DİN: Bu qadağa etibarnamə ilə maşın sürənlərə aid olmayacaq

İyun ayının 1-dən rayon qeydiyyatında olan avtomobillərin Bakı şəhərinə daxil olması qadağan olunacaq.

Bu qərar I Avropa Oyunları ilə əlaqədar verilib. Məqsəd Bakı şəhərində maşın sıxlığının qarşısını almaqdır.

Özü və maşını rayon qeydiyyatında olub, Bakı şəhərində yaşayan və işləyən şəxslər qadağanın tətbiq ediləcəyi bir ay müddətində rayona gedəcəyi təqdirdə həmin şəxslərin də maşınlarının paytaxta buraxılıb-buraxılmayacağı məsələsi sual doğurur.

Bu məsələyə aydınlıq gətirnək üçün Ölkə.az Daxili İşlər Nazirliyi (DİN) Baş Dövlət Yol Polisi İdarəsi (BDYPİ) ictimaiyyətlə əlaqələr şöbəsinin rəisi, polis polkovniki Kamran Əliyevin fikrini öyrənib.

Kamran Əliyev: "Bu qadağa sıxlığın qarşısını almaq üçün qoyulub. Yük maşınları və rayon qeydiyyatında olan maşınlar paytaxta bir ay müddətində buraxılmayacaq. Özləri və maşınları rayon qeydiyyatında olub, Bakı şəhərində yaşayanlar isə etibarnamə ilə maşınlarını sürəcəklər. Onları heç kim şəhərdən çıxarmayacaq. Şəhərin giriş hissələrində xüsusi postlar qoyulacaq və həmin postlardan paytaxta rayon qeydiyyatında olan maşınları buraxmayacaqlar. Bu qadağa etibarnamə ilə maşın sürənlərə aid olmayacaq".

Səxavət Məmməd
Ölkə.az