Həftənin icmalı
Ermənilər işğal altında olan dağlarda yanğınlar törədiblər
06.07.2015
Ermənistan Silahlı Qüvvələri Azərbaycan torpaqlarında yanğın törətməkdə davam edirlər.
Bu dəfə ermənilər işğal altında olan dağ massivlərinə od vurublar.
Ağdam rayonunun işğal altında olan Şahbulaq, Yeddixırman dağlarında güclü yanğınlar müşahidə olunur.
Azərbaycanda məktəbli geyimləri bahalaşır
06.07.2015
“Bakı Tikiş Evi”nin orta məktəb şagirdləri üçün satdığı geyimlərin qiymətlərinin bahalaşdırılması nəzərdə tutulur.
Ölkə.Az xəbər verir ki, “Bakı Tikiş Evi”nin Satış şöbəsinin rəisi Etibar Əzimovun Trend-ə verdiyi məlumata görə, geyimlərin satış qiymətinin nə qədər bahalaşdırılacağı ilə bağlı qərar yaxın günlər ərzində açıqlanacaq:
“Hələlik qiymətlərin nə qədər olacağı dəqiqləşdirilməyib. Hazırda bu məsələ araşdırılır”.
Bakıda ət kəsimi və satışı obyektlərində nəzarət gücləndiriləcək
06.07.2015
“Havaların normadan artıq isti keçəcəyinin proqnozlaşdırıldığı iyul və avqust aylarında Bakıda ət kəsimi və satışının aparıldığı yerlərdə monitorinqlər aparılacaq, bu obyektlərdə baytarlıq nəzarəti gücləndiriləcək”.
Bu barədə Kənd Təsərrüfatı Nazirliyi (KTN) yanında Dövlət Baytarlıq Xidmətinin (DBX) Bakı Şəhər Baytarlıq İdarəsinin rəisi Aslan Aslanov deyib.
Səhiyyə Nazirliyi insanları diqqətli olmağa çağırdı
06.07.2015
Səhiyyə Nazirliyi Respublika Taun Əleyhinə Stansiyası dünyanın bəzi ölkələrində yayılan MERS virusu ((MERS - Middle East Respiratory Syndrome) ilə əlaqədar insanları diqqətli olmağa çağırıb.
Stansiyanın Xüsusi təhlükəli yoluxucu xəstəliklərin epidemiologiyası şöbəsinin müdiri, tibb elmləri namizədi Rita İsmayılova bildirib ki, MERS virusunun Azərbaycana keçməsinin qarşısını almaq üçün Səhiyyə Nazirliyi tərəfindən qabaqlayıcı tədbirlərin görülməsinə başlanılıb:
Azərbaycanda su qıtlığı yarana bilər
06.07.2015
Azərbaycanda yayın quraq keçməsi ilə əlaqədar yayın sonu, payızın əvvəlində kənd təsərrüfatı bitkilərinin suvarılması üçün su qıtlığı yarana bilər.
Bunu Azərbaycan Milli Elmlər Akademiyası Coğrafiya İnstitutunun direktor müavini Elbrus Əlizadə deyib.
Cəbhədə vəziyyət gərginləşən kimi ATƏT hərəkətə keçdi
07.07.2015
ATƏT Azərbaycan və Ermənistan qoşunlarının təmas xəttində monitorinq keçirəcək.
Müdafiə Nazirliyinin mətbuat xidmətindən Ölkə.Az-a bildiriblər ki, ATƏT-in fəaliyyətdə olan sədrinin şəxsi nümayəndəsinin mandatına uyğun olaraq iyulun 8-də Füzuli rayonunun Aşağı Veysəlli kəndinin yaxınlığındakı qoşunların təmas xəttində monitorinqin keçirilməsi planlaşdırılır.
Monitorinqi Azərbaycan tərəfdən ATƏT-in fəaliyyətdə olan sədrinin şəxsi nümayəndəsinin səhra köməkçiləri Yevgeni Şarov və Piter Svedberq keçirəcəklər.
Ünvanlı dövlət sosial yardımı almaq asanlaşır
07.07