Ofeliya Sənani: "Qohumlara görə qaçdım qızımgildə gizləndim"

Dünən Azərbaycanın xalq artisti, tanınmış diktor və aktrisa Ofeliya Sənaninin doğum günü idi.

Bir neçə ildir efirdə olmasa da, hələ də sevilən, xatırlanan bu xanım Ölkə.Az-ın suallarını cavablandırıb.

- Ofeliya xanım, doğum gününüzü necə qeyd etdiniz?

- Qohumlarım, qardaşlarım, bacılarım, onların övladları, öz övladlarım, nəvə-nəticələrimlə qeyd etdim. Amma təbii ki, xüsusi təmtəraq olmadı

- Maşallah, nəticəniz də var?

- Bəli, üç nəticəm var.

- Keçmiş iş yoldaşlarınızdan kimlərdən təbrik aldınız?

- Axı bu adi ad günüdür, yubiley deyil. Yubileyim gələn ildir. Sağlıq olsun, yubileyimdə həmkarlarımı da dəvət edəcəyəm. Bilirsiniz necədir? Şərqiyyə xanımdır, qızı rəhmətə gedəndən özünə gələ bilmir, dodağı belə qaçmır. Halbuki bizim aramızda ən zarafatcıl, ən şən qız o idi. Bizi güldürürdü, şənləndirirdi, lətifələr danışırdı. Özü də elə iştahla danışır ki, adam istər-istəməz ona qulaq asır. Tamilla xanımın da həyat yoldaşı rəhbətə gedəndən sonra "sındı". Efir elə bil ki, insanları cavanlaşdırır, yaxınlaşdırır. Bizim hər həftə məclisimiz olardı. Hər həftə birimizin evinə yığışıb şənlənərdik.

- Yaş kompleksiniz var?

- Qətiyyən, yaşımı gizlətmirəm. Mən arada bir neçə dəfə xəstəlik keçirmişəm. Böyrəyimdə ciddi problem yaranmışdı. Aylarla Moskvada müalicə almışam. Oradan qayıdanda sonra üzümdən təbəssüm əskik olmayıb. Əksinə fəxr edirəm ki, 74 yaşda özüm dükana-bazara gedirəm, uşaqlarıma qıymıram. Çünki hamısının öz problemi var.

- Aktrisa kimi də xeyli işləriniz olub.

- Bəli, 200-dən artıq filmin dublayjını etmişəm. Bir neçə filmdə də rol oynamışam.

- Bildiyimə görə, həyat yoldaşınız Valid Sənaninin ölümündən sonra doğum gününüzü təmtəraqla qeyd etmirsiniz...

- Valid rəhmətə gedəndən ad günümü qeyd etməmişəm. Bu il də qeyd etmək istəmədim. Daha doğrusu, evdən qaçdım, getdim qızımgildə gizləndim ki, qohumlar gəlməsin. Çünki Binəqədidə baş verən məlum faciə mənə çox pis təsir etmişdi. Valid dünyasını dəyişəndən gözümün yaşı qurumayıb, hər gün ağlamışam. Amma bu yanğın mənə çox pis təsir elədi, neçə gündür Validi yadımdan çıxartmışam. Altı uşaq dünyasını dəyişib. Onları hərəsinin iki övladı olsaydı... Bu nəsildir e, nəslimizdən kəsildi. Mən buna görə ad günü eləmədim, evdən qaçdım. Oğlum dedi ki, ana bilmək olmur, yaşın çoxdur. Mən də qaçdım qızımgilə. Oturduq çay içdik, söhbətləşdik. Yəni təmtəraqlı qeyd etmədik. Hətta efirdə də dedim ki, qohumlarım inciməsin, ad günümü qeyd etməyəcəyəm

İntiqam VALEHOĞLU
Ölkə.Az