Yəmənin xüsusi xidmət orqanlarının qərargahına zərbələr endirildi

Ərəb koalisiyası Yəməndə xüsusi xidmət orqanlarının qərargahı üzərinə zərbələr endirib.

Ölkə.Az "Reuters" agentliyinə istinadən xəbər verir ki, ərəb ölkələri koalisiyası qüvvələrinin Yəmənin paytaxı Sənada xüsusi xidmət orqanlarının qərargahına zərbələr endirməsi nəticəsində 30 nəfər həlak olub.

Yerli həkimlərin yaydığı məlumata əsasən, ölənlərin çoxu xüsusi xidmət orqanları əsgərləridir. Hava zərbəsi zamanı 100-ə yaxın adam yaralanıb.

Səudiyyə Ərəbistanı martın 25-də husilərin Yəməndə ölkənin cənub əyalətlərinə irəliləməsinin qarşısını almaq və BMT-nin rəsmi olaraq tanıdığı prezident Əbd Rəbbi Mənsur Hadinin yenidən hakimiyyətə gətirilməsi məqsədilə Yəmənə qarşı hava hücumlarına başlayıb. 10 ərəb dövləti və ABŞ "Qətiyyət fırtınası" adlanan bu hərbi əməliyyatı dəstəkləyib.

Aprelin 21-i Yaxın Şərq dövlətləri koalisiyası hərbi əməliyyatın dayandırıldığnı elan edib. Döyüşlər nəticəsində 760 dinc sakin ölüb, 4 minə yaxın şəxs isə yaralanıb.

Rəşid Mustafazadə

Ölkə.Az