Nazir: Biz dünyaya ölkəmizin gözəlliyini göstərəcəyik
Avropa Oyunları idman infrastrukturunu möhkəmləndirmək və çoxdan planlaşdırdığımız layihələri sürətləndirmək üçün yaxşı imkandır.
Bu barədə EurActiv kanalına verdiyi müsahibəsində Azərbaycanın Gənclər və İdman naziri Azad Rəhimov bildirib.
Nazirin sözlərinə görə, bu Oyunlar Azərbaycana bu qəbildən olan irimiqyaslı tədbirlərin keçirilməsi sahəsində təcrübə yığmaq üçün imkan yaradacaq.
“Biz Azərbaycanı dünyaya Avropa ölkəsi, müsəlman ölkəsi, eyni zamanda elit dövlət kimi tanıtmaq, eləcə də Şərq və Qərb arasında müsəlman şərqi və xristian Avropası arasında körpü kimi təqdim etmək, və ölkəmizin gözəlliyini, onun qədim tarixini, musiqisini, incəsənətini, mətbəxini və qonaqpərvərliyini göstərmək imkanı əldə edirik”, - nazir deyib.
Onun sözlərinə görə, Olimpiya Oyunlarının təşkili istənilən ölkədən xərc tələb edir.
“Bəzən Olimpiya Komitəsi yüksək tələblər irəli sürür. Məsələn, minimum 15 000 adam tutan Olimpiya hovuzu olan idman zalı. Bunun üçün böyük məbləğdə pul tələb olunur. Bakının üstünlüyü diqqəti artıq mövcud olan obyektlər üzərində cəmləməyində və onları abadlaşdırmasında oldu. Biz çoxfunksiyalı zalları, məsələn, bir neçə il öncə “Eurovision”un keçirildiyi Cristall Holl-u istifadə edirik.
Amma yenə də irs baxımından son üç böyük arena, Olimpiya futbol stadionu, Su idmanı növləri Mərkəzi və Atıcılıq Mərkəzi tikilib, onların inşası burada Birinci Avropa Oyunlarının keçirilməsi ideyası təklif edilməmişdən öncə planlaşdırılmışdı”, - nazir qeyd edib.
Xərclərdən danışarkən nazir qeyd edib ki, faktiki olaraq üç büdcə mövcuddur:
“Bakı meriyasının sərəncamında olan yollar daxil olmaqla İnfrastruktur büdcəsi. İkinci, inşaata aid büdcə. Biz artıq inşa edilən obyektləri müzakirə etdik. Və üçüncü büdcə - istismar, yəni birbaşa olaraq Avropa Oyunları zamanı xərclənəcək vəsait. Bu məbləğ 960 milyon manatdır, mən onların rasional şəkildə sərf ediləcəyini böyük qürurla deyə bilərəm”.
Bakıda keçiriləcək Birinci Avropa Oyunlarında erməni idmançılarının iştirakı barədə danışarkən, nazir qeyd edib ki, erməni televiziyası Oyunların yayımı üçün hüquq əldə edib.
“Oyunlarda 50 ölkə iştirak edəcək. Heç bir ölkə boykot və ya iştirak etməmək imkanını müzakirə etməyib. Bu Oyunlarda təxminən 6200 idmançı iştirak edəcək. Onları 3000 heyət üzvü müşayiət edəcək”, - nazir bəyan edib.
Azad Rəhimov qeyd edib ki, Avropa Oyunlarının Təşkilat Komitəsi cədvələ riayət edir:
“İdman bazaları, otellər də artıq hazırdır. Hələ də inşaat davam edir, məsələn, təhlükəsizliyi yoxlamaq, generatorlar və informasiya texnologiyaları üçün xüsusi çadırlar qurulur. Bəli, işlər son günə qədər davam edəcək və bu, normaldır”.
Açılış mərasimindən danışarkən, nazir qeyd edib ki, açılış mərasimi kimi, bağlanış mərasimi də çox maraqlı keçəcək:
“Açılış mərasimi, əsasən ölkəmizə, onun tarixinə həsr olunub. Bağlanış mərasimi isə rəngarəng bayram olacaq”.oxu.az
Ölkə.Az
