“Azəryolservis” Respublika Günü ilə bağlı tədbir keçirdi
Bu gün Nəqliyyat Nazirliyi “Azəryolservis” ASC-də 28 May – Respublika Günü münasibəti ilə tədbir keçirilib.
ASC-dən Ölkə.Az-a verilən məlumata əsasən, tədbiri giriş nitqi ilə açan “Azəryolservis” ASC-nin sədr əvəzi Saleh Məmmədov dövlətçilik tariximizdə Azərbaycan Xalq Cümhuriyyətinin müstəsna yeri olduğunu qeyd edib:
“Şərqdə ilk parlamentli respublika olan Azərbaycan Xalq Cümhuriyyəti gərgin və mürəkkəb ictimai-siyasi şəraitdə cəmi 23 ay fəaliyyət göstərsə də qısa zaman ərzində dünya ölkələri tərəfindən tanınmış və beynəlxalq hüququn subyektinə çevrilib.”
Saleh Məmmədov çıxışında XX əsrin sonunda – 1991-ci ildə Azərbaycan özünün dövlət müstəqilliyini bərpa etsə də, onun möhkəmləndirilməsi üçün, əslində heç bir iş görülmədiyini qeyd edib:
“Məhz 1993-cü ildə Ümummilli liderimiz, dahi şəxsiyyət Heydər Əliyevin xalqın təkidi ilə hakimiyyətə qayıdışı Azərbaycan dövlətçiliyini ağır faciələrdən xilas edə bildi. Heydər Əliyevin hakimiyyətə qayıdışı ilə ölkənin ictimai- siyasi, elmi- mədəni həyatında, beynəlxalq əlaqələrdə dönüş yarandı. Ümummilli lider Heydər Əliyevin qətiyyətli səyləri nəticəsində 1994-cü il oktyabr və 1995-ci ilin dövlət çevrilişi cəhdlərinin qarşısı alındı.”
Qeyd olundu ki, Azərbaycan Xalq Cümhuriyyətinin fəaliyyəti Ümummilli Lider Heydər Əliyev tərəfindən hər zaman yüksək qiymətləndirilib. Müstəqil Azərbaycan Respublikasının banisi, görkəmli dövlət xadimi Heydər Əliyevin Azərbaycan Demokratik Respublikası haqqında söylədiyi fikirlər bütün zamanlar üçün aktuallığını saxlamaqdadır: “Bu gün tam qətiyyətlə demək olar ki, Azərbaycan dövləti, Müstəqil Azərbaycan Respublikası 1918-ci ildə yaranmış Xalq Cümhuriyyətinin varisidir. Biz bu varisçilik prinsipini şərəflə, sədaqətlə yerinə yetiririk və yetirəcəyik ”.
Tədbirdə çıxışı zamanı “Azəryolservis” ASC-nin sədr əvəzi Saleh Məmmədov xüsusi olaraq vurğuladı ki, hazırda Ümummilli Lider Heydər Əliyevin şah əsəri olan müasir Azərbaycan hazırda Prezident İlham Əliyev cənablarının rəhbərliyi altında dünyanın ən dinamik inkişaf edən ölkələri sırasında layiqli yer tutur. Bu gün məhz cənab İlham Əliyevin uğurlu siyasəti nəticəsində ölkəmiz iqtisadi artım tempinə görə dünya dövlətləri arasında ön mövqelərə çıxmış, regionun lider dövlətinə çevrilmişdir:
“Azərbaycan hazırda demokratik, hüquqi və dünyəvi dövlət quruculuğu yolunda mətin addımlarla irəliləyir. Xalqımız bundan sonra da ümummilli liderimizin layiqli davamçısı, ölkə Prezidenti İlham Əliyevin ətrafında sıx birləşərək fundamental qələbələr qazanacaq, öz müstəqilliyini əbədi qoruyub möhkəmləndirəcəkdir.”
Ölkə.Az
