ABŞ və Avropadan ÜÇTİRƏLİ HƏDƏ

Və yaxud inkişafa, sabitliyə yönəlik qarayaxma

Niyə məhz üçtirəli! Çox təəssüflər olsun ki, hədə, təzyiq mexanizmi əsas üç istiqamətdən gəlir: Bəzi beynəlxalq qurumlar, ABŞ və Avropanın nüfüzlü mətbuatı və Sosial şəbəkələr! Heç kimə sirr deyil ki, Beynəlxalq tədbirlərin keçirilməsində əsas meyar ölkənin təşkilat komitəsinin kriteriyalarına cavab verməsidir. Bu mənada Bakı-2015: Birinci Avropa Oyunları da bu meyarlardan çıxış edərək məhz Azərbaycanı seçdi.

Niyə məhz Azərbaycan?

Əvvəla qeyd edim ki, Prezident İlham Əliyevin rəhbərliyi ilə reallaşdırılan strateji kurs daxili ictimai-siyasi sabitliyi və tərəqqini ən yüksək səviyyədə təmin edib. Yerli və xarici analitiklərin yekdilliklə üzərində durduqları başlıca məsələlərdən biri də budur ki, Azərbaycanda hökm sürən ictimai-siyasi sabitliyin əsaslarını dövlət tərəfindən həyata keçirilən uğurlu islahatlar və tətbiq edilən yeniliklər, inkişaf modelləri təşkil edir. İnsan və vətəndaş hüquq və azadlıqlarının ən yüksək səviyyədə təmin edilməsi, qanunvericilik bazasının zənginləşdirilməsi, sosial-siyasi təsisatların legitimləşdirilməsi, vətəndaşların siyasi həyatda iştirakına maksimum şəraitin yaradılması kimi göstəricilər və nəticələr deyilənləri bir daha təsdiq edir. Bundan başqa Prezident İlham Əliyevin uzaqgörən və praqmatik xarici siyasət strategiyasının qanunauyğun nəticəsi kimi, Azərbaycan beynəlxalq münasibətlər sisteminin nüfuz və güc dairəsində sürətlə irəliləməkdədir. Belə ki, həyata keçirilən çoxtərəfli və balanslaşdırılmış xarici siyasət nəticəsində Azərbaycan regionun ən güclü və nüfuzlu dövlətinə çevrilib. Təsadüfi deyil ki, bu gün dünyanın aparıcı dövlətləri və təşkilatları Azərbaycanı Cənubi Qafqazın təhlükəsizlik qarantı adlandırırlar. Təkcə onu demək kifayətdir ki, ölkəmizin iştirakı olmadan regionda heç bir strateji layihə reallaşdırılmır. Bütün gerçəkləşdirilən regional layihələrin mərkəzi oyunçusu qismində də məhz  Azərbaycan çıxış edir. Eyni zamanda, məhz bu cür layihələr ölkəmizin milli maraqlarına adekvat olmaqla bərabər, Azərbaycanın suverenlik səviyyəsini, birbaşa olaraq heç bir subyektdən asılı olmadığını da təsdiq edir. Ötən illər ərzində əldə olunmuş makroiqtisadi göstəricilər və Azərbaycanın iqtisadi baxımdan dünya liderinə çevrilməsi düşünülmüş iqtisadi strategiyanın davam etdirilməsinin məntiqi nəticəsi sayıla bilər və dövlət başçısının iqtisadi islahatları uzunmüddətli, həmçinin, yeni inkişaf erasının tempinə uyğun aparmaq qətiyyətinin əyani təzahürüdür.

Bu tendensiya, eyni zamanda, Prezident İlham Əliyevin böyük xarizmatik şəxsiyyət olmasını, siyasi peşəkarlığını, yüksək idarəetmə məharətini təsdiqləyir.

-          1-ci tirə

Bu gün Azərbaycana qarşı ABŞ, Avropanın bir çox dairələrindən qarayaxma kampaniyası aparılır. Onlar Azərbaycanın gördüyü bu işin üzərinə kölgə salmağa çalışırlar. Bütün bunların hamısı nə qədər ikili standartların təzahürü olsa da, Azərbaycanın haqq işini həyata keçirməsinə maneə ola bilməyəcək. Biz sadəcə öz işimizi görürük və üzərimizə götürdüyümüz öhdəliyi layiqincə yerinə yetiririk. Kim buna hansı gözlə baxırsa, bu onun öz işidir. “Human Rights Watch”, "Amnesty International" kimi qondarma təşkilatların hazırladıqları hesabatlar maddi maraqların arxasında gizlənən sifarişdən başqa bir şey deyildir. Sevindirici haldır ki, artıq bunu tək Azərbaycan ictimaiyyəti deyil, eyni zamanda dünyanın bir çox inkişaf etmiş ölkələri də etiraf edirlər. Digər məqam ondan ibarətdir ki, bu təşkilatlara Azərbaycanın beynəlxalq imicinə zərbə vurulması ilə bağlı verilən sifarişlər qeyri-peşəkar və ənənəvi üsullarla aparılır. Buda sonda onların niyyətlərinin fiaskoya uğraması ilə nəticələnəcək.

