Həftənin icmalı
Bakıda 12 nəfəri gün vurub
26.06.2015
Onlardan iki nəfəri xəstəxanaya yerləşdirilib.
May ayından bu günə kimi Bakı Şəhər Təcilli və Təxirəsalınmaz Tibbi Yardım Stansiyasına günvurma ilə bağlı 12 nəfər müraciət edib. Onlardan iki nəfəri xəstəxanaya yerləşdirilib.
Ölkə.Az xəbər verir ki, bunu APA-ya açıqlamasında Bakı Şəhər Təcilli və Təxirəsalınmaz Tibbi Yardım Stansiyasının baş həkimi Rauf Nağıyev deyib.
R. Nağıyev bildirib ki, havanın hərarətinin qalxdığı son iki gün ərzində günvurma ilə bağlı cəmi iki nəfər müraciət edib: “Onlarda da yüngül hallar idi. Həmin şəxslərə ilkin tibbi yardım göstərilib”.
Baş həkim qeyd edib ki, günvurma ilə bağlı müraciət edənlər əsasən orta yaşlı insanlardır.
Növbədə olan müharibə əlilləri və şəhid ailələri mənzillə təmin olunacaq
26.06.2015
Hazırda respublikanın demək olar ki, bütün bölgələrində müharibə əlilləri və şəhid ailələri üçün mənzillər tikilir.
Bu sözləri Əmək və Əhalinin Sosial Müdafiəsi naziri Səlim Müslümov bildirib.
Onun sözlərinə görə, yaxın illərdə 2014-cü ilədək bütün növbədə olan müharibə əlilləri və şəhid ailələrinin mənzillə təminatı həyata keçiriləcək.
Bakıda 96 mənzilli, İmişli, Beyləqan rayonlarında hər biri 54 mənzilli, Şamaxı rayonunda 36 mənzilli yaşayış binaları inşa olunur. Bununla bərabər, Bakıda, Sumqayıtda, Gəncədə, Mingəçevirdə istismara hazır binalardan alınmış mənzillər təmir edildikdən sonra qeyd olunan təbəqələrə aid şəxslərin istifadəsinə veriləcəkdir.
Silahlı Qüvvələrimizin 97 yaşı tamam olur
26.06.2015
Bu gün Azərbaycan Silahlı Qüvvələrinin yaranmasından 97 il ötür. Geostrateji mövqeyinə görə, böyük dövlətlərin maraqlarının kəsişdiyi ölkə olan Azərbaycanda Demokratik Respublikanın yarandığı gündən, dövlətçiliyin mühüm atributu sayılan nizami ordu quruculuğu istiqamətində addımlar atıldı.
1918-ci il mayın 28-də qəbul edilmiş “İstiqlal bəyannaməsi”ndə qeyd edilirdi ki, Azərbaycan özünü xarici müdaxilələrdən müdafiə etmək, daxili düşmən qüvvələrini zərərsizləşdirmək üçün nizami orduya malik olmalı, özünün silahlı qüvvələrini yaratmalıdır. Çünki müstəqil ordusu olmayan dövlətin milli dövlətçiliyi həmişə yadellilərin təhlükəsi altında yaşamağa məhkumdur.
Beləliklə, bir ay sonra-26 iyun 1918-ci ildə Gəncədə fəaliyyət göstərən Milli Şura Azərbaycan Milli Ordusunun yaranması haqqında qərar qəbul etdi. 25 min nəfərlik ordu yaratmaq vəzifəsi irəli sürüldü. Dövlət büdcəsinin 24 faizi hərbi məqsədlərə sərf edildi. Avqustun 1-də isə Hərbi Nazirlik təsis olundu. Azərbaycanın ilk müdafiə naziri Xosrov bəy Sultanov olub. Sonra onu hərbi nazir postunda general Səməd bəy Mehmandarov əvəzləyib. General-leytenant Əlağa Şıxlinski isə nazir müavini təyin edilib. Azərbaycanda ilk hərbi parad da bir il sonra-1919-cu ildə Bakıda indiki Muzey mərkəzinin yerləşdiyi ərazidə keçirilib. Qısa müddətdə Milli Ordu Osmanlı dövlətinin Qafqaz İslam Ordusu ilə birlikdə Bakını və ətraf qəzaları erməni-bolşevik işğalından xilas etdi. Azərbaycan ordusunun Hüseynxan Naxçıvanski, İbrahim ağa Usubov, Həmid Qaytabaşı, Kazım Qacar, Cavad bəy Şıxlinski, Həbibbəy Səlimov kimi generalları, gənc yaşlarından əsgər getmiş hərbi piyada məktəbini bitirmiş Azərbaycan diviziyasının zabiti Əbdürrəhman Fətəlibəyli Düdənginski kimi bacarıqlı hərbçiləri olub.
