\"Mən səni çox sehmişəm\"i oxuyandan inanılmaz açıqlamalar: \"Quran\"a əl basaram ki...\"

Son illərdə sosial şəbəkələrin, elektron medianın hətta televiziyaya meydan oxuduğunu desək, yanılmarıq. Məhz sosial şəbəkələr vasitəsilə məşhur olanlar da olub, xalq arasında qazandığı hörməti itirənlər də, sevilənlər də.

Bu günlərdə saytlarda və "Facebook"da "Mən səni çox sehmişəm" kimi yadda qalan bir video yayıldı. Çoxları iddia etdilər ki, həmin mahnını oxuyan müğənni Samir Biləsuvarlı ifa zamanı nalayiq sözlər deyib. Ancaq əslində ortada başqa maraqlı məqamlar var imiş. Məsələnin yetərincə böyük maraq doğurduğunu nəzərə alıb ifaçı ilə görüşdük. Beləliklə, Ölkə.Az-ın suallarını son günlərdə sosial medianın tanınmış simasına çevrilən müğənni Samir Biləsuvarlı cavablandırır.

- Samir, son günlər sosial şəbəkələrin ulduzuna çevrilmisən. İstərdim səni daha yaxşı tanıyaq...

- 1996-cı ildən oxuyuram, 2004-cü ildən isə peşəkar səhnədəyəm.

- Kimin tələbəsi olmusan?

- Biləsuvar rayonunda musiqi məktəbində Manaf Rəhmətovdan dərs almışam. Ondan sonra Əlikram Bayramovla tanışlığımız yaranıb.

- Əlikramdan da dərs almısan?

- Bəli, ondan dərs almışam və oxuduğum yol Əlikram yoludur.

- Sənət aləmində kiminləsə qalmaqalın, söz-söhbətin olub?

- Belə bir şey olmayıb. "Sevimli şou"da aparıcı Mikayıl mənə sual verdi ki, hansı müğənniyə pərəstiş edirsən? Dedim ki, Əlikramdan başqa heç bir oxuyana qulaq asmamışam. Hamısına hörmətim var, amma Əlikramdan başqa heç kimi dinləməmişəm.

- Toyda oxuyan zaman musiqiçilərlə zarafatlaşırsanmı? Məsələn, mahnının sözlərini dəyişmək və sair...

- Xeyr, elə şey olmur. Biz toya çörək qazanmağa gedirik, zarafatlaşmağa yox.

- Mətləbə keçək. "Mən səni çox sehmişəm" videosu haqda danışmağını istərdim. Həmin veriliş nə vaxt çəkilib?

- Veriliş noyabr ayında olub, amma indi ortalığa çıxıb. Əgər mənim ifamda bir problem olsaydı, telekanalın rəhbərliyi, digər məsul işçilər iradlarını bildirərdilər. Mən uşaq deyiləm ki. On ildən artıqdır ki, bütün bölgələrimizdə məclislərdə, toylarda, konsertlərdə olmuşam. Bilirsiniz burada maraqlısı nədir? Səkkiz aydan sonra bu videonun ortalığa çıxması səbəbsiz deyil. Görünür kimsə mənimlə prinsip aparır, gözü götürmür deyə, məni şantaj edir.

- Səncə bunu edən sənət aləmindəndir?

- Mən bir nəfərdən şübhələnirəm. Elə də tanınmış müğənni deyil, adını da çəkmək istəmirəm. Toya düşmüşük, camaat tələb edib ki, Samir oxusun. Bu da elə bildi ki, mən ona oxumağa imkan verməmişəm. Ondan sonra prinsip aparmağa başladı. Özünə zəng vurdum, boynuna almadı. Ancaq yüz faiz bilirəm ki, həmin adamın işidir.

- Videonun yayılmasından necə xəbər tutdun?

- Verilişdən sonra özüm də oturub oxuduğuma qulaq asdım, heç bir problem yox idi. Efirdən bir həftə sonra bu mahnıya beş mindən çox insan baxmışdı. Beş min nəfər görmədi ki, orda nə var, nə yox? Nə oxumuşamsa, düz oxumuşam. "Mən səni çox sehmişəm" oxumuşam, götürüb başqa yerə yozublar.

- Bu, ləhcədir?

- Ləhcə deyəndə ki, orada "k" hərfi də yoxdur. Mən bilirəm siz nə demək istəyirsiniz. Özüm internetdə yayılan variantına qulaq asıb, məəttəl qaldım. Bu, montajdır.

- Müğənnilər adətən toy danışanda beh alırlar. Bu videodan sonra behdən imtina edənlər oldu?

- Allah eləməsin, elə şey olmayıb. Tanıyanlar bilir ki, necə tərbiyəli insanam, hansı ailədən çıxmışam. Heç efirdən kənar o cür sözlərdən istifadə etmirəm. Heç kim deyə bilməz ki, Samir nalayiq sözlər danışıb. Qətiyyən ola bilməz. Getdiyim toyların sahibləri necə insan olduğumu bilirlər. Zəng edənlər də deyirlər ki, o, montajdır.

