Tərtərdə minaya düşən əsgərin anasından təsirli sözlər

Lənkəranda gənci narazı, eyni zamanda haldan salan sağlamlığıdır. Səhhətində ciddi problemlər var. 11 il ərzində tədricən nitqini, görmə və hərəkət qabiliyyətini itirib. Bəs, gəncə kömək edən olacaqmı?

Lənkəran rayonunun Nərimanabad qəsəbə sakini Xanımnisə Əliyevanın narahatlığı əsgəri xidmətdən I dərəcəli əlil kimi qayıdan oğlu Tahir Məmmədovla bağlıdır.

Tərtərdə 2002-2004-cü illərdə ön cəbhədə xidmət edən Tahir valideynlərinin bildirdiyinə görə, təxris olunmağa bir ay qalmış mina partlayışına düşüb. Bu səbəbdən də 20 yaşlı gəncin səhhətində ciddi problemlər yaranıb.11 il ərzində isə tədricən nitqini, görmə və hərəkət qabiliyyətini itirib.

“Gözümün qabağında balam əriyir. Bu valideyn üçün çox ağırdır. Mənə kömək lazımdır. Heç olmasa, bir az da olsa əlini-ayağını işlədə bilsin. Əgər bunun orqanları olsaydı ürəyi, ciyəri, böyrəyini şəxsən mən özüm verərdim, heç kimə də qıymazdım. Amma bilmirəm nədir dərdi”, – deyə əlil gəncin anası Xanımnisə Əliyeva bildirib.

Valideynlərin aldığı müavinətlə Tahirin dərdinə əlac tapmaları nəticəsiz qalıb. Paytaxt Bakıda və İran İslam Respublikasının səhiyyə ocaqlarında aparılan müalicələrsə, səmərə verməyib. Onlarsa Tahirin Türkiyədə və Almaniyada müalicə alarsa, şəfa tapa biləcəyinə ümid edir.

Hələlik ağır maddi durumda yaşayan ailəyə ancaq Səfərbərlik və Hərbi Xidmətə Çağırış üzrə Dövlət Xidmətinin Lənkəran rayon şöbəsi maddi yardım göstərir. 

İndi 31 yaşlı gəncin sağalıb əvvəlki sağlam həyatına qayıtması üçün böyük vəsait tələb edən müalicəsini reallaşdırmaq lazımdır. 

Məmmədovlar ailəsi ümid edir ki, Tahirin sağlamlığının qaytarılmasında ailəyə yardımçı olanlar tapılacaq. (ans)

Ölkə.Az