Deputat: Azərbaycanda homoseksual vəzifəlilər var
25.06.2015
Homoseksuallıq və cinsiyyət dəyişdirilməsi Azərbaycanda bəzi vəzifəli, zəngin insanların stimullaşdırdığı bir fəaliyyətdir.
Ölkə.Az xəbər verir ki, bunu Azvision.az-a açıqlamasında Milli Məclisin deputatı Fazil Mustafa deyib.
Deputat son günlər cinsiyyət dəyişdirilməsi halları ilə bağlı mətbuatda yayılan xəbərlərə münasibət bildirərək qeyd edib ki, homoseksuallıq bir xəstəlikdir.
İlham Əliyev Latviyanın keçmiş prezidentini qəbul etdi
25.06.2015 16:36 Bölmə: Ölkə Oxunma sayı: 41
Azərbaycan prezidenti İlham Əliyev iyunun 25-də Latviya Respublikasının keçmiş Prezidenti, Nizami Gəncəvi Beynəlxalq Mərkəzinin həmsədri xanım Vayra Vike-Freyberqanı qəbul edib.
Ölkə.Az AZƏRTAC-a istinadla xəbər verir ki, dövlətimizin başçısı Nizami Gəncəvi Beynəlxalq Mərkəzinin həmsədri kimi göstərdiyi fəaliyyəti ilə bağlı Latviyanın keçmiş Prezidenti Vayra Vike-Freyberqayanın Azərbaycanın yüksək dövlət mükafatlarından olan “Dostluq” ordeninə layiq görüldüyünü dedi və ordeni ona təqdim etdi.
Latviyanın keçmiş Prezidenti xanım Vayra Vike-Freyberqa Azərbaycanın yüksək dövlət mükafatlarından olan “Dostluq” ordeninə layiq görülməsinə görə minnətdarlığını bildirdi və bundan şərəf hissi keçirdiyini vurğuladı.
İtkin düşmüş hərbi qulluqçuların meyitləri aşkar olundu
25.06.2015
İyunun 23-də Azərbaycan-Ermənistan dövlət sərhədinin Qazax rayonu sahəsində qoşunların təmas xəttində, dağ-meşə şəraitində yolu azan müddətdən artıq həqiqi hərbi xidmət hərbi qulluqçuları kiçik çavuş Musayev Musa Sabir oğlu və kiçik çavuş Yolçuyev Tural Sahib oğlunun axtarışları Beynəlxalq Qızıl Xaç Komitəsinin vasitəçiliyi ilə həyata keçirilib.
Oxu.Az Müdafiə Nazirliyinin məlumatına istinadla xəbər verir ki, iyunun 25-də hərbi qulluqçuların meyitləri qarşı tərəfdə minalanmış sahədə aşkar edilib. Görülən tədbirlər nəticəsində cəsədlər ərazidən çıxarılıb və aidiyyəti üzrə təhvil verilib.
Azərbaycanda hərbi hissələr xüsusi rejimə keçdi
25.06.2015
Ölkədə havanın temperaturunun yüksəlməsi ilə əlaqədar Silahlı Qüvvələrin şəxsi heyəti arasında istilik və günvurma hallarının qarşısının alınması məqsədilə müdafiə naziri, general-polkovnik Zakir Həsənovun göstərişinə əsasən hərbi hissə və birləşmələrdə xüsusi rejimin tətbiq olunmasına başlanılıb.
Ölkə.Az xəbər verir ki, APA-nın sorğusuna cavab olaraq Müdafiə Nazirliyinin mətbuat xidmətindən verilən məlumata görə, havanın hərarətinin yüksək olduğu günlərdə şəxsi heyətin istilik və günvurmadan qorumaq üçün döyüş hazırlığı məşğələləri müəyyən olunmuş saatlarda keçirilir.
