Vahid Qədimin axtarılmasının daha bir səbəbi
Tanınmış meyxanaçı Vahid Qədimin ölkədən getməsinin yeni səbəbləri ortaya çıxıb. Məlum olub ki, meyxanaçı daha bir neçə nəfərə külli miqdarda pul borcludur.
Bu barədə Ölkə.az-a V.Qədimin borclu olduğu şəxslərdən biri məlumat verib və adının mətbuatda hallandırılmasını istəməyib:
"Vahid bir müddət də torpaq-alqı satqısıyla məşğul olmaq istədi. Daha doğrusu, buna cəhd etdi. Ancaq həmin iş də iflasa uğradı. Bir qadına başqasının torpağını göstərib, ondan 70 min manat pul almışdı. Sonra qadın başa düşdü ki, aldadılıb. Ümumiyyətlə, bu adam son illər tüfeyli həyat tərzi keçirirdi. Hətta səhv etmirəmsə, ailəsi də dağılıb".
Qeyd edək ki, Vahid Qədim barəsində (Səfərov Vahid Ağabala oğlu) Cinayət Məcəlləsinin 178-ci maddəsi ilə cinayət işi başlanılıb və barəsində axtarış elan olunub.
Bir neçə gün öncə Ölkə.Az onun ölkədən getməsinin başqa bir səbəbini diqqətinizə çatdırmışdı. Həmin vaxt meyxanaçının dostlarından biri saytımızda bunları demişdi:
"Vahid bir nəfərlə şərik işə başlamışdı. Bunun adına 4-5 "Şaqman" (Shacman) markalı yük maşını götürülmüşdü. Sonra işləri alınmadı, həmin adamla münasibətləri pozuldu və bütün borc bunun üstündə qaldı".
İntiqam VALEHOĞLU
Ölkə.az