Avropa Oyunlarında qalib gələcək Moldova idmançılarına nə qədər mükafat veriləcək?

Bakıda keçiriləcək Birinci Avropa Oyunlarında ilk yerləri tutmuş moldovalı idmançılar 120 min leydən 200 min leyədək (6,5 min dollardan 11 min dollaradək) mükafat alacaqlar.

Hökumətin qərarı ilə, qarşıdakı yarışlarda nailiyyətlərə görə təkcə idmançılar yox, həm də onların məşqçiləri və həkimləri də mükafatlandırılacaqlar, Oxu.Az İnfoMarket-ə istinadən xəbər verir.

Mükafatların verilməsi üçün vəsait Gənclər və idman nazirliyinin büdcəsindən ayrılıb.

Qızıl medalların sahiblərinə 200 min ley (11 min dollar), gümüş 160 min ley (8,7 min dollar), bürünc medal qazananlara isə 120 min ley (6,5 min dollar) mükafat veriləcək.

İlk Avropa Oyunları iyunun 12-dən 28-dək Azərbaycanın paytaxtı Bakıda keçiriləcək. Oyunlarda Avropanın 50 ölkəsindən 6 mindən çox idmançı iştirak edəcək.

Qeyd edək ki, Moldova bu nüfuzlu yarışa 90 idmançı göndərəcək, bu, Moldovanın olimpiya yarışlarında iştirakı tarixində ən böyük nümayəndə heyəti olacaq.

Ölkə.Az