Ekspert kreditlərin bağışlanmasından danışdı

Kiçik məbləğli kreditlərin dövlət tərəfindən qarşılanacağı ilə bağlı xəbərlər yayılıb.

Bu xəbərlər yayılandan sonra banklara borcu olan hər kəsi düşündürən bir sual var: Bu həqiqətən baş verəcəkmki? Əgər baş verəcəksə hansı formada olacaq?

Bu suallara ekspert Əkrəm Həsənov Ölkə.az-a verdiyi açıqlamasında aydınlıq gətirib.

Əkrəm Həsənov: "Əgər bu baş verərsə, qanunla heç kim banklara deyə bilməz ki, sən öz pulundan imtina et. Əgər kiçik məbləğli kreditlərin silinəcəyi baş tutarsa demək bu dövlət hesabına olacaq. Dövlət özü həmin banklara qaytarılmayan kreditlərə görə kompensasiya verəcək. Bu ancaq dövlət hesabına ola bilər. Ancaq bunun hansı kriteriyalarla olacağını demək çətindir. Açığı belə bir şeyin olacağına inanmıram. Əgər kiçik məbləğli kreditlər silinəcəksə, o zaman digərləri də deyəcək ki, "bəs biz?"

Elə adam var ki, 5 min manata qədər banka borcu var ancaq bu onun üçün dərd deyil. Elə adamlar da var ki, banklara xeyli pul borcludur ancaq çox pis vəziyyətdə yaşayır. Bu baş verərəsə, elə ola bilər ki, əhali kreditləri arxayınlaşıb ödəməz. Hər dəfə gözləyərlər ki, borcları dövlət tərəfindən ödəniləcək. Buna getmək risklidir. Bunun analogiyasının başqa bir ölkədə həyata keçirildiyindən isə xəbərsizəm".

Səxavət Məmməd
Ölkə.az