Amerikalı “casus” jurnalisti 20 il həbs gözləyir

İranda 10 aya yaxındır ki, “casusluq” ittihamı ilə saxlanılan Washington Post qəzeti müxbirinin məhkəməsi başlayıb. 

Həm ABŞ, həm də İran vətəndaşı olan Jason Rezaian “düşmən dövlətlərə” məlumat ötürməkdə ittiham edilir. Washington Post qəzetinin redaktoru məhkəməni “rüsvayçı” adlandırıb və onun qapalı keçirilməsi qərarını da pisləyib. Cənab Rezaian, təqsirli bilinərsə, onu 20 ilə yaxın həbs cəzası gözləyir. İran proseslə bağlı şərh verməyib, lakin Washington Post məsələyə münasibət bildirib.

“Cənab Rezaiana qarşı rüsvayçı ədalətsizlik əməlləri sonsuza qədər davam edir,” Washington Post qəzetinin icraçı redaktoru Martin Baron deyir.

“İndi öyrənirik ki, bu məhkəmə dünyaya və beləliklə müşahidəyə qapalı olacaq.

“Bu sistemdə heç bir ədalət yoxdur, heç zərrə qədər də, və günahsız bir insanın taleyi havadan asılıdır”. Qəzet bildirir ki, cənab Rezaian ittiham olunmadan həbs edilib və İranın tanınmış Evin həbsxanasında saxlanılıb – bir neçə ay təcridxanada qalıb və ona ehtiyacı olan tibbi yardım göstərilməyib.

Qeyd olunur ki, cənab Rezaiana məhkəmə tərəfindən təsdiq edilmiş vəkilini görmək üçün yalnız bir saat yarım vaxt verilib və “prokurorluq və ya məhkəmə tərəfindən bu absurd ittihamları təsdiq edəcək heç bir dəlil göstərilməyib”. (qafqazinfo)

Ölkə.Az