Xoşqədəm Hidayətqızı: "Rayon icra hakimiyyətləri özləri yalvarır"

Xoşqədəm Hidayətqızı aparıcısı olduğu "Sən tək deyilsən" verilişinə kömək üçün müraciət edən bir xanımı sərt şəkildə tənqid edib.

Ölkə.az xəbər verir ki, Hidayətqızı verilişə müraciət edənlərin onu aldatmasından gileylənib:

"Saflıqdan bu qədər istifadə etməyin də. Hamı məni aldadır. Belə şey olar? Gəlirlər, qucaqlayıram, öpürəm, bağrıma basıram, dərdini soruşuram, amma efirə çıxanda başqa söz deyir. Bu qadın bizim əməkdaşlara deyib ki, beş uşağıma baxa bilmirəm, onları uşaq evinə vermək istəyirəm. Heç kəs sözlə gəlmir bura. Hər birinin qeydiyyatı var, orada bütün sənədlər toplanır. Bizim əməkdaşların da yazığı gəlib ki, uşaqları atacaq. Gəlib bura çıxanda deyir ki, xalqdan kömək istəyirəm. Mən dilənçiliyin əleyhinəyəm. Sağlamlığınız, əliniz-qolunuz yerindədir. Niyə xalqdan dilənməlidir? Niyə belə şeyləri təbliğ etməliyik? Bizim çox gözəl iş yerlərimiz var. Ay dəyərli analarım, bacılarım, gəlib burada oturub, kimdənsə pul istəməkdənsə, həyətyanı sahə üçün müraciət elə. Əkib becərmək üçün rayon icra hakimiyyətləri özləri yalvarır... Tamaşaçılara müraciət edirəm. Bura dilənmək üçün gəlməyin".

Teleaparıcının çıxışının videosunu təqdim edirik:

İntiqam VALEHOĞLU
Ölkə.az