"Bu koalisiya Türkiyəni qarşıdıra bilər"

"Ya hansısa formada Türkiyədə koalisyon hökümət qurulmalıdı, ya da növbədənkənar parlament seçkiləri keçirilməlidir".

Bu fikirləri Ölkə.az-a Atlas Araşdırmalar Mərkəzinin rəhbəri, politoloq Elxan Şahinoğlu Türkiyədə keçirilən parlament seçkilərinin yekunlarından danışarkən deyib. Onun sözlərinə görə, AKP üç partiyadan biri ilə koalisiya qurmalıdır:

"AKP-nin CHP ilə koalisiya qurması problemlidir. Digər iki partiya ilə koalisiya qura bilər. Ya MHP ilə, ya da HDP ilə. MHP artıq açıqlama verdi ki, belə bir koalisiyada iştirak etməyəcək. HDP-dən də sanki belə açıqlamalar var. Bu o deməkdir ki, koalisiya qurulması da çox çətin bir prosesə çevriləcək. Danışıqlar heç bir nəticə verməsə növbədənkənar seçkilərin keçirilməsi ehtimalı getdikcə artacaq".

E.Şahinoğlunun fikrincə AKP-nin HDP ilə koalisiya qurması Türkiyə üçün böyük təlatümlər vəd edir:

"Düşünürəm ki, indiki halda ən münasib variant AKP-nin MHP ilə kolalisiya qurması olardı. Çünki AKP-nin HDP ilə koalisiya qurması bu radikal kürdlərin istəklərinin yerinə yetirilməsidir. MHP də buna isti yanaşmaz. Dövlət Bahçeli deyib ki, koalisiyada yoxdurlar. Bəlkə də dövlət və millət naminə bu addımı ata bilərlər. İndiki vəziyyətdə ən real variant AKP-MHP koalisiyasının qurulmasıdır. İkisi də saf partiyadır. AKP-nin özündə də millətçilik xətti var. Bu baxımdan danışıqlarda muəyyən uğurlar əldə oluna bilər. AKP HDP ilə koalisiya qursa, bu Türkiyə üçün daha çox təlatümlər vəd edir. HDP-nin kürdlərlə bağlı ciddi tələblər ortaya qoyması qaçılmazdır. Onlar Abdulla Ozalanın azadlığa buraxılması kimi məsələləri gündəmə gətirə bilərlər ki, bu da Türkyəni qarışdırar".

Həsən ELBRUSOĞLU
Ölkə.az