Daçiç: Münaqişənin yeganə həlli sülhdən keçir

Münaqişənin yeganə həlli sülhdən keçir.

Bunu ATӘT-in fəaliyyətdə olan sədri, Serbiyanın xarici işlər naziri İvitsa Daçiç xarici işlər naziri Elmar Məmmədyarovla görüşdən sonra keçirilən mətbuat konfransında deyib.

Onun sözlərinə görə, Dağlıq Qarabağ münaqişəsinin həllində bütün tərəflərin siyasi iradəsinə ehtiyac var.

“Serbiya özü münaqişəyə görə çox əziyyət çəkib və Dağlıq Qarabağ münaqişəsinin ağır nəticələrini çox yaxşı başa düşür. Bura Avropanın sabitliyi üçün əhəmiyyətli regiondur. Münaqişənin yeganə həlli sülhdən keçir. Bütün tərəflərin siyasi iradəsinə ehtiyac var. Bununla bağlı xoş niyyətimi bildirmişəm”, - nazir deyib.

İvitsa Daçiç bildirib ki, siyasi iradə olacağı təqdirdə, həll mümkündür.

“Minsk qrupu ölkələrinin də xüsusi öhdəliyinə və buna sadiqliyinə ehtiyac var. Onlar atəşkəs haqqında sazişdən irəli gələn tələblərin tam icrasına nail olmalıdırlar.

Serbiya müharibənin nəticələrinin aradan qaldırılması məsələlərində zəngin təcrübəyə malikdir. Serbiya münaqişənin nizamlanmasında vasitəçi olmaq və gələcək məsələlərin həll edilməsi üçün hər cür səy göstərəcək”.

İvitsa Daçiçin sözlərinə görə, erməni həmkarı ilə görüşdə bir sıra təşəbbüslər irəli sürəcək.

“Hesab edirəm ki, Helsinki Yekun Aktının müddəalarına əməl etməli, ikili standartların aradan qaldırılmasına təkan verməliyik”, - o deyib.oxu.az

Ölkə.Az