\"Kitabi-Dədə Qorqud\"un alman dilinə tərcümə edilməsindən 200 il keçir

"Kitabi-Dədə Qorqud"un alman dilinə tərcüməsinin 200 illiyi münasibəti ilə Zaqatalada silsilə tədbirlərə başlanılıb

“Kitabi-Dədə Qorqud”un alman dilində ilk tərcüməsi və nəşrinin 200 illiyinin qeyd edilməsi haqqında Azərbaycan Prezidentinin 20 fevral 2015-ci il tarixli Sərəncamının icrası ilə bağlı dövlət müşaviri, akademik Kamal Abdullayevin təşəbbüsü ilə Zaqatala rayonunun Əliabad qəsəbəsindəsilsilə tədbirlərə başlanıb.

Bilik Fondundan APA-ya verilən məlumata görə, Millətlərarası, multikulturalizm və dini məsələlər üzrə dövlət müşavirliyi xidmətinin, Bilik Fondunun, Multikulturalizm Mərkəzinin, AMEA-nın alimlərinin, KİV təmsilçilərinin iştirakı ilə keçirilən tədbirlərə Zaqatala, Qəbələ, İsmayıllı, Qax, Balakən və Bakı məktəbliləri də qatılıb.
İki gün ərzində tədbir iştirakçıları Zaqatalanın Əliabad qəsəbəsində ümummilli lider Heydər Əliyevin abidəsini ziyarət edəcək, Əliabad məscidinin bərpası ilə tanış olacaq, “Azərbaycanda dövlət-din münasibətləri” mövzusunda müzakirələr aparacaq, qəsəbə sakinlərinin iştirakı ilə “Qafqaz Albaniyası və onun hazırkı varisləri” mövzusunda konfrans keçiriləcək.

Bilik Fondunun “Qardaşlaşmış məktəblər” layihəsinə əsasən, tədbirə qatılan məktəblilər arasında Qardaşlaşma Sazişi imzalanacaq. Məktəblilər Avropa Oyunlarına dəstək olaraq voleybol yarışı keçirəcəklər.

İyunun 21-də Zaqatala şəhər Heydər Əliyev Mərkəzində “ “Kitabi-Dədə Qorqud”un Zaqatala bölgəsində izləri” mövzusunda dəyirmi masa keçiriləcək.

Ölkə.az