Şəmkirdə iki nəfəri güllələyən şəxsin məhkəməsi başlayıb

Gəncə Ağır Cinayətlər Məhkəməsində iki nəfəri odlu silahla güllələyərək xəsarət yetirməkdə təqsirli bilinən Ramin Mehdixanovun cinayət işi üzrə məhkəmə hazırlıq iclası keçirilib.

“Ölkə.Az” xəbər verir ki, hakim Dadaş İmanovun sədrliyi ilə keçirilən prosesdə anket məhlumatları dəqqişlədirilib.

Növbəti məhkəmə baxış iclası sentyabrın 3-nə təyin olunub.

Qeyd edək ki, bu il mayın 9-da Şəmkir rayon Polis Şöbəsinə rayonun Çinarlı qəsəbəsində yol-nəqliyyat hadisəsi və silahlı insident olması barədə məlumat daxil olub.

Dərhal polis əməkdaşları həmin əraziyə gələrək müvafiq araşdırmalar həyata keçirib.

Araşdırmalar zamanı məlum olub ki, Şəmkir rayonunun Seyfəli kənd sakini, 44 yaşlı Ramin Mehdixanov qısqanclıq zəminində əvvəllər də mübahisə etdiyi dayısı oğlu Musa Rüstəmovun “VAZ-2107” markalı avtomobil ilə hərəkətdə olduğunu görüb, özünə məxsus “VAZ-2106” markalı avtomobili ilə onun qarşısını kəsmək istəyib və nəticədə avtomobillər bir-birinə çırpılaraq yol-nəqliyyat hadisəsi baş verib.

Daha sonra Ramin Mehdixanov özünə məxsus, müvafiq sənədləri olmayan ov tüfəngi ilə Musa Rüstəmov qaçan zaman arxadan atəş açaraq onun ayaq nahiyəsinə, vətəndaş Bakir Hüseynovun isə əlinə xəsarət yetirib.

Ölkə.Az