Almaz Ələsgərova: "Həkimim mənə altı ay vaxt qoyub"
Tanınmış müğənni, əməkdar artist Almaz Ələsgərova bu günlərdə ağır əməliyyat keçirib.
Sənətçi əməliyyatdan sonra ilk müsahibəsini Ölkə.Az-a verib. Həm səhhətindən danışıb, həm qızlarından, həm də yaradıcılığından.
- Almaz xanım, eşitdim əməliyyat olunmusunuz...
- Bəli, bir ay əvvəl öd kisəmdən əməliyyat olunmuşam.
- İndi səhhətiniz necədir?
- Yaxşıyam, tikişlərim sağalıb.
- Tədbirlərə, məclislərə gedirsiniz?
- Hələ ki getmirəm. Amma efirə arabir gedirəm.
- Əvvəldən səhhətinizdə problem var idi?
- Bəli, ödlə bağlı sancılarım olurdu.
-Yəqin ki yaradıcılığa da fasilə vermisiniz...
-Əlbəttə, ağır əməliyyat olduğuna görə səfərlərimi təxirə salmışam. İndi yavaş-yavaş başlayıram.
- İstirahət etmək planınız varmı?
-Hələ işlərim var, mahnılar yazdırıram. Ona görə də istirahət etməyə vaxtım yoxdur.
-Hansı bəstəkarlarla işləyirsiniz?
-Köhnə mahılarımı yeni aranjimanda oxuyuram.
-Hansı mahılardı?
-Hikmət Mirməmmədlinin bir bəstəsi, Sədaqət Rəşidqızının "Sevirəm söylə" və "Mən sənsiz də xoşbəxtəm" mahıları...
- "Qadasın mən alım"ı da aranjiman etdirirsiniz?
-Yox, ona əl vurmayacağam. Çünki klipi də, aranjimanı da gözəldir.
- O klip hardasa öz həyatınızı əks etdirirdi.
-Yox, deməzdim ki, elədir.
-Çünki orada tərəf müqabiliniz də sizdən çox böyükdür.
- (gülür) O, tam təsadüfdür. Yeni mahnılarım var. Ötən il dörd-beş yeni mahnı yazdırdım. Onları bu il oxumalıyam. Sonra yeni mahnılar ifa edəcəyəm.
- Həkiminizin sizə tövsiyyələri nə oldu?
- Ancaq pəhriz saxlamalıyam.
- Çətin olmayacaq ki?
-Çox çətindir, çox (gülür) Amma mən bir az çox yeyəndə əziyyət çəkirəm. Ona görə də pəhriz saxlamalıyam, yeməyimə fikir verməliyəm. Ən əsası özümü soyuqdan qorumalıyam.
- Deyirlər ki, insan sağlamlığının qədrini onu itirəndən sonra bilir. Əməliyyatdan sonra bu haqda düşündünüz?
- Öd kisəsi elə şeydir ki, heç kim bilmir içində nə var və nə olacaq. Elə insanlar var ki, ömrü boyu pəhrizdədirlər, amma öd kisələrində o qədər daş var ki. Arıq adam var deyirsən ki sağlamdır, amma elə deyil. Xəstəlik insandan soruşmur ki, bədəninə girim, ya yox?
- (zarafatyana) Tamaşaçılar sizi ətli-qanlı görməyə vərdiş ediblər...
- (gülür) Mən yenə də həmin Almaz olacağam.
- Bəs pəhriz?
- Pəhriz də saxlayacağam. Həkimim mənə altı ay vaxt qoyub. Deyib ki, altı ay özünü qorumalısan. Öz rahatlığıma, sağlamlığıma görə bunu etməliyəm.
- Bu yaxınlarda qızlarınızla fotolarınızı gördüm. Deyəsən İsveçə getmişdiniz...
- Balaca qızım bacısının yanına dincəlmyə getmişdi. Mən də təzə gəlmişdim. Böyük qızım orada təhsil alır.
-Hansı ixtisas üzrə?
- Hələ ki həkimlikdədir. Amma həyatın işini bilmək olmur. Bir də gördün fikrini dəyişdi.
- Bəs birdən isveçli tələbə yoldaşı ilə ailə qurmaq istəsə?
- Etiraz etmərəm.
- Yaxud da başqa bir ölkənin vətəndaşı ilə...
.
- Deyirlər ki, sevginin həddi, hüdudu, ölkəsi yoxdur. Amma çox istərdim ki, ancaq öz vətəndaşımızla ailə qursun. Bu da qismətdir. Mən gələcəyi görmürəm də. Eləsi var ki, deyir heç türklə ailə qurmağına razı olmaram. O qədər elə deyənlər var ki, bir də görürsən övladlarının xoşbəxtliyi naminə razı olurlar.
- Bəs 15 yaş böyük biri ilə ailə qurmaq istəsə?
-Mən bilmirdim ki, həyat yoldaşım məndən 20 yaş böyük olacaq. Amma özümə qismət oldu. Yəni həyat sürprizlərlə doludur. Övladıma xoşdursa, mən ondan da xoşdur. Bilirsən də övlad nə deməkdir. Övladı tərbiyə etmək lazımdır. Amma bədənindən bir hissə olduğuna görə təpinə bilmirsən. Övlad valideynin ən zəif nöqtəsidir. Ona görə balalarıma bir söz deyiləndə əsəbləşirdim. Fikirləşirdim ki, bunların balası yoxdur ki, özgəsinin övladına söz atırlar, təhqir edirlər?
- Bəlkə sizdə nə vaxtsa kiminsə övladına söz demisiniz...
- Heç vaxt. İnsanın özünə deyərəm, övladına demərəm. Çünki övladın təqsiri yoxdur. Heç istəməzdim ki, sənətçilər də şəxsi münasibətlərinə, mübahisələrnə övladlarını qarışdırsınlar. Həmişə belə şeylərin əleyhinə olmuşam. Övladı olmayanlar nə demək istədiyimi başa düşə bilməzlər. Ona görə də ağızlarına gələni yazırlar. Amma bəzən övladı olanlar da yazır. O qalır insanın öz səviyyəsinə və insafına.
İntiqam VALEHOĞLU
Ölkə.az
