Deputat: “Ermənistanın Zəngəzur dəhlizini açmaqdan başqa alternativi yoxdur”
“Ermənistan anlamalıdır ki, onların Zəngəzur dəhlizinin açmasından başqa alternativi yoxdur. Paşinyan və Ermənistandakı bütün siyasi qüvvələri, o cümlədən revanşist qüvvələr, erməni lobbisi anlamalıdır ki, Azərbaycan tərəfi Zəngəzur dəhlizi ilə bağlı şərt irəli sürübsə, bu şərt gec və tez həllini tapacaq. Zəngəzur dəhlizi açılacaq”.
Bunu “Ölkə.Az”a açıalamasında deputat Məlahət İbrahimqızı deyib.
Onun sözlərinə görə, Zəngəzur dəhlizinin açılması ilə bağlı Ermənistanın sərgilədiyi destruktiv mövqe sadəcə vaxt itkisidir və bu vaxt itkisi daha çox ermənilərin ziyanına işləyir. “44 günlük Vətən müharibəsindən sonra erməni cəmiyyətində yaranan ciddi psixoloji durumla yanaşı, çox ağır vəziyyətdə olan sosial-iqtisadi böhran günbəgün dərinləşməkdədir.
30 illik işğalçılıq siyasəti nəticəsində sosial-iqtisadi vəziyyəti rəzil günə düşən Ermənistan vəziyyətdən yeganə çıxış yolu kimi vaxt itirmədən Azərbaycan və Türkiyə ilə əlaqələrini normallaşdırmalı və kommunikasiya əlaqələrini açmalıdır. Bunun üçünsə ilk olaraq Azərbaycanın irəli sürdüyü Zəngəzur dəhlizinin açılması, sülh sazişinin imzalaması və sərhədlərin delimitasiyası prosesini sürətləndirməlidir. Yaranmış durum Ermənistanın gələcəyi baxımından bir fürsətdir və bundan faydalanmalıdır. Bunun əksi Ermənistanı qarşısıalınmaz faciəyə sürükləyə bilər ki, o zaman hər şey gec olar”- deputat qeyd edib.
Deputat əlavə edib ki, cənab Prezidentin dediyi kimi, Ermənistan Zəngəzur dəhlizini açmağa məcburdur: “Bu könüllü, ya da zorla olsun. Bu dəhliz açılacaq. Çünki cənab Prezident Qubaya səfəri zamanı məsələyə toxunaraq bunları dedi: “Demişdim bizə tarix versinlər torpaqlarımızdan nə vaxt çıxır, o an biz dayanmağa hazırıq. Bu gün də eyni sözü deyirəm. Amma deyirəm ki, bizə tarix versinlər, Zəngəzur dəhlizi nə vaxt açılacaq və belə olan halda, heç bir problem olmayacaq. Ona görə hesab edirəm ki, həm Ermənistan rəhbərliyi, həm Ermənistan ictimaiyyəti, əhalisi bunu başa düşməlidir. Biz istədiyimizə nail olmuşuq, oluruq və olacağıq”. Bu bir daha Azərbaycan Prezidentinin qətiyyətinin göstəricisidir. Əgər cənab Prezident bəyan edibsə, bu, məsələ həllini tapacaq. Lakin Ermənistan tərəfində revanşist və onlara havadarlıq edən xarici qüvvələr buna mane olmaq istəyir. Onların bu cəhdləri nəticə verməyəcək. Tamamilə açıq aydın görünür ki, Paşinyan revanşist qüvvələrin, eləcə də erməni diasporunun təzyiqi altındadır. Çünki Paşinyanın ötən dövr ərzindəki çıxışlarına diqqət etsək bunun şahidi olarıq. Digər tərəfdən isə Paşinyan Zəngəzur dəhlizinin açılması ilə bağlı öhdəlik götürübdür və buna əməl etməlidir.
Erməni diasporu da onları dəstəkləyən qüvvələr də çox gözəl bilir ki, Möhtərəm Ptezidentimizin dəmir yumruğu nəyə qadirdir. Bir daha qeyd edirəm ki, könüllü və ya məcburi qaydada Zəngəzur dəhliz istifadəyə veriləcək”.
Mürtəza
Ölkə.Az