Politoloq: "ABŞ kimi Rusiya da geosiyasi oyunlar oynayır"

Amerikalı iqtisadçı və politoloq Pol Kreyq Roberts iddia edir ki, Vaşinqtonun nəzarət etməyə çalışdığı Ermənistanı, Qırğızıstanı və Makedoniyanı Ukraynanın taleyi gözləyir.

Pol Kreyq Robertsin bu iddiasını politoloq Zərdüşt Əlizadə Ölkə.az-a şərh edib.

Zərdüşt Əlizadə: "ABŞ-ın özündə də inqilab mümkündür. Müxtəlif amillər üst-üstə düşüb elə bir şərait yarana bilər ki, tamamai ilə fərqli yerlərdə inqilablar baş verə bilər. Qırğızıstanın vəziyyəti ilə yaxşı tanışam, orda iqtisadi böhrandır. Orda insanlar daha çox xırda alverlə məşğuldurlar. Qırğızlar Çindən mal gətirirlər, ordan da yayılır Orta Asiyaya. Qırğısıstanın Gömrük İttifaqına girmək üçün tələbi gömrüksüz imtiyaz idi. Digər ölkələr Qırğızıstanın bu tələbinə qarşı çıxdılar. Uzun müddət danışıqlardan sonra və Qırğızıstandakı siyasi vəziyyəti nəzərə alaraq müqavilə bağlamağa razılıq verdilər. Hal-hazırda ziddiyyətdən, kəskin böhrandan danışmaq olmaz. Hər hansısa dövlət, təşkilat böyük miqdarda pul ayırsa, həmişə vəziyyəti dəyişmək, inqilab etmək olar. Qırğızıstanda Rusiya, Ukrayna, Azərbaycan, Makedoniyada, Ermənistan və Qazaxıstanda olduğu kimi heç vaxt demokratik ənənələr olmayıb. Qırğızıstan iki böyük dövlətin təsiri altındadır, biri Çin, biri isə Rusiyadır. İndiki halda Çinlə Rusiya arasındakı anlaşmalar əsas verir ki, Qırğızıstanda sabitlik olsun. Ona görə də Pol Kreyqin dedikələri inandırıcı deyil.

- Adı çəkilən üç dövlətdə inqilablar baş verərsə, bu Rusiyaya təzyiq vasitəsi ola bilər?

- Dünyada həm geosiyasi, həm də Qırğızıstan, Ermənistan, Makedoniya kimi dövlətlərin hakim zümrələrinin içərisində daxili mübarizələr də gedir. ABŞ kimi Rusiya da geosiyasi oyunlar oynayır. O dövlətlərdə inqilabların olacağı inandırıcı deyil".

Səxavət Məmməd
Ölkə.az