Bakıda daha bir polis qəhrəmanlığı

Bakıda polis əməkdaşı dənizdə batıb.

Ölkə.Az-ın FHN-in saytına istinadən xəbər verir ki, Fövqəladə Hallar Nazirliyinin “112” qaynar telefon xəttinə daxil olmuş məlumata əsasən, Bakı şəhəri, Xəzər rayonunda dənizdə batmış 1 nəfərin axtarışlarına Fövqəladə Hallar Nazirliyinin dalğıc-xilasediciləri cəlb olunub.

APA TV-nin məlumatına görə, batan şəxsin polis əməkdaşı olduğu üzə çıxıb.

Məlumata görə, o, Suraxanı rayon Mühafizə İdarəsinin əməkdaşı Nurəliyev Zaur Zakir oğludur.

Çavuş vəzifəsində çalışan Zaur Nurəliyev Xəzər dənizinin Şüvəlan qəsəbəsi hissəsində batan ər və arvadı xilas etməyə çalışıb. O, qadını xilas etsə də, qadının ərini xilas edə bilməyib və özü də batıb.

Əldə etdiyimiz digər məlumata görə, dənizdə Batan Zaur Nuralıyev İsmayıllı rayonunun Buynuz kəndindəndir.

Bildirilir ki, vətəndaşlar küləkli havada dənizdə çimərkən boğulmağa başlayıblar.

Öz növbəmizdə qeyd etmək istərdik ki, edilən çoxsaylı xəbərdarlıqlara baxmayaraq, vətəndaşlarımız çimmək qadağan olunan hava şəraitində də suya girməkdən çəkinmirlə və belə hallar insan ölümü ilə nəticələnir.

Onu da əlavə edək ki, dənizdə boğulan Zaur Nuralıyev 40 gün əvvəl ata olmuşdu.

Ölkə.Az