Erməni jurnalist: Həqiqəti bilmək istəyirik!!!
“Bütün Ermənistan hakimiyyəti günahkardır”.
Erməni jurnalist Samvel Martirosyan Qarabağ separatçılarının “nkr-news.com” saytında erməni ordusunda baş verən hadisələrə həsr olunmuş “Həqiqəti bilmək istəyirik!” adlı məqalə dərc edib.
Oxucularına həmin məqaləni təqdim edirik:
Ordumuzda və respublikamızda yaranan vəziyyət baş verən qanunsuzluğa laqeyd qalmağa imkan vermir. Hər gün gənc oğlanlar həlak olur. Məncə ilk olaraq Ermənistan respublikasının silahlı qüvvələrindəki problemlərdən başlayaq.
Mülki əhali arasında aparılan sorğular və əsgər analarının etiraz aksiyaları, ordumuzun hərbi hazırlığına dair rəhbərliyin çıxışlarının yalnız onların təxəyyülünün məhsulu olduğunu bir daha sübut edir. Şəxsi heyətdə hərbi ruhun və nizam-intizamın olmaması, vəzifəli şəxslərin yararsızlığı, cəbhə bölmələrinin qeyri-məqbul maddi-texniki təchizatı ER silahlı qüvvələrinin döyüş qabiliyyətliliyinin aşağı olmasına gətirib çıxarır. Gəlin, sadəcə rəqəmlərə nəzər salaq.
Düşmən nizami orduda təxminən iki dəfə artıq üstünlüyə malikdir. Hətta ehtiyatda olan hərbçilərinin sayı 100 000-dən çoxdur. ER SQ-nın sıralarında baş verən hadisələrin əksəriyyəti şəxsin ləyaqətinə və şərəfinə toxunmaqla, təhqir və alçaldılma ilə bağlı cinayətlərdir. Beləliklə, orduda, eləcə də respublikada ədalətin bərqərar olması seçici xarakter daşıyır, və bəzən təzyiq vasitəsilə əldə edilir.
Ordudakı vəziyyət ölkədəki vəziyyətin güzgüdəki əksinə çevrilib. Orduda gənc uşaqların ölümü ilə sonlanan hadisələr cəzalanmanın olmayacağı hissinin nəticəsidir. Bu isə kimin isə hansısa bir məmurun, nazirin və ya generalın qohumu olması ilə meydana gəlir.
Vətəndaşlarının əsas hüquqdan - səsvermə hüququndan məhrum olan, bu hüququn maliyyə, administrativ resurslarla, saxtakarlıq, zorakılıq, pressinq, rüşvət, digər hüquq pozuntuları ilə əvəzlənən ölkədə gənc adamın ölümü ekstro-ordinar bir şey kimi görünmür. Yuxarıda sadalanan hər şeyin olduğu bu ölkədə yoxsulluğun, dilənçiliyin və mühacirətin sayı ildən-ilə artır. Orduda vəziyyət isə yuxarıda sadalananlara əsaslanır
Aydındır ki, erməni hakimiyyəti öz vətəndaşlarından həqiqəti gizlətmək məcburiyyətindədir. Və iş, ölümlər haqqında xəbərlərin dəhşətə gətirəcək dərəcədə mütəmadi daxil olmasında deyil. İş ondadır ki, hakimiyyət bütün bu baş verənlərə dəhşətli qeyri-adekvatlıq nümayiş etdirirlər.
Hakimiyyət dəvəquşu siyasəti həyata keçirir, ictimai suallara cavab olaraq isə ya keçən il ilə müqayisədə ölümlərin sayının azalmasına dair statistik məlumatlar təqdim edir, ya da belə hadisələrin bütün ordularda baş verdiyini söyləyirlər. Bu dəvəquşu siyasəti isə gənc erməni uşaqlarının həyatına mail olur.
Hakimiyyət orduda itkiləri gizlətdiyi üçün qeyri-rəsmi mənbələrə əsaslanmalı oluruq. Qeyri-hökumət erməni təşkilatlarının məlumatına əsasən, 2011-ci ildə Ermənistan SQ sıralarında 39 ölüm hadisəsi qeydə alınıb və onların yalnız 10 nəfəri düşmən gülləsindən həlak olub.
2012-ci ildə orduda 48 belə hadisə yer alıb, onların arasında 12-si düşmən payına düşür.
2013-cü ildə 40 bədbəxt hadisə baş verib, onların 31-i ölümlə nəticələnib.
Rəsmi statistikaya müvafiq olaraq yalnız 2014-cü ildə orduda 103 bədbəxt hadisə qeydə alınıb, onların 75-i ölümlə nəticələnib.
2015-ci ilin birinci yarımilliyində 98 bədbəxt hadisə qeydə alınıb, onların 51-i ölümlə nəticələnib.
Oxucuların diqqətinə ölümlə nəticələnən, eləcə də ordumuzun silahlı qüvvələrinin yalanı ilə əlaqədar bir neçə hadisəni misal gətirmək istəyirəm. 2015-ci ilin yanvar ayının 29-da Vazgen Sarkisyanın adına hərbi institutun idman meydançasında, adıçəkilən institutun 19 yaşlı müdavimi Aykaz Barseqyanın cəsədi tapılıb.
