Tural Abbaslı: \"Müxalifət qocalıb, artıq yeni, gənc simalara ehtiyac var\"

Son günlər ölkəmizin gündəmini "Facebook" müharibəsi zəbt edib

Milli Şuranın sədr Cəmil Həsənli ilə "Yeni Müsavat" qəzeti arasındakı "atışma"lara "Azadlıq" qəzeti qoşuldu. Qarşılıqlı ittihamlar, tənqidlər və təhqirlər bir-birini əvəz etməyə başlayıb. Sosial şəbəkələrdə isə söyüşün biri bir qəpiyə çıxıb.

Müxalif düşərgədəkilər arasında baş verən bu ürəkbulandırıcı söz duelini Müsavat partiyası Gənclər təşkilatının keçmiş sədri Tural Abbaslı Ölkə.az-a şərh edib.

Tural Abbaslı: "Müxalifətdə daxili qarşıdurmalar xoş qarşılanmır. Ona görə ki, eyni hədəflərə, eyni məqsədlərə, eyni məqsədlərə çatmaq niyyətində olduğunu bəyan edən qurumların sosial şəbəklər və yaxud mətbuat vasitəsi ilə bir-birini təhqir etməsi vətəndaşlar qarşısında bizim imicimizi qaldırmır, əksinə imicimizə və mübarizəmizə ləkə gətirir. Bu ittihamların, təhqirlərin cavabı olaraq da insanlar arasında belə bir fikir formalaşır ki, bunlar öz aralarında razılaşa bilmirlər, hakimiyyətə necə gələcəklər?

Bu cür "müharibə"ləri başladanlar, başlatdıqları "müharibə"lərinə ətrafadakı insanları da cəlb edirlər. Nəticəsi isə o olur ki, əsas hədəf unudulur və əsas rəqiblərə özləri çevrilirlər. Müxalifətin Müxalifətlə mübarizə aparması dayandırılmalıdır. Rauf Arifoğlu nə edir, nə yazır bunun digər partiyalara nə aidiyyatı var? Rauf Arifoğlunun atdığı hər hansısa bir adım öz oxucusunu azaldacaq. Digər qurumların, təşkilatların bunu tənqid etməsi, yol göstərməsi, Dədə Qorqudluq etmələrinə ehtiyac yoxdur. Bunu elə "Azadlıq" qəzetinə də aid etmək olar. "Azadlıq" qəzetinin yazdıqları özünə müsbət və mənfi rəy gətirir. Siyasi mübarizə o qədər zəifləyib ki, artıq hakimiyyətə qarşı yox, bəzi siyasi fiqurlar özlərinə qarşı mübarizə ilə gündəmə gəlmək istəyirlər. Bu son olanlar onu göstərir ki, sırf gündəm olsun, adları hardasa hallansın deyə bu addımı atırlar.

Sosial şəbəkələr ümumiyyətlə Azərbaycanda əks-effekt verdi. Sosial şəbəkələr "Ərəb baharı"nda ərəblərin qələbə qazanmasında böyük rol oynadı. Sosial şəbəkələr onların təşkilatlanmasında, fikir mübadiləsi aparmalarında, çevik hərəkət etmələrində böyük rol oynadı. Azərbaycanda bu əks-efekt verdi. Belə ki, dünənə qədər hamı çölə çıxıb öz etirazını edirdisə, ancaq bu gün istənilən hadisəyə evində oturub, çay yanında status yazmaqla öz işini bitmiş hesab edirlər. Sosial şəbəkələr real meydanlarda mübarizə aparanlarla, meydan sözünün "M"-dan xəbəri olmayanları eyni səviyyəyə gətirdi.

Bu proseslərin heç birinin bizim müxalifət olaraq hakimiyyətə gəlməyimizə qulluq etmədiyini nəzərə alaraq faydasız hesab edirəm. Partiyaların, təşkilatların, qəzet və saytların bir-birini təftiş etməsi zamanı keçib. XXI əsrdə insanları oyatmaq, onlara nəyisə örgətməyə çalışmaq lazım deyil, hamı kimin kim olduğun gözəl bilir.

Bu dəqiqə durub "Facebook"da söz savaşı etdiklərinə ayırdıqları vaxtı, parlament seçkilərinə 5 ay vaxt qalıb, gedib namizədlərini müəyyənləşdirsələr daha yaxşı olardı. Real iş budur, yoxsa bir-birilərinin keçmişlərini açıb tökməklə olan-qalan imicərin də yerlə bir edirlər. Bu dəqiqə gedən söz davası siyasi qeybətdən başqa bir şey deyil.

Meydan hərəkatından sonra Azərbaycanın siyasi həyatında barmaqla sayılacaq qədər yeni sima var. Yaş zaman öz işin görür, siyasi simalarımız da yenilənməlidir, yeni qan gəlməlidir. Eyni insanlar 20 ildən artıqdır gah blok yaradırlar, gah rəqib olurlar, gah dost olurlar, gah da düşmən. Bu əslində gəncliyə bir siqnal olmalıdır ki, artıq məsuliyyəti öz üzərimizə götürməyin vaxtıdır".

Səxavət Məmməd
Ölkə.az