Zakir Həsənov: Düşmənin kəşfiyyat-təxribat qruplarının qarşısı vaxtında alınır
25.06.2015
Azərbaycan Ordusunun peşəkarlığı, döyüş qabiliyyəti artır, Azərbaycan əsgər, gizir və zabitləri Vətənə ləyaqətlə xidmət edirlər, öz Vətəninə sadiqdirlər.
Ölkə.Az Müdafiə Nazirliyinin məlumatına istinadla xəbər verir ki, bu barədə müdafiə naziri general-polkovnik Zakir Həsənovun 26 İyun - Silahlı Qüvvələr Günü münasibətilə Silahlı Qüvvələrin şəxsi heyətinə təbrikində deyilir.
Azərbaycanda 11 mindən çox işsiz işlə təmin olundu
24.06.2015
2015-ci ilin yanvar-may ayları ərzində Əmək və Əhalinin Sosial Müdafiəsi Nazirliyi yanında Dövlət Məşğulluq Xidməti (DMX) 11 114 nəfər işsiz və işaxtaran vətəndaşı münasib işlərlə təmin edib.
Bu barədə nazirlikdən bildirilib.
Xidmətin Bakı, Sumqayıt, Naxçıvan, Gəncə və Mingəçevir şəhərlərindəki Əmək birjaları tərəfindən əhalidən və ayrı-ayrı iş adamlarından müxtəlif peşə və ixtisaslar üzrə müvəqqəti xarakterli işlərə olan tələbatlar barədə sifarişlər qəbul edilərək, belə işlərdə çalışmaq istəyən şəxslərə təklif olunur.
Cari ilin beş ayı ərzində həmin birjalar tərəfindən 1477 nəfər şəxs sifarişlər əsasında müvəqqəti xarakterli işlərə göndərilib.
Şamaxı Rəsədxanasının direktoru işdən çıxarıldı
24.06.2015
AMEA Rəyasət Heyətinin bu gün keçirilən iclasında akademiyanın strukturunda bəzi kadr dəyişiklikləri müzakirə olunub.
Ölkə.Az Report-a istinadən xəbər verir ki, dəyişikliyə əsasən AMEA-nın müxbir üzvü Əyyub Quliyev akademiyanın Nəsirəddin Tusi adına Şamaxı Astrofizika Rəsədxanasının direktoru vəzifəsindən azad edilib.
Qərara əsasən, AMEA-nın müxbir üzvü Namiq Cəlilov Rəsədxananın direktor vəzifəsini icra edən təyin olunub.
Ali məktəbə qəbul imtahanında fənnlərin sayı azalacaq
24.06.2015
Tələbə Qəbulu üzrə Dövlət Komissiyasının (TQDK) kollegiyasının növbəti iclası keçirilib.
Ölkə.Az TQDK-nın saytına istinadən xəbər verir ki, iclasda 2014/2015-ci tədris ili üzrə keçirilən buraxılış imtahanlarının nəticələri müzakirə edilib. Bundan əlavə, 2016-cı ildən etibarən tətbiq edilməsi planlaşdırılan ali və orta ixtisas təhsili müəssisələrinə tələbə qəbulu modeli geniş müzakirə olunub.
2016-cı ildən etibarən abituriyentlərə buraxılış imtahanının nəticələrinə əsasən ali təhsil müəssisələrinin bir sıra xüsusi qabiliyyət tələb edən ixtisasları və orta ixtisas təhsili müəssisələrinin ixtisasları üzrə müsabiqədə həm imtahan verdikləri ildə, həm də növbəti ildə iştirak etmək imkanının verilməsi nəzərdə tutulur.
Zakir Həsənov: Düşməni darmadağın etməyə hazırıq
24.06.2015
Ordumuzun döyüş hazırlığı səviyyəsinin daha da yüksəldilməsi, şəxsi heyətin müasir silah və texnikadan məharətlə istifadə bacarığına yiyələnməsi üçün döyüş şəraitinə uyğun təlimlərə diqqət artırılır.
