Hafiz Hacıyev: "Mitinq zamanı Kərimov Əlinin adamları ilə üz-üzə gəlsək, qan..."

Milli Şura ilə Müasir Müsavat partiyası eyni yerə, eyni günə və eyni saata mitinq təyin edib.

Bununla bağlı Müasir Müsavat partiyasının sədri Hafiz Hacıyev Ölkə.az-a açılama verib.

Hafiz Hacıyev: "Biz bilmirdik ki, Milli Şura mitinq keçirəcək. Biz bu qərarımızı bir müddət bundan əvvəl vermişdik. Avropa Şurasının Azərbaycan haqqında qəbul etdiyi sərsəm bir qərara etiraz əlaməti olaraq, o cümlədən Azərbaycanda xarici dövlətlərin əlaltıları olan bəzi partiyaların fəallaşmasını xalqa çatdırmaq məqsədi ilə mitinq keçirməyə qərar verdik. Çox təəssüf ki, Milli Şura bizim ideyamızı oğurladı. Onlar bizdən qabaq bu açıqlamaları verdilər, ancaq buna baxmayaraq biz oktiyabr ayının 12-də, saat 15:00-da, "Məhsul" stadionunda mitinqimizi keçirməkdə qərarlıyıq.

Milli Şurada 5-10 dənə qocalıb əldən düşmüş adam var, onların hər birinə 1-2 nəfər də əlavə adam lazımdır ki, qollarına girib aparsın, onlar da mitinq keçirsin. Biz öz qərarımızı vermişik. Qərarımızda da israrlıyıq. Məktubumuzu da hazırlayıb göndərmişik Bakı Şəhər İcra Hakimiyyətinə.

Mən düşünürəm ki, bizim mitinqimizə gələnlər onlardan çox olacaq. Əgər ikimizə də icazə versələr, onlar mitinqi qoyub qaçmalı olacaqlar. Qarşıdurma baş versə, onun məsuliyyətini biz öz üzərimizə götürmürük. Bizim rayon təşkilatlarının üzvləri çox hiddətlidirlər, onlar mənə bildirdilər ki, əgər biz onlarla qarşılaşsaq bıçaq davasına çıxacağıq. Çox qorxulu bir vəziyyətdir. Ola bilər ki, biz onları dəyənəklə döyüb qovaladıq ordan. Əgər ikimizin də mitinqi eyni vaxtda olsa, o zaman orada qan su yerinə axacaq.

Milli Şura xaricdən qrantlar alır. Rəhbərləri bu qrantları silməyə görə bu oyunu çıxarırlar. Onların üzvlərinə, fəallarına üzümü tutub deyirəm ki, ölkədə qarışıqlıq yaratmayın, oturun yerinizdə. Yox, əgər onlar oturmaq istəməyəcəklərsə, döyülmək istəyirlərsə Hafiz Hacıyevin partiyası ilə üz-üzə gələcəklər".

İsayev Əli

Ölkə.az