"Keçmiş ərim zorlamaq istədi" dedi, uşağının yanında bıçaqlandı - İstintaq materialı
Hadisə Suraxanı rayonu Qaraçuxur qəsəbəsində baş verib. 35 yaşlı Xosrov Məmmədov keçmiş həyat yoldaşı, 33 yaşlı Əfsanə Məmmədova ilə küçədə mübahisə edib. Mübahisə zamanı o, Ə.Məmmədovanı azyaşlı qızının gözləri qarşısında 17 bıçaq zərbəsi ilə qətlə yetirib.
Hadisədən sonra Xosrov Məmmədov könüllü olaraq polisə təslim olub.
Faktla bağlı rayon prokurorluğunda cinayət işi başlanıb.
“Ölkə.Az”ın istintaq materialından əldə etdiyi məlumata görə, təqsirləndirilən şəxs qismində dindirilən Xosrov Məmmədov ifadəsində bildirib ki, Əfsanə Məmmədova ilə 2003-cü ildə evlənib. Onun evdə hər gün spritli içki qəbul etməsi və həyat yoldaşını döyməsi zəmnində aralarında yaranmış mübahisələrə görə Əfsanə boşanmaq üçün məhkəmə ərizə ilə müraciət edib. Məhkəmənin qərarı ilə nikahlarına xitam verilib və uşaqlara görə Xosrov Məmmədova ayda 300 manat aliment kəsilib. Boşandıqdan bir müddət sonra yenidən Əfsanə ilə barışıb və birlikdə ailə kimi yaşayıblar.
İyul ayında qadın alimentlə bağlı icra şöbəsinə ərizə yazdığına görə münasibətləri daha da pisləşib. Xosrov bildirib ki, onun barəsində belə bir ərizə yazmasını qəbul edə bilməyib və ona görədə qadını döyüb.
Bundan sonra keçmiş yoldaşı uşaqları ilə birlikdə NZS qəsəbəsində əmisinin evinin yaxınlığında kirayə ev tutub yaşayıb.
Sentyabrın 15-i saat 17:00 radələrində o Əfsanənin qaldığı evə özünə məxsus olan televizor və soyuducunu aparmağa gedib. Qadın qapını açmadığına görə hasardan aşaraq həyətə daxil olub. Bu vaxt qadın qorxusundan qışqıraraq qonşuları köməyə çagırıb. Xosrov Əfsanənin belindən tutaraq məişət əşyalarını götürməyə gəldiyini deyib.
Xosrov Məmmədov ifadəsinin davamında bildirib ki, bir neçə gündən sonra Əfsanə rayon prokurorluğuna guya həmin vaxt onu zorlaması ilə bağlı ərizə verib. Bununla bağlı prokurorluğa çağırılan Xosrov izahatında keçmiş arvadını zorlamadığını bildirib.
Əfsanənin barəsində etdiyi şikayət pis təsir etdiyindən onu öldürmək məqsədi ilə mağazadan bıçaq alıb.
Keçmiş həyat yoldaşının hər həftənin 6-cı günləri Qaraçuxur qəsəbəsində bir qadının evinə təmizlik işləri aparmağa getdiyini bildiyindən həmin gün səhər tezdən evdən çıxıb. Həmin evin yaxınlığındakı dayanacaqda Əfsanənin gəlməsini gözləyib. Saat 10 radələrində onun və azyaşlı qızının 81 nömrəli sərnişin avtobusunda olduğunu görüb. Eyni zamanda qadında onu dayanacaqda gördüyünə görə həmin yerdə yox, təxminən 150 metr qabaqda avtobusdan çıxıb ara yollarla həmin evə gediblər.
Xosrov Məmmədov arxalarınca tələsik hərəkət edib və Əfsanənin qolundan tutub saxlayıb. Bıçağı çıxarıb qadının saçından tutaraq qarın və sinə nahiyyələrinə bir neçə zərbə vurub. Əfsanə arxası üstə yerə yıxılan zaman döş qəfəsinə daha bir neçə zərbə endirib. Sonra qadının hərəkətsiz olduğunu görüb bıçağı yanına atıb.
Xosrov Məmmədov əlavə edib ki, Əfsanəni alimentdən yayınmaq məqsədi ilə öldürməyib. Keçmiş həyat yoldaşını ondan prokurorluğa zorlama ilə bağlı etmiş olduğu şikayətə görə qətlə yetirib.
Məhkəmə prosesində Xosrov Məmmədov ittiham üzrə özünü qismən təqsirli bilib.
Məhkəmə hesab edib ki, təqsirlənidirilən şəxsin əməlləri ibtidai istintaq orqanı tərəfindən 120.2.4 (xüsusi amansızlıqla qəsdən adam öldürmə), 120.2.5 (tamah məqsədi ilə qəsdən adam öldürmə), 133.1 (mütəmadi olaraq döymə ilə istirablar vermə) maddələri ilə düzgün ixtisaslaşdırılıb.
Sonda məhkəmənin hökmü ilə Xosrov Məmmədov 17 il müddətinə azadflıqdan məhrum edilib.
Ölkə.Az