Bunu 26 iyun Azərbaycan Silahlı Qüvvələrinin yaradılmasının 97-ci ildönümü münasibətilə bağlı bəyanatında müdafiə naziri Zakir Həsənov bildirib.
Nazir qeyd edib ki, Ali Baş Komandanın tapşırığı ilə 2015-ci il Silahlı Qüvvələrdə döyüş hazırlığı ili elan olunub
Nazir: Bakı Olimpiya Oyunları 2024-ə namizəd ola bilər
24.06.2015
Azərbaycanın gənclər və idman naziri Azad Rəhimov Bakıda Olimpiya Oyunları 2024-ün keçirilməsinə müraciətin təqdim olunması imkanlarını qiymətləndirib.
“Biz artıq iki dəfə Olimpiadanın Bakıda keçirilməsi hüququ uğrunda mübarizə aparmışıq, lakin bizim 2016 və 2020-ci ilin oyunlarına müraciətlərimiz məğlubiyyətə məruz qalıb. Beynəlxalq Olimpiya Komitəsi (BOK) namizədlərə olduqca sərt tələblər irəli sürür. Əgər həmin tələblər yüngülləşdirilsə, Bakı 2024-cü ilin oyunlarının keçirilməsinə müraciət etmək imkanlarını nəzərdən keçirə bilər. Əks halda, bizə hökumətdən olduqca iri həcmli investisiyalar lazım olacaq.
Məsələn, Bakıda stadion hazırda 68 min tamaşaçı tutur, lakin BOK-un tələbi isə minimum 80 mindir. Bununla belə hamıya Pekinin nümunəsi məlumdur. Orada “Quş yuvası” arenası demək olar ki, istifadə olunmur”, - Azad Rəhimov deyib.
Bu gün Azərbaycanın mərhum prezidenti Əbülfəz Elçibəyin doğum günüdür
24.06.2015
Bu gün Azərbaycanın dövlət, siyasi və ictimai xadimi, dissident, Azərbaycan Xalq Cəbhəsinin lideri və Azərbaycan Respublikasının ikinci prezidenti Əbülfəz Elçibəyin doğum günüdür.
Əbülfəz Qədirqulu oğlu Əliyev (Elçibəy) 24 iyun 1938-ci ildə Naxçıvan MR-nin Ordubad rayonunun Kələki kəndində anadan olub.
7 illik Unuskənd məktəbini bitirdikdən sonra Ordubad şəhər 1 saylı orta məktəbində təhsilini davam etdirib.
1957-ci ildə Bakı Dövlət Universitetinin şərqşünaslıq fakültəsinin ərəb filologiyası şöbəsinə daxil olub. Buranı bitirdikdən sonra (1962) təyinatla SSRİ Hidrolayihə İnstitutunun Bakı şöbəsində tərcüməçi işləyib.
Əbülfəz Elçibəy hələ tələbəlik illərindən sovet rejiminin müstəmləkə siyasətinə qarşı mübarizə aparmış, gizli tələbə dərnəkləri yaratmış və azadlıq ideyalarını geniş şəkildə yaymışdır.
1975-ci ildə həbs edilməsi də onu yolundan döndərə bilməyib. 1988-ci ildə Azərbaycan Xalq Hərəkatı başlayanda məhz Elçibəy onun öndərlərindən biri oldu. O, Hərəkatın təşkilatlanmış forması olan Azərbaycan Xalq Cəbhəsini yaradanlardan (iyul 1989) biri və ömrünün sonunadək onun əvəzedilməz sədri olub.
1992-ci il iyunun 7-də prezident seçilən Əbülfəz Elçibəy bir il sonra Gəncədə başlayan hərbi qiyamdan sonra Bakını tərk edib və 1993-cü il iyunun 17-də doğulduğu Ordubad rayonunun Kələki kəndinə gedib.
İyunun 24-də Milli Məclisin qərarı ilə səlahiyyətlərinə son verilmiş Əbülfəz Elçibəy fəaliyyətini Azərbaycan Xalq Cəbhəsi Partiyasının və Bütöv Azərbaycan Birliyinin sədri kimi davam etdirib.
Uzun sürən ağır xəstəlikdən sonra 2000-ci ilin avqustun 22-də Türkiyənin Ankara Dövlət Xəstəxanasında dünyasını dəyişən Əbülfəz Elçibəyin nəşi Bakıya gətirilərək Fəxri xiyabanda dəfn edilib.
