Bostonda Olimpiadaya hazırlıq 4,6 milyard dollara başa gələcək

Yay Olimpiya Oyunları 2024-ün ərizə komitəsi Bostonda yeni plan təqdim edib, plana görə, oyunların hazırlığına 4,6 milyard dollar sərf ediləcək, AP xəbər verir.

Yeni plana görə, Boston müvəqqəti olimpiya stadionu üçün 176 milyon, olimpiya kəndinin inşasına 90 milyon, digər obyektlərin inşasına isə 754 milyon xərcləməyə hazırdır.

Bununla yanaşı, təşkilatçılar 4,8 milyard yalnız televiziya hüququnun satışından əldə etməyi planlayırlar. Eləcə də yenilənmiş planın çərşənbə axşamı ABŞ MOK-un San-Fransisko baş qərargahında müzakirə ediləcəyi xəbər verilir.

ABŞ son dəfə 1996-cı ildə Atlantada yay oyunlarını qəbul edib. Nyu-York yay oyunları 2012-yə namizəd olub, amma London qalib gəldi. Çikaqo Oyunlar-2016 üçün ərizə göndərib, amma Rio-de-Janeyro seçildi.

Daha öncə Oyunlar-2024-ün keçirilməsi üçün Paris (Fransa) və Hamburq (Almaniya) ərizə verib. Budapeşt (Macarıstan) bələdiyyəsi də rəsmi ərizə vermək üçün səs verib.

Bundan başqa, əsas namizəd kimi Hindistan Əhmədabadının da adı çəkilirdi. Bu yaxınlarda Avropa Oyunlarının keçirildiyi Azərbaycan, əgər Beynəlxalq Olimpiya Komitəsinin tələblərini bir qədər azaltsa Olimpiada oyunları-2024 üçün ərizə verməyə hazır olduğunu bildirmişdi.

Ölkə.Az