AzVision.az 2 yaşını qeyd edir
“İki il əvvəl biz AzVision-u yaradanda inanmırdıq ki...”
Belə yazılar adətən bu cür şablonla başlayır. Hə, AzVision ölkədə onlayn media bumu yaşanan bir dövrdə yaranıb. Amma çox tezliklə öz yerini tutub və sübut edib ki, ucuz oyunlara getmədən, ciddi sayt olaraq da tanınmaq, oxucu qazanmaq mümkündür”.
Bu gün Azvision.az xəbər portalı yaranmasının 2-ci ildönümünü qeyd edir. Xəbər portalı yarandığı gündən etibarən bir-birindən maraqlı xəbərləri, reportajları, həmçinin layihələri ilə oxucularına xidmət edib. Sizə bu saytın yaranmasının əsas səbəbkarı olan araşdırmaçı jurnalist Vüsal Məmmədovla kiçik söhbətimizi təqdim edirik.
-Necə oldu sayt yaratmaq qərarına gəldiniz?
AzVision.az yaranan dövrdə ölkədə onlayn media bumu yaşanırdı. Saytlar çox idi, amma ciddi ictimai-siyasi saytlar tək-tük gözə dəyərdi. Düşündük ki, həmin seqmentdə yerini tutacaq bir sayt yaratmaq olar. Ciddi və maraqlı bir təklif olundu mənə, dəyərləndirdim, işə başladıq, nəticədə bugünkü AzVision.az formalaşdı.
-Saytla bağlı planlarınız ilk vaxtlarda olduğu kimi davam edib, ya fəaliyyət zamanı hər hansısa dəyişikliklərə zərurət yaranıb?
Yox, planlar çox dəyişib. Əvvəlcə daha ciddi, analitik sayt yaratmağı düşünürdük. Bir neçə transformasiyadan sonra indiki stildə xəbər-təhlil saytı modelinin üzərində dayandıq və bu yanaşma işlədi: "AzVision" auditoruyası artmağa başladı.
-İndi də kollektivin yığılma prosesinden danışardınız...
Kollektiv belə oldu ki, insanlar gəlib-getdilər, bizə uyğun olanlar qaldılar. Əsas məsələ budur: şirkətin fəlsəfəsini, mövqeyini doğma bilən, qəbul edən insanları seçib saxlamağı bacarmaq. Sonra da onlara özlərini təsdiqləməkdə mane olmamaq. Mən də bunu eləmişəm. Başqa bir sirr yoxdur.
-Həmkarların əksəriyyətinin xanımlar olmasının hər zaman diqqət mərkəzində olmasına şərhiniz necədir?
Mən heç kimi xanım olmasına görə işə götürməmişəm axı... Müxtəlif yollarla kollektivə gəliblər, bura uyğun olduqlarını göstəriblər, sayta can yandırıblar və bizim bir parçımıza çevriliblər. Heç vaxt heç kimi sıxışdırmamışıq, imkan yaratmışıq ki, bacardıqları kimi parlasınlar, özlərini göstərsinlər, tanınsınlar.
-Son olaraq demək istədikləriniz və tövsiyyələriniz...
Bütün jurnaistlərin səmimi və dürüst həmkar olmalarını arzulayıram.
Biz də Ölkə.az adından AzVision.az-ın ad gününü təbrik edir və bundan sonrakı fəaliyyətində uğurlar arzulayırıq.
Ölkə.Az
