Tək ayaq üstə dayana bilməyənlərin ölüm ehtimalı daha yüksəkdir - Araşdırma

Ölkə.Az xarici KİV-ə istinadla xəbər verir ki, araşdırmaya görə, bir ayaq üzərində tarazlığı saxlaya bilməmək orta yaşlı və yaşlı insanlarda ölüm riskinin artması ilə əlaqələndirilir. 
Araşdırmalar bir ayağında tarazlığı saxlaya bilməməyin insult riski ilə əlaqəli olduğunu ortaya qoyub. Həkimlər də bunun "demensiya" ilə əlaqəli ola biləcəyini düşünür və tarazlığı zəif olan insanların zehni testlərdə daha pis nəticə göstərdiyini vurğulayırlar.

Tədqiqat üçün 2008-2020-ci illər arasında 51-75 yaş arası sabit yerişi olan cəmi 1702 insan izlənilib və bu, təəccüblü nəticələr verib.

Tədqiqatçılar iştirakçılardan qollarını yanlara açaraq düz irəli baxaraq tək ayaq üstə durmalarını xahiş ediblər. Hər ayaq üçün insanlara üç dəfə cəhd etmək şansı verildi. İştirakçıların beşdə biri (təxminən 21 %) bir ayaqla duruş testindən keçə bilməyib.
Tədqiqatçılar 10 saniyəlik balans testinin insan sağlamlığı ilə bağlı sürətli və obyektiv rəy verdiyini bildirib.

Sonrakı 10 ildə iştirakçılardan 123-ü müxtəlif səbəblərdən dünyasını dəyişib. Tədqiqatçılar bu ölümlərə əsaslanaraq, 10 saniyə dəstək olmadan bir ayağı üstə dayana bilməyənlərin ölüm riskinin 84 % daha çox olduğunu aşkar ediblər.
Hesablamalar zamanı xəstələrin yaşı, cinsi və əsas şərtləri nəzərə alınıb.

Bu kəskin tapıntılara əsaslanaraq, Rio-de-Janeyrodakı “Clinimex” məşq tibb klinikasından Dr Klaudio 1il Araujonun rəhbərlik etdiyi qrup yaşlıların müntəzəm olaraq keçirdiyi illik testlərə balans testinin daxil edilməsini təklif edir. Bununla belə, balansla standartlaşdırılmış testin olmaması bu tövsiyəni etibarsız edir.

İştirakçıların hamısının braziliyalı olması səbəbindən tədqiqatın məhdud olduğunu qəbul edən tədqiqatçılar, bu nəticələrin digər ölkələrdə eyni nəticəni verməyə biləcəyinə diqqət çəkirlər.

Fidan
Ölkə.Az