Müdavimin ölümünə aidiyyatı olan 4 müdavimdən başqa, işdə zabit, kapitan Artem Avetisyanın da adı keçir. Ermənistanın şimali-şərqində hərbi hissənin sahələrinin birində iyun ayının 30-da, baş nahiyəsində odlu silah yarası olan SQ-nın zabiti, leytenant Mavrik Xaçaturoviç Melikyan tapılıb. Bir həftədən çox vaxtın keçməsinə baxmayaraq zabitin ölüm səbəblərini üzə çıxarmağa dair istintaq tədbirləri həyata keçirilmir. Bir həftə ərzində yalnız, zabitin öz tabel silahından güllələndiyinə dair bəyanat edilib. Əlbəttə, günahı mərhumun üzərinə atmaq daha asandır.
2015-ci ilin iyul ayının 4-də ER SQ-nın iki pilotsuz uçan aparatı vurulub.
Xatırladaq ki, bu, PUA (Pilotsuz uçan aparat) ilə bağlı ilk hadisə deyil. Etibarlı mənbələrdən alınan məlumata əsasən, həqiqətən PUA vurulub, amma bizim hərbi rəislərin bəxtindən vurulan aparatlar ER ərazisinə düşüb, bu isə onlara yalan danışmağa imkan verir. Müdafiə Nazirliyi bəyanatla çıxış etmək, nəticələr çıxarmaq, günahkarları tapıb cəzalandırmaq və personalın təliminə dair qərarlar qəbul etmək əvəzinə, Müdafiə Nazirliyinin rəhbərliyi “Azərbaycan SQ-ı paltaryuyan maşınları vurub” və ya “Azərbaycan hərbçiləri uşaqlarının itirdikləri oyuncaqları tapdılar” kimi bəyanatlarla çıxış ediblər.
2015-ci ilin iyul ayının 5-də dörd zabit qəzaya uğrayıblar, nəticədə Sasun Ziroyan və Marat Tadevosyan həlak olublar. İki zabit Alik Petrosyan və Sasun Qevorkyan ağır vəziyyətdədirlər. İndiyə qədər bazar günün səhəri zabitlərin hara getdikləri və qəzanın səbəbləri aydınlaşdırılmayıb. Çəkiləsi misalların çox olmasına baxmayaraq bir neçəsi ilə kifayətlənək.
Ordu və erməni cəmiyyətində ağalıq edən qanunsuzluq arasında qarşılıqlı əlaqəni anlamaq üçün erməni SQ təbii ki, qeyri-rəsmi strukturunu təhlil etmək lazımdır. Balıq hər zaman başdan iyləndiyi üçün erməni generallarının məğzinin nədən ibarət olduğunu və nə ilə nəfəs aldıqlarını anlamaq lazımdır. Generalitet əsasən zəngin biznesmenlər və geniş malikanə sahibləri ilə təqdim edilib. Bu kök atmış cənabların sayəsində ordu son illərdə onların klanlarını maraqlarını qoruyan qanuni xidmət vasitəsinə çevrilib.
Belə generalların rəhbərlik etdiyi ordu, sovet ordusunun qanunlarının ağalıq etdiyi struktura bənzəyir, həm də bu ordu keçmiş səhra komandirlərinin ambisiyaları ilə möhkəmləndirilib. Özünəməxsus ordu ierarxiyası generallar və ərazilərdə nəzarəti yerinə yetirənlər ilə əlaqəyə əsaslanır. Beləliklə də, orta və kiçik komandir heyəti ordu idarəçiliyi sistemindən kənarda qalır, baxmayaraq ki, orduda bütün əziyyət məhz zabitlərin orta bəndinin üzərinə düşür və məhz onlar orduda ölümlərə görə məsuliyyət daşıyır.
Ermənistanın bugünkü ordusu yuxarıda göstərilən səbəblər ucbatından elementar nizam-intizamı təmin etməyə və xidmətə yeni çağırılmış hərbçiləri müdafiə etməyə qadir deyil.
Bu vəziyyət çoxdan köklü dəyişiklik tələb edir. SQ-də “yuxarıdan” başlanan daxili, intizamdan kənar münasibətlərin, zabitlər nəslinin və generalitetin dəyişdirilməsi yönümündə islahatların həyata keçirilməsi labüddür.
Bütün bunların günahkarı kimdir? Bütün Ermənistan hakimiyyəti günahkardır. Hamı! Çünki onların heç biri ölkənin vətəndaşları üçün, sadə erməninin özünü sabahkı günə əmin ola biləcəyi, məmurların özbaşınalığından müdafiə olunduğunu hiss edəcəyi bir həyat qurmayıb. Bunun nəticəsi nə oldu? Əhalinin ölkədən getməsi, deməli düşmənin canlı qüvvədə üstünlük qazanması oldu. (oxu,az)
Ölkə.Az
