Yunanıstanın 4 günlük pulu qalıb

Yunanıstanda iqtisadi böhran səbəbindən pullar tükənmək üzrədir.

Ölkədəki bankomatlarda yalnız bazar ertəsinə qədər yetəcək pul qalıb. Yunanıstanın Banklar Birliyinin rəhbəri Louka Katseli vəziyyəti şərh edərkən bildirib ki, bazar ertəsinə qədər hər şey təminat altındadır. Hətta vəziyyət o yerə çatıb ki, ölkə bazarlarında köhnə pul vahidi olan drahma satılmağa başlayıb. Ölkə avrodan imtina edəcəyi təqdirdə yenidən drahmaya keçəcəyi gözlənilir.

Fransa prezidenti Fransua Olland isə bildirib ki, Yunanıstan yenidən Avrozonanın etibarını qazanmaq üçün yekun və əsaslı iqtisadi plan təqdim etməlidir. "Fransa bu mövzuda Yunanıstana lazımi köməyi göstərməyə hazırdır. Çünki biz Yunanıstanın Avrozonada qalmasının tərəfdarıyıq", - deyən prezident əlavə edib ki, bu mövzuda ən böyük məsuliyyət Yunanıstanın üzərinə düşür.

Fransanın keçmiş prezidenti, hal-hazırda ölkənin sağçı partiyasının lideri Nikola Sarkozi də Fransua Ollandla eyni fikirdə olduğunu deyib. "Mən razılığa gəlmək mövzusunda Fransua Ollandla eyni fikirdəyəm. Amma ortada bir qırmızı xətt var və təklif edilən həll yolu Avrozonanın etibarını zədələməməlidir", - deyə Sarkozi bildirib. Qeyd edək ki, Yunanıstanın baş naziri Aleksis Tsipras dünən Avropa Parlamentinin toplantısında iştirak edib. O, bu günün sonuna qədər yeni plan təqdim edəcəyinə söz vermişdi. Avropa Birliyi liderləri Yunanıstanın yeni planını müzakirə etmək üçün Brüsseldə yığışacaq. Amma onlardan əvvəl Avropa ölkələrinin maliyyə nazirləri Brüsseldə bir araya gələcəklər. (ans)

Ölkə.Az