Gürcü keşişi Azərbaycana buraxmadılar
23.06.2015
Gürcüstan Xarici İşlər Nazirliyi Svyatoy Georgi Qax kilsəsinin keşişi Demetre Tetraşvilinin Azərbaycan ərazisinə buraxılmasına etiraz barədə bəyanat yayıb.
“İyun ayının 21-də Azərbaycanın Qax rayonunda yerləşən Svyatoy Georgi kilsəsinin keşişi Demetre (Tetraşvili) Gürcüstandan Azərbaycana qayıdarkən (Laqodexi-Balakən sərhəd keçid məntəqəsi) ona Azərbaycan sərhəd xidməti tərəfindən ölkəyə qayıtmaq üçün icazə verməyiblər.
Gürcüstan səfirliyi operativ şəkildə Azərbaycanın müvafiq orqanları ilə əlaqə saxlayıblar.
Azərbaycan tərəfinin açıqlamasına görə, yerli qanunvericilikdə tənzimlənmə sərtləşdirilib, bu tənzimləməyə əsasən Azərbaycan ərazisində ruhanilər yalnız Azərbaycan vətəndaşı ola bilər.
175 müəllimin iş yeri dəyişdiriləcək
23.06.2015
Dövlət ümumi təhsil müəssisələrində və peşə liseylərində çalışan müəllimlərin iş yerinin dəyişdirilməsi üzrə müsabiqə başa çatıb.
Ölkə.Az Təhsil Nazirliyinin məlumatına istinadla xəbər verir ki, müsabiqədə iştirak etmək üçün elektron ərizəsi təsdiq olunmuş 1308 nəfərdən 907 nəfəri birinci mərhələdə-test imtahanında iştirak edib.
Test imtahanının nəticələrinə əsasən, 197 nəfər seçdiyi vakant yerə iş yerini dəyişmək hüququ əldə edib və müsabiqənin ikinci mərhələsinə - müsahibəyə buraxılıb. Müsahibənin nəticələrinə görə, Təhsil Nazirliyi tərəfindən 175 nəfərin iş yerini dəyişməsinə razılıq verilib. İş yerini dəyişənlərdən 172 nəfəri Azərbaycan, 3 nəfəri rus bölməsində çalışan müəllimlərdir.
Rayon maşınlarına qoyulmuş qadağa Bakıda avtomobil sıxlığını azaldıb
23.06.2015
Avropa Oyunları ərəfəsində şəhər nəqliyyatına tətbiq edilmiş məhdudiyyətlərin bəziləri oyunlardan sonra da tətbiq edilə bilər.
Bunu nəqliyyatın təşkili üzrə ekspert Azər Allahverənov bildirib.
“Məsələn, əyalət avtomobillərinin paytaxta buraxılması üzrə məhdudiyyətləri iyunun 28-dən sonra da tətbiq etmək mümkündür”,- deyə ekspert vurğulayır.
Məntiq aydındır - Avropa Oyunları ilə əlaqədar tətbiq edilən məhdudiyyətlər nəticəsində şəhərdə tıxaclar demək olar ki, sıfıra enib. Həmçinin şəhər havasının ekoloji durumu da xeyli yaxşılaşıb.
Bölgələrdə çəyirtkələrə qarşı mübarizə başladı
23.06.2015
Tovuzda çəyirtkələrə qarşı mübarizə tədbirlərinə başlanılıb.
Məhsul yığımı ərəfəsində taxıl, ot və digər bitkilərə zərər vuran ziyanvericilərdən biri də çəyirtkələrdir. Buna qarşı Tovuzda kimyəvi mübarizə tədbirlərinə başlanılıb.
Ölkə.Az Kəpəz TV-yə (Region TV) xəbər verir ki, rayon ərazisində ümumilikdə 400 hektardan çox sahədə dərmanlama işi aparılıb. Məqsəd zərərvericilərin taxıl və otlaq sahələrinə, həmçinin meyvə bağlarına və digər yaşıllıqlara vura biləcəyi ziyanın qarşısını vaxtında almaqdır. Çəyirtkələrin regiona əsasən Ermənistan və Gürcüstan ərazisindən miqrasiya etdiyi bildirilir. Dərmanlama tədbirləri Tovuz rayon Bitki Mühafizəsi Mərkəzinin və Bitki Karantini Məntəqəsinin əməkdaşları tərəfindən həyata keçirilir.
