Tamadalıq edən məşhurlar

Heç kimə sirr deyil ki, bu gün Azərbaycan səhnəsində hər on nəfərdən doqquzu toya gedir. Kimi müğənni, kimi tamada, kimi sadəcə aparıcı kimi. Bu dəfə tamada-aparıcı qismində toy məclislərində iştirak edən tanınmışlarımızdan danışacağıq. Beləliklə, Ölkə.Az toylarda aparıcılıq-tamadalıq edən tanınmışlarımız barədə yazını təqdim edir.

"Bozbash pictures"in Şəmisi, teleaparıcı İlkin Həsəni xeyli müddətdir həm də toy məclislərini idarə edir. Aparıcı daha çox elitar məclislərə dəvət alır.

Şoumen Murad Dadaşov toy məclislərində nadir hallarda aparıcı qismində iştirak edir. Bu isə adətən ya vəzifə sahiblərinin övladlarının, ya da məşhurların toyu olur.

"Lider" telekanalında yayımlanan "Solo" verilişinin aparıcısı, müğənni-aparıcı Murad Arif də toy aparıcısı olan tanınmışlarımızdandır.

"Sevimli şou"nun aparıcısı Mikayıl Güləddinoğlu daha çox bölgələrimizdəki və Rusiyadakı azərbaycanlıların xeyir işlərində tamadalıq edir. Onun "Mən anamı sevgilimə dəyişmərəm" şeiri sosial şəbəkələrdə kinayə obyekti olsa da, qeyd olunan məclislərdə xüsusi coşquyla qarşılanır.

Xalq artisti Arif Quliyevin, əməkdar artist Ələkbər Əliyevin də qazancının bir qismi tamadalıqdan formalaşır.

Tanınmış aktyor Allahverdi Yolçuyev də 30 ildən artıqdır ki, həm də tamada kimi məclislərə gedir.

Əməkdar artist, qiraətçi Ağalar Bayramov da dolanışıq üçün toyu seçənlərdəndir.

Toy aparıcıları arasında tanınmış xanımlar da var. Aktrisa Xuraman Əlizadə, teleaparıcı Könül Yusifqızı, Lətafət Ələkbərova, aktrisa Fidan Axundova, teleaparıcı Nərgiz Cəlilovanın dolanışığının bir qismi toylardan çıxır.

Yumor hissi ilə fərqlənən teleaparıcı Nəsib Nur, aktyorlar Fərda Xudaverdiyev, Elməddin Cəfərov, teleaparıcılar Elgiz Əkbər və Zaur Kamal da toy aparıcısı kimi təcrübəyə sahibdirlər.

Müğənni Elxan Qaraxanoğlu isə öz ansamblı ilə iştirk etdiyi məclislərdə tamadadan imtina edərək, aparıcılıq misisyasını üzərinə götürür.

Aktyor Elnur Kərimov teleaparıcılıqla yanaşı, tamada kimi də təcrübəyə malikdir.

Şoumen Kamran Həsənli isə azərbaycanlı məşhurlar arasında ən çox toy təcrübəsi olanlardandır.

Əməkdar artistlər Çingiz Əhmədov və Rəhman Rəhmanov da uzun müddətdir toy məclislərini idarə edirlər.

İntiqam VALEHOĞLU
Ölkə.az