Hətəmpaşanın ölümü barədə yeni iddia: "Öldürən şəxs sevgilisi olmayıb, xəstəxanaya da özü gedib"

Bu gün Bakıda baş verən dəhşətli cinayət hadisəsiylə bağlı bəzi detallar məlum olub. Qeyd edək ki, Səbail rayonu ərazisində, Səid Rüstəmov küçəsi 16 ünvanında Siyəzən şəhər sakini, 27 yaşlı Dəmirova Ayla Altay qızının keçmiş sevgilisi tərəfindən bıçaqlandığı barədə xəbər yayılmışdı. Lent.az-ın xəbərində qeyd olunurdu ki, onunla eyni evdə yaşayan rəfiqələri Ayla Dəmirovanın bıçaqlandığını gördükdə ona yardım etmək istəyiblər. Lakin onlar da bədən xəsarətləri alıblar. Ayla Dəmirova xəstəxanaya aparılarkən yolda dünyasını dəyişib. Qətlə yetirilənin yaxınlarının sözlərinə görə, Aylanı Şahlar adlı keçmiş sevgilisi qısqanclıq zəminində qətlə yetirib.

Aylanın rəfiqələrindən biri Ölkə.Az-ın əməkdaşına deyib ki, Dəmirovanı öldürən şəxs əslində onun sevgilisi deyilmiş:

"Bir gedib araşdırın da. Maraqlanın ki kim öldürüb, necə öldürüb. Xəbər oxunsun deyə kim nə gəldi yazır. Aylanı öldürən onun sevgilisi olmayıb. Ayla bıçaqlanandan sonra özü çıxıb oturub taksiyə və xəstəxanaya çatıb. Həkimlər xilas edə bilməyiblər və qanaxmadan ölüb".

Xatırladaq ki, 1988-ci il təvəllüdlü Ayla Dəmirova əvvəllər kişi (Dəmirov Hətəmpaşa) olub və sonradan həm cinsiyyətini, həm də rəsmi qaydada sənədlərini dəyişib.

İntiqam VALEHOĞLU

Ölkə.az