Ukraynaya girmək taleyüklü səhv idi: Rusiya uzun müddət \"savaş bataqlığı\"nda tutulacaq

Kreml Rusiya üçün uğurlu hərbi-siyasi platsdarm açıldığını düşünərək, yanlış addım atdı, nəticədə ABŞ və Qərbin qurduğu "fəlakət tələsi"nə düşmüş oldu; "Ölkə.az" musavat.com-a istinadla bildirir ki, böyük ehtimalla Rusiyanı tədricən zəiflətməyə, dünyadan təcrid etməyə, son nəticədə Kremli beynəlxalq şərtlər qarşısında aciz duruma salmağa çalışacaqlar...
Ukrayna dünyanın əsas diqqət mərkəzindədir. Bu ölkənin Rusiyanın hərbi müdaxiləsinə məruz qalması indi hər kəsi narahat edir. Və hazırda bütün dünyada Rusiyaya qarşı sərt etiraz dalğası sürətlə artmaqda davam edir.

Rusiya prezidenti Vladimir Putin hərbi əməliyyatlara başlamazdan öncə Ukraynanı işğal etmək niyyətində olmadıqlarını bəyan etmişdi. O, Ukraynanın Donbas bölgəsində olan separatçıların təhlükəsizliyini təmin etmək qərarı verdiyini bildirmişdi.

Ancaq savaşın başlamasından ötən müddətdə baş verənlər bunun tamamilə əksini göstərir. Belə ki, Rusiya ordusu Ukrayna paytaxtı Kiyevi ələ keçirməyə çalışır. Bu isə Kremlin Ukraynanın bütün ərazisini Rusiya ordusunun nəzarəti altına almağa can atmasından xəbər verir. Və Rusiyanın tamamilə fərqli planların reallaşmasına çalışdığını təsdiqləyir.

ABŞ-ın dövlət katibi öz açıqlamasında Rusiya prezidenti Vladimir Putinin Ukraynaya hərbi müdaxilə ilə keçmiş SSRİ-nin bərpasına can atdığını iddia etmişdi. O, bu iddiasını prezident V.Putinin savaş öncəsi açıqlamasında Rusiyanın vaxtilə keçmiş SSRİ-yə aid olmuş bütün ərazilər üzərində hüquqlarının olduğunu vurğulaması ilə əsaslandırmağa çalışmışdı. Bu baxımdan, Ukrayna savaşının bir çox məsələlər üzrə böyük əhəmiyyət daşıdığını da təsdiqləyir.

Maraqlıdır ki, Kreml nə qədər təkzib etməyə çalışsa da, bəzi əlamətlər Rusiyanın postsovet məkanına aid ölkələr üzərində total nəzarət mexanizmlərini bərpa etməyə çalışdığı ilə bağlı müəyyən şübhələr yaradır. Belə əlamətlər Rusiya siyasi dairələrindən verilən açıqlamaların məzmununda yer alan eyhamlarda sezilir. Hər halda, bu hədəfə dərhal da olmasa, orta perspektivdə çatmaq kimi bir niyyətin ola biləcəyi qətiyyən istisna deyil. Hətta Ukraynaya yeridilən hərbi texnikanın üzərində keçmiş SSRİ-nin dövlət bayraqlarına təsadüf edilməsi də Kremlin strateji hədəfləri sırasında belə planların mövcudluğundan xəbər verir.

Ancaq Ukrayna savaşı Rusiya üçün heç də ümidverici perspektivlər vəd etmir. Düzdür, Rusiyanın bütün Ukrayna ərazisini işğal etməyi bacaracağı o qədər də, böyük şübhə doğurmur. Ancaq bu savaşda Rusiyanın mütləq qələbəsindən danışmaq yəqin ki, o qədər də asan olmayacaq. Və böyük ehtimalla Rusiya bu savaşdan sonra qalibdən daha çox məğlub duruma düşmək təhlükəsi ilə də üzləşə bilər.

Məsələ ondadır ki, Rusiya ordusu hətta paytaxt Kiyevi ələ keçirməyə nail  olsa belə, Ukrayna ərazisinə savaşın hələ uzun müddət davam edəcəyi qətiyyən şübhə doğurmur. Ukraynalıların Rusiya ordusuna müqavimət prosesini davam etdirəcəkləri tamamilə inandırıcı görünür. Bu isə Rusiyanın illərlə "savaş bataqlığı"nda ilişib, qalması ilə də nəticələnə bilər. Halbuki, Rusiyanın buna uzun müddət davam gətirə biləcəyi də müəyyən şübhələr doğurur.

