadığını bildirirdilər. Amma, nədənsə, dediyim bəzi mətbuat orqanları bundan istifadə edərək qara piar etməyə çalışdılar.

Əgər həmin saytlar, səhifələr reytinq qazanmaq istəyirlərsə, mənim burada çəkdiyim təbliğat foto və videolarını paylaşsınlar. Reytinq xətrinə kimlərisə qaralamasınlar. Əgər onlar digər mətbuat konfranslarının videolarını izləsələr, görərlər ki, mən digər nümayəndələri də onların öz dillərində salamlamışam. Mən çox dil bilirəm və bu mənim mənfi yox, müsbət cəhətimdir.

Bir məsələni də qeyd edim ki, yayılan xəbər başlıqlarında qeyd olunur ki, “Erməniləri sevən bakılı jurnalist”. Bu başlıq tamamilə səhvdir. Birincisi, mən erməniləri sevmirəm, Vyanaya Azərbaycanı sevərək gəlmişəm. İkincisi, mən bakılı yox, gəncəliyəm. Üçüncüsü, mən jurnalist deyiləm. Bu da xəbəri yazan jurnalistin nə qədər qeyri-peşəkar və savadsız olduğunu göstərir.

Məni tənqid edirlər, əgər bacarırlarsa, gəlib özləri təmsil etsinlər ölkəmizi. Bəlkə onlar məndən daha yaxşı edəcəklər bu işi. Niyə mən burada təkəm? Haradadır onlar?

Sənin bu hərəkətinə ermənilərin reaksiyası necə oldu?

Ermənilərin reaksiyası çox donuq oldu. Mənim bu addımım onları da təəccübləndirdi. Onlar ilk dəfə idi ki, özlərinə qarşı azərbaycanlıdan bu cür hərəkət görürdülər. Mən hər zaman sülhsevər olmuşam, məni yalnız mənim kimilər daha yaxşı anlayar, nəinki qara piar aparan paxıl insanlar.

Son olaraq, nə demək istəyərdin?

Saytlar bu xəbəri silsin və üzərimdəki qara ləkə götürülsün. Mən bu yaşıma qədər nə etmişəmsə, Azərbaycanımızın xeyri üçün etmişəm. Mən ermənipərəst olsaydım, başqa qüvvələrə xidmət edərdim. Hər zaman cənab Prezidentimizin gördüyü işlərdən çox razıyam və hər zaman Prezidentimizin arxasındayam. Mənim atdığım bu addım da yalnız sülh üçündür.