Yunanıstan avroqrupa islahatlar planını göndərdi
Yunanıstanın 240 milyard avroya yaxın borcu var.
Ölkə.Az "ERT1" teleşirkətinə istinadən xəbər verir ki, Yunanıstan hökuməti Avropa qrupunun rəhbərliyinə islahatlar planını göndərib.
Bildirilir ki, təkliflər elektron poçt vasitəsilə avroqrupun rəhbəri Yerun Deysselblumun ünvanına göndərilib. Avroqrupun nümayəndəsi sosial şəbəkədə yazdığı məlumatda yunan təkliflərinin alınması xəbərini təsdiq edib.
Yunan KİV-lərinin informasiyasına əsasən, islahatlar planı 10 iyulda Afina parlamentində müzakirə ediləcək.
Xatırladaq ki, Yunanıstanın Avrokomissiya, Avropa Mərkəzi Bankı və Beynəlxalq Valyuta Fonduna 240 milyard avroya yaxın borcu var.
Ötən həftə Yunanıstanda ölkə əhalisinin 40%-nin iştirak etdiyi referendum başa çatıb. Yunanıstan Daxili İşlər Nazirliyinin açıqladığı ilkin nəticələrə əsasən, səsverməyə qatılanların 59,7%-i kreditorların tələblərinə “yox” cavabı verib və yalnız 40.3% vətəndaş bu şərtlərlə razılaşaraq “hə”yə səs verib.
Rəşid Mustafazadə
Ölkə.Az