Məsələ ondadır ki, Ukrayna savaşının ilk mərhələsi Rusiya ordusunun zəif tərəflərini açıq şəkildə ortaya çıxartdı. Məlum oldu ki, rus ordusu sürətli hərbi əməliyyatlara o qədər də hazır deyil. Ümumiyyətlə, Rusiya ordusunun döyüş hazırlığının səviyyəsi hazırda ciddi mübahisə mövzusudur. Hərbi texnikanın olduqca köhnə olması, müasir savaş strategiyalarını yerinə yetirmək imkanlarından geri qalması barədə rəylər artıq möhkəmlənməyə başlayıb.

Hazırda hesab olunur ki, Rusiyanın əsas hərbi gücü məhz nüvə silahı üzərində indeksləşib. Yəni, əgər, Rusiyanın nüvə silahı olmasaydı, ABŞ və Qərb Rusiya ilə hərbi münaqişədən qətiyyən çəkinməzdi. Əslində, nüvə faktoru Rusiyanın Ukraynaya hərbi müdaxiləsindən öncə beynəlxalq hərbi-siyasi məkanda qüvvələr nisbətini təyin edən əsas amil rolunda çıxış edirdi.

Böyük ehtimalla Kreml də nüvə silahının Rusiyanı qoruya yeganə həlledici faktor olduğunun fərqindəydi. Ona görə də, hələ savaşdan xeyli öncə Rusiya prezidenti Vladimir Putin "Biz NATO ordusu ilə müharibədə çətinlik çəkə biləcəyimizi anlayırıq. Ancaq Rusiyanın nüvə dövləti olduğunu da bizim rəqiblərimiz anlamalıdırlar" demişdi. Savaşa başlamazdan bir neçə gün öncə isə Rusiya prezidenti nüvə başlığı daşıyan uzaqmənzilli ballistik raketlərin sınaq-təlimlərini izləmişdi. Və bununla da bütün dünyaya Ukrayna savaşına birbaşa müdaxilə həvəsinə düşə biləcək Qərb ölkələrinə xəbərdarlıq mesajı göndərmişdi.

Təbii ki, nüvə faktoru ABŞ və Qərb tərəfindən ciddiyə alınan amildir. Ona görə də, ABŞ və NATO ölkələri Ukraynaya qoşun göndərməyəcəklərini elə əvvəlcədən bəyan etdilər. Yəni, heç bir Qərb ölkəsi bütün dünyanı nüvə silahı ilə təhdid edən Rusiya ilə hərbi münaqişəyə həvəs göstərmədi.

Ancaq bütün bunların Rusiya üçün daha uğurlu hərbi-siyasi platsdarm açdığını düşünməyə də qətiyyən əsas yoxdur. Çünki, əslində, ABŞ və Qərb Rusiyaya "taleyüklü tələ" qurumuş oldu. "Rusiya ilə savaşmayacağıq" mesajı ilə Kremli arxayınlaşdırdılar. Rusiyanın heç nədən çəkinmədən Ukraynaya qoşun yeritməyə cəsarətləndirdilər. Və indi nəticəsi də göz qabağındadır.

Düzdür, ABŞ və Qərb Rusiya ilə savaşmır. Ukraynanı "qurban" kimi seçib, Rusiya qoşunlarının qarşısına veriblər. Özləri isə kənardan Rusiyanın tədricən zəiflədilməsi prosesini inkişaf etdirməyə çalışırlar. Və bu, Rusiya üçün ən ağır günlərin hələ irəlidə olduğunu da göstərir.

Məsələ ondadır ki, Ukrayna ordusu ölkəni müdafiə etmək üçün Rusiya qoşunlarına sərt müqavimət göstərə bilir. ABŞ və Qərb Ukrayna ordusuna müasir silahlar, eləcə də, sursat göndərir. Rəsmi Kiyevə maliyyə dəstəyi verir. Ukrayna ordusunun müqavimət gücü artırılır. Rusiya qoşunlarının təzyiqləri isə zaman ötdükcə zəifləyir, qeyri-nizami xarakter alır.

Digər tərəfdən Rusiya dövlətinə qarşı beynəlxalq müqavimət də intensivləşir. Kreml ardıcıl olaraq, yeni beynəlxalq sanksiya paketləri ilə üzləşdirilir. Rusiyanın maliyyə-iqtisadi itkiləri durmadan artaraq, fantastik məbləğlərə yaxınlaşır. Və bu, yaxın aylarda Rusiyanın daxilində sosial-iqtisadi böhranı daha da dərinləşdirə, Kremlı qarşı etiraz dalğasının baş qaldırmasına yol aça bilər.

Ona görə də, hesab etmək olar ki, Kremlin Ukraynaya qoşun yeritmək qərarı taleyüklü səhv idi. ABŞ və Qərb nəhayət ki, Rusiyanı yeni "savaş bataqlığı"na salmağa nail oldu. Böyük ehtimalla Rusiyanı tədricən zəiflətmək, dünyadan təcrid etmək, son nəticədə Kremli beynəlxalq şərtlər qarşısında aciz duruma salmaq üçün onu uzun müddət bu "savaş bataqlığı"nda tutmağa çalışacaqlar.