"My name is İntiqam"ın ikinci hissəsi çəkilir

"My name is İntiqam" filminin ikinci hissəsi çəkiləcək.

Bu barədə Ölkə.az-a "My name is İntiqam- 2 Moldova sərgüzəştləri" adlanan ekran işinin icraçı prodüseri, aktyor Kamran Ağabalayev məlumat verib. K.Ağabalayev bildirib ki, yaradıcı heyət artıq bu ölkənin paytaxtı Kişinyovdadır:

"Filmin ikinci hissəsi burada çəkilir. Çünki bu filmə Moldovada, xüsusən Kişinyovda böyük maraq olub. Bu gün Moldova telekanallarına müsahibəmizdə də bunu vurğuladıq. İnşallah, iyulun 7-də ilk çəkiliş günümüzdür. Birinci hissədəki aktyorların altmış faizi burada da rol alıb. Texniki məsələlərə gəlincə, Moldovada o barədə bir az bahaçılıqdır. Amma buna baxmayaraq, çalışırıq ki, müasir texnikadan istifadə edək".

Qeyd edək ki, filmin ilk hissəsinin ideya müəllifi Fariz Əliyev, quruluşçu rejissoru Emil Abdullayev, quruluşçu operatoru Rəşad Qarayev, baş prodüseri Müşviq Şahverdiyevdir. M.Şahverdiyev həmçinin filmdəki əsas rollardan birinin ifaçısıdır. Ekran işində digər rolları İlkin Misgərli, Teymur Məmmədov, Aysel Bayramova, Niftulla Əsgərov, Qızılgül Quliyeva, Mələk Kazımova oynayıblar.

Filmin ikinci hissəsini isə İlham Yaşaroğlu ekranlaşdıracaq.

İntiqam VALEHOĞLU
Ölkə.az