Şiə türkmənlər İŞİD-lə müharibəyə hazırlaşır

Onun təlimatı ilk olaraq İŞİD-in ən çox ələ keçirməyə çalışdığı Kərkükdə tətbiq olunub.

Ölkə.Az Türkiyə mətbuatına istinadən xəbər verir ki, İraq və Suriyanı qan gölünə çevirən İŞİD terror təşkilatına qarşı şiə türkmənlər də hərəkətə keçib.

İraqın Kərkük şəhərində olan şiə türkmən tələbə və şagirdlər İraqın ən ali şiə lideri Ayətullah Əli Sistaninin tapşırığı ilə İŞİD-lə döyüşmək üçün təlimlərə başlayıb. Təhsil müəssisələrində tətilin başlanması ilə təlimlərə cəlb edilən orta təhsil, lisey şagirdləri, universitet tələbələrinə hərbi sahə tədris edilir.

İŞİD-in keçən il Mosulu ələ keçirməsi və sünni bölgəsində irəliləməsindən sonra İraq şiələrinin lideri Sistani cihad fətvası vermişdi.

Sistaninin fətvası ilə İraqın cənubunda İŞİD-ə qarşı könüllü şiə döyüşçülərindən ibarət "Haşdi Əş Şabi" birlikləri quruldu. Terror təşkilatı ilə aktiv şəkildə mübarizə aparan birliklər türkmənlərin sıx yaşadığı Kərkükdə təşkil edildi. Bu bölgədə qurulan və bu günə qədər İŞİD təşkilatı ilə qarşıdurmalar aparan şiə könüllüləri türkmən bölgələrini müdafiə etməyə davam edir.

Ötən günlərdən birində mübarizənin davam etdiyi İraqda Sistani əmr verərək, məktəb və universitetlərin tətildə olması ilə bağlı könüllülük əsasında hərbi təlimlərin başlanmasını istədi. Onun təlimatı ilk olaraq İŞİD-in ən çox ələ keçirməyə çalışdığı Kərkükdə tətbiq olunub.

Burada gənclər Şiə Türkmən Könüllü Qüvvələrinin 16-cı briqada komandanlığında təlim keçməyə başlayıblar. Hərbi dərslərə qatılan 160 gənc 3 qrupa bölünüb. Tazehurmatuda futbol sahəsində toplaşan şagird və tələbələr "Ya Hüseyn" qışqıraraq təlimlərə start veriblər.

Təlim proqramlarına qatılan 15 yaşlı Hüseyn Abdulla hədəfinin İŞİD-i yıxmaq olduğunu bildirib.

"Biz təlimat üçün buraya gəlmişik. Bizi öyrədirlər. Silah təlimi keçməyə başladıq. Biz tələbəyik. Hədəfimiz İŞİD-i yıxmaqdır", - deyə gənc bildirib.

Xatırladaq ki, 2006-cı ildən əsası qoyulan İŞİD terror təşkilatı 2014-cü ildə İraq və Suriyanın bir hissəsini ələ keçirərək, orada «xilafət» yaradıblar. İŞİD-çilərin törətdikləri qətliamlar nəticəsində minlərlə dinc sakin vəhşicəsinə öldürülüb, həmçinin minlərlə insan girov götürülüb.

Rəşid Mustafazadə

Ölkə.Az