Vüqar Nadirov "Qarabağ"dan pula görə ayrılıb?

Futbol üzrə milli komandamızın üzvü Vüqar Nadirovun uzun illərdir çıxış etdiyi "Qarabağ"dan ayrılmasının bəzi səbəbləri məlum olub.

Ölkə.Az-ın ələ etdiyi məlumata görə, futbolçu ona təklif olunan yeni müqavilədə göstərilən əməkhaqqı ilə razılaşmayıb. Nadirovun Ağdam təmsilçisindən uzaqlaşmasının digər səbəbi kimi son 2-3 ildə əsas heyətə düşə bilməməsi göstərilir. Bu arada qeyd edək ki, Qurban Qurbanov son iki ildə Vüqarın çıxış etdiyi mövqedə Leroy Corca etibar edirdi. Millinin üzvü isə ən yaxşı halda 20-25 dəqiqə oynamaq şansı qazanırdı. Futbolçu özü isə qol.az-a açıqlamasında bu barədə danışmaq istəməyib:

"Hələ ki bu haqda danışmaq istəmirəm. Qismət belə imiş. Getməliydim".

Qeyd edək ki. 28 yaşlı Nadirov "Qarabağ"ın ona təklif etdiyi yeni müqavilədən imtina edərək, klubu azad agent statusu ilə tərk edib.

İntiqam VALEHOĞLU

Ölkə.Az