Sayt rəhbərinə nazirlikdən vəzifə təklifi gəldi

Ölkə.az-a daxil olan məlumata görə, Bizimxeber.az saytının baş redaktoruna nazirliklərdən birinin mətbuat xidmətinə rəhrəblik etmək təklif olunub.

Məlumatlı mənbə bildirir ki, adıçəkilən saytın baş redaktoru ilə həmin iri nazirliyin rəhbərliyi arasında müzakirələr gedir.

Mənbə bildirir ki, son zamanlar dövlət strukturları ilə medianın arasında yaranmış bəzi anlaşılmazlıqlardan sonra bir sıra iri nazirlik və dövlət komitəsi öz mətbuat xidmətlərini və ictimaiyyətlə əlaqələr departamentlərini yenidən formalaşdırmağa başlayıblar. Yaxın zamanlarda bir çox tanınmış jurnalistin bu xidmətlərə və departamentlərə rəhbərlik edəcəyi gözlənilir. Çünki dövlət strukturlarındakı mətbuat xidmətlərinə mediadan və jurnalistikadan uzaq şəxslərin rəhbərlik etməsinin media ilə bürokratiyanın arasındakı ziddiyətlərin başlıca səbəbi sayılır. Ona görə də nazirlik və komitələr, habelə iri şirkətlər və dövlət konsernləri mətbuat xidmətlərinə rəhbərləri mediadan, peşəkər və tanınmış jurnalistlərin arasından seçmək qərarına gəliblər.

Məlumati dəqiqləşdirmək üçün Bizimxeber.az portalının baş redaktoru Ədil Hüseynli ilə əlaqə saxladıq. Baş redaktor bildirdi ki, dogurdan da belə bir təklif olunub. Təklifin haradan gəldiyini hələlik açıqlamaq istəməyən Ə.Hüseynli qeyd etdi ki, təklifi yüksək dəyərləndirir: "Həmişə demişəm ki, mətbuat xidmətlərinin rəhbərləri jurnalistlərin arasında olan adam olmalidir. Onlarla munasibətləri qurmaq üçün bu vacibdir. Amma təəssüflər olsun ki, hələ də, əksər qurumlarda mətbuat xidmətlərinin rəhbərləri mətbuata uzaq olan insanlardır". Baş redaktor həmçinin bildirdi ki, təklifi qəbul edib-etməyəcəyi haqda hələlik dəqiq qərar verməyib.

Ölkə.az