Azərbaycanlılar Şengen vizası üçün barmaq izləri təqdim edəcəklər
23.06.2015
Yeni qaydalar qüvvəyə mindi.
“Şərq tərəfdaşlığı” proqramına saxil olan altı ölkədə (Ukrayna, Azərbaycan, Ermənistan, Belarus, Gürcüstan, Moldova) iyunun 23-dən etibarən Şengen ölkələri sazişinin yeni Viza informasiya sistemi (VİS) fəaliyyətə başlayacaq.
Ölkə.Az xəbər verir ki, VİS-ə müvafiq olaraq Şengen vizası almaq üçün sənəd verənlər barmaq izləri və rəqəmsal şəkil təqdim etməlidirlər.
Ərizəçilərin biometrik məlumatları VİS-də 59 ay müddətində saxlanılacaq və bu müddət ərzində viza üçün bütün müraciətlər zamanı istifadə ediləcək. Bu müddət bitdikdən sonra ərizəçi yeni biometrik məlumatları təqdim etməlidir.
İlham Əliyev sərəncam imzaladı
22.06.2015
Azərbaycan Prezidenti İlham Əliyev dövlət qulluqçularına "Əməkdar dövlət qulluqçusu" fəxri adının verilməsi haqqında sərəncam imzalayıb.
Sərəncamda deyilir:
“Dövlət qulluğunda səmərəli fəaliyyət göstərən aşağıdakı şəxslərə “Əməkdar dövlət qulluqçusu” fəxri adı verilsin:
Fətəliyev Nail Sadıx oğlu
Kərimov Vasif Əli oğlu
Rəhimov Mail Səməd oğlu
Sarıcalinski Tofiq Qiyas oğlu
Şahbazov Oqtay Qəşəm oğlu
Ali məktəblər təhsil haqlarını artırır
22.06.2015
Mərkəzi Bankın 2015-ci il fevralın 21-dəki qərarı ilə dolların rəsmi kursu 1,05 manat səviyyəsində müəyyən edilib. Nəticədə Azərbaycanda dollar manatdan baha olub, manat isə 34 faiz ucuzlaşıb.
Manatın devalvasiyası bütün sahələrdə artımlarla nəticələnib. Bu, eyni zamanda təhsil sahəsində də özünü göstərir. Bəzi mənbələrin məlumatına görə, manatın kəskin devalvasiyasından sonra Azərbaycanın ali təhsil müəssisələrində ödənişli təhsilin qiyməti də qalxacaq.
Azərbaycanda havanın temperaturu 40 dərəcəyə yaxınlaşdı
22.06.2015
Bakı və Abşeron yarımadasında iyunun 22-də hava şəraitinin dəyişkən buludlu olacağı, əsasən yağmursuz keçəcəyi gözlənilir. Güclü şimal-qərb küləyi əsəcək.
Ölkə.Az Ekologiya və Təbii Sərvətlər Nazirliyinin Milli Hidrometeorologiya Departamentinin məlumatına istinadla xəbər verir ki, havanın temperaturu gecə 20-24, gündüz 30-35 dərəcə isti olacaq.
Abşeron çimərliklərində dəniz suyunun temperaturu Sumqayıt, Novxanı, Pirşağı, Nardaran, Bilgəhdə 22-23, Zaqulba, Buzovna, Mərdəkan, Şüvəlanda 23-24, Türkan, Hövsan, Şıx, Sahildə 24-25 dərəcə isti təşkil edəcək.
Azərbaycanda yeni informasiya saytı fəaliyyətə başladı
22.06.2015
Azərbaycanın internet-media məkanında yeni sayt fəaliyyətə başlayıb.
Milli-Xeber.Az adlı yeni portal keçmiş əməkdaşımız Fatimə İbrahimovanın rəhbərliyi altında fəaliyyət göstərəcək.
Keçmiş əməkdaşımıza işində uğur arzulayırıq.
Ölkə.az