- Tez-tez "Sevimli şou"da olursan. Başqa verilişlərə dəvət etmirlər, yoxsa özün ən çox o proqrama çıxmaqda maraqlısan?

- Bunu hamı bilir ki. "Sevimli şou" "partlayıcı" verilişdi. İndiyə kimi çox verilişlərə çıxmışam, amma belə reytinq verən olmamışdı. Çünki orada nə cür oxuduğumu göstərə bilirəm.

- Toy qiymətin neçəyədir?

-Toya kiminsə başın kəsməyə getmirik. Bəzən bir ayda üç toyu pulsuz oxumuşam. Bəzən də toy sahibi görüb ki, canla-başla oxuyuram, danışdığımızdan da artıq qonorar ödəyib.

- Orta qiymət nə qədərdir?

- Bizdə razılaşmadır, orta qiymət yoxdur. Qiymət zonalara uyğun dəyişir. Amma hamı bilir ki, elə də baha getməsəm də, gündəlik toyum var.

- Sənət aləmində kimlərlə dostluq edirsən?

- Sənət aləmində çox dostlarım var, amma ən yaxınım Əlikram Bayramovdu.

- Bakı toylarında az-az olursan. Səbəb nədir?

- Bölgələrdə məni çox istəyirlər.

- Bakıda istəmirlər?

- Bakıda "sex" toylardır, gedib yarım saat oxuyub gəlirsən. Amma mənim oktyabrın 14-dək təqvimim tutulub. Əksəriyyəti də bölgə toylarıdır.

- Hər gün toy yormur ki?

- Çörək qazanırıq da, sevib gəldiyim sənətdir. Toy başlayan kimi yorğunçuluq yaddan çıxır.

- Tez tez xəbərlər yayılır ki, filan müğənnini toyda döydülər...

- Məndə heç vaxt belə şey olmayıb. Çox şey müğənninin özündən asılıdır.

- Heç belə halın şahidi olmusan?

- Şahid olmamışam, amma eşitmişəm. Özümə gəlincə, niyə yekəxana dağarlıq (yekəxana) edim ki, mənimlə də pis darvansınlar? Elə camaatın puluyla bu yerə gəlib çıxmışam da.

- Axır vaxtlar Moskva toylarına da gedirsən...

- Moskvaya, Dağıstana, Tomska da çağırılırlar.

-Onda qiymətdə fərq edir?

- Nə qədər zirvəyə qalxsam da, ayağımı dirəyə bilmərəm ki, bu qədər ver, gəlim. Düzdür, musiqiçilərə, yanımda apardığım xanım müğənniyə pul verməliyəm. Amma ayağımı dirəmirəm.

- Klipin var?

- Özüm çəkdirmirəm. Yaxşı mahnılarım da çoxdur. İndi çəkdirsəm, o klipi hara verəcəyəm?

- Yenidən qayıdaq məlum məsələyə...

- Məni sevməyənlərə deyirəm ki, Allah bilsin, özləri bilsin. Bir oxuyanı hamı istəyə bilməz. Sevənlər, tanıyanlar da bilir ki, elə şey ola bilməz, montajdı, məni şantaj edirlər. Elə şey mümkün deyil. Belə şeyi toyda etmərəm, nəinki efirdə. Kim mənə inanmırsa. "Quran"a əl basaram ki, o cür oxumamışam və bu şantajdır.

- Sonda istərdim bir-iki maraqlı toy əhvalatı danışasan...

- Təzəlikcə olmuş hadisədir. Toyun iki saatı gedib, hələ qudalar və əmilər danışıb, dayılara söz çatmayıb, tamada da bir ucdan şeir deyir. Yaşlı adamdır, özü də şairdi. Fikirləşdim ki, neyniyim. Nömrəsini aldım dedim ki, dayı, sənə toy yazdıracam. Sintezator çalana dedim ki, get, o yandan zəng elə, de ki, evin yanır. Bu çıxdı çölə zəng gəldi. Buna zəng gələn kimi musiqini kəsdim. Mikrofonu kitabı atıb qaçdı (gülür). Onda sonra başladıq işimizi görməyə. Sintezator çalan da telefonu söndürdü. Toya musiqiçilər əvvəldən gedir, mən toyun başlamağına az qalmış. Toy başlayan ərəfədə soruşdum ki, tamada var? Dedilər var. Dedim onda gəlib mikrofonu filanı yoxlasın da. Çünki toy başalanda "ras, ras" deyib yoxlamağını istəmirəm. Bəyin atasını çağırdım, dedi ki, toyun axırı sənə deyəcəm. Toyun axırında gördüm ki, tamada gəlib çıxdı. Gördüm toy sahibi də gülür. Məlum oldu ki, bu tamadanı toy sahibinin qardaşı dəvət edib. Çox danışan olduğuna görə məclisin yiyəsi buna zəng vurdurtdurub ki, qardaşın oğlu avtomobil qəzasına düşüb. Bu da gedib, görüb ki, elə şey yoxdur, təzədən qayıdıb gəlib toyun axırına çatıb.