-          2-ci tirə

Güclü, inkişaf edən, demokratiya istiqamətində addımlar atan, regionda liderə çevrilmiş bir dövlətə qarşı bu cür çirkin kampaniyanın aparılması yolverilməzdir. Bu kampaniya onu aparanlara başucalığı gətirmir. Onlar bu cür addımlarla nə isə əldə edə bilməyəcəklər. Müasir beynəlxalq münasibətlər sistemində əslində bu, utanc gətirən bir prosesdir. Halbuki indiki dövrdə bütün proseslər açıq və şəffaf olmalıdır. Belə məkrli planların həyata keçirilməsi ABŞ və Avropanın özünün imicinə mənfi təsir göstərir və onlara olan inamı azaldır.

Təəssüfləndirici məqam ondan ibarətdir ki, bu məkrli niyyəti həyata keçirmək üçün medianın gücündən geniş şəkildə istifadə olunur. “Washington Post”, “New York Times”, "Le Monde"və bu kimi bəzi nüfuzlu mətbuat orqanlarında silsilə qarayaxma kampaniyaları aparılır ki, bu da ölkəmizdə ciddi etirazla qarşılanır. Bizim üçün utancverici məqam ondan ibarətdir ki, bu sifarişlərin ölkə daxilində “Azadlıq” radisou və Meydan TV kimi kölələri də var. Təbii ki, bu xəyanətkar qurumlar ölkəmizdə internet, söz və mətbuat azadlıqlarından süi şəkildə istifadə edərək sifarişləri icra edirlər. Bir dəfə də olsun ölkəmizin milli maraqları naminə çıxış etməyə cəsarəti olmayan bu kimi qurumlar cəmiyyətdə xəyanətkar kimi tanınırlar.

-          3-cü tirə

Bir neçə il bundan öncə Azərbaycanda mötəbər “Avroviziya” mahnı yarışması keçiriləndə də belə hallarla qarşılaşmışdıq. Amma Azərbaycan bu yarışmanı çox yüksək səviyyədə keçirdi. Tədbir “Avroviziya” mahnı müsabiqəsi tarixində yeni səhifə yazmağa nail oldu. Artıq İlk Avropa Oyunlarının keçirilməsi üçün bütün zəruri hazırlıq işləri başa çatdırılıb. İştirakçı tərəflər məlumdur və çox az müddətdən sonra onlar öz missiyalarını yerinə yetirəcəklər. Azərbaycanın adı İlk Avropa Oyunlarının keçirildiyi məkan kimi bu oyunların tarixinə yazılacaq. Bu baxımdan da ilk Avropa Oyunları yaxınlaşdıqca, ölkəmizə qarşı qarayaxma kampaniyası, bu Oyunları gözdən salmaq cəhdləri güclənir. Qarayaxmanın reallaşması üçün istifadə olunan əsas vasitə Sosial Şəbəkəlrdir. İnformasiya müharibəsi kimi qeyd etdiyimiz bu proses daha çox Twitter üzərindən aparılır. Düzdü proses Facebookda və digər sosial şəbəkələr də gedir. Lakin özlərinin insan hüquqlarının müdafiəçisi, təhlilçi və araşdırmaçı kimi təqdim edən və fərdi şəkildə ölkəmizə qarşı qarayaxma sifarişlərini icra edən bu kəslər Azərbaycan ictimaiyyətinin Twitterdə nisbətən zəifliyini təhlil edib “mübarizə”ni bu platformada aparmaq qərarına gəliblər. Lakin Twitterdə ölkəmizin fəal gəncləri tərəfindən aldıqları ciddi təpkidən doları planlarının alt-üst olduqlarının fərqindədirlər.  Lakin bütün qarayaxma cəhdlərinə baxmayaraq 49 dövlətin 6 mindən çox idmançısı, 100 minlərlə turist, 10 minlərlə könüllü bu yarışlara qatılmaq üçün öz razılığını verib. Yazımın sonunda isə Avropa Olimpiya Komitəsinin (AOK) prezidenti Patrik Hikki fikirlərini paylaşmaq qərarına gəldim: “İlk Avropa Oyunları idman tarixində silinməz izlər qoyacaq. Çoxlu sayda könüllünün olması, London Olimpiadasından peşəkar əməkdaşların cəlb edilməsi bir daha göstərir ki, Azərbaycanın istənilən idman tədbirini yüksək səviyyədə keçirməkdə zəngin təcrübəsi var.”

Bəli, Azərbaycan bugünə qədər həyata keçirdiyi beynəlxalq tədbirləri yüksək səviyyədə başa vurub, bu tədbir də yüksək səviyyədə həyata keçiriləcək. Çünki biz haqqın, inkişafın, demokratiyanın, dostluğun, ən əsası isə ƏDALƏTin tərəfindəyik! (Səbuhi Abbasov, 7News.az saytının baş redaktoru)

Ölkə.Az