Politoloq: "Bu Rusiyanın nə qədər aciz durumda olduğunu göstərir"

Ermənistandakı hadisələr ölkəni artıq sosial partlayışın astanasına gətirib.

Elektirik enerjisinin qiymətinin qalxması ilə ayağa qalxan xalq artıq Sarkisiyanın istefasını tələb edir. Rusiya isə baş verən bu proseslərdə həmişəki kimi Qərbi ittiham edir.

Ermənistanda baş verənləri politoloq Ərəstun Oruclu Ölkə.az-da dəyərləndirib.

Ərəstun Oruclu: "Hələlik birmənalı fikir söyləmək çox çətindir. Ermənistanda baş verənlərlə bağlı həm Rusiya həm də Qərb versiyasını irəli sürmək olar. Amma əsas görünən budur ki, uzun müddətdir Sarkisiyanla Rusiya arasında bir çox məsələlərə dair fikir ayrılığı var. Yüksək ehtimalla Rusiya bu prosesdə iştirak edir, ancaq eyni zamanda Qərbin iştirakını da istisna etmirəm.

İsənilən dövlətlərdə olan demokratik proseslərin arxasında xalqın iradəsi dayanırsa, Qərb belə proseslərə dəstək verir. Ancaq Ermənistandakı prosesə açıq Qərb dəstəyi görünmür. Qərb rəsmilərinin bu məsələlərlə bağlı bir açıqlaması da yoxdur. Bu məsələ ilə bağlı daha çox Rusiya rəsmiləri danışır. Rusiya rəsmiləri də Qərbi ittiham etməklə məşğuldurlar.

Hadisələrin baş verməsinə səbəb Ermənistanda yaranan duruma əhalinin reaksiysıdır. Bu reaksiya kifayyət qədər miqyaslı bir reaksiyadır. İstisna olunmur ki, bu reaksiya Ermənistanda hakimiyyət dəyişikliyinə qədər gətirib çıxara bilər. Biz artıq ciddi bir qarşıdurmanın şahidi oluruq, son nəticədə bu qarşıdurma Ermənistanda siyasi böhrana səbəb ola bilər. Bunlar prosesin görünən hissəsidir.

Prosesin görünməyən hissəsi ondan ibarətdir ki, bu və ya digər siyasi partiya və qurumların məsələdə iştirakı hələ görünmür. Əgər onlar bu proseslərə qoşulsa idi, onda mülahizələr irəli sürmək olardı. Rusiya rəsmilərinin Qərbi ittiham etməsi qeyri-ciddi səslənir. Ona görə ki, Ermənistan Rusiyanın tam nəzarətində olan bir ölkədir. Hətta o dərəcədə ki, Rusiya rəsmilərinin özü Ermənistanı "forpost" adlandırıblar. Rusiyanın "forpost"u saydığı ölkədə Qərb müəyyən siyasi proseslərə start verə bilirsə və onları dəstəkləyə bilirsə, bu Rusiya siyasətinin nə dərəcədə aciz durumda olduğunu göstərir.

Bizim üçün Ermənistanda olanlardan nəticə çıxarmalı məqam var. Rusiyanı tərəfdaş seçmək nə dərəcədə Azərbycan üçün əlverişlidir? Həqiqətənmi öz "forpost"una belə nəzarət etmək iqtidarında olmayan bir ölkə ilə yaxınlaşmağa dəyər?".

Səxavət Məmməd
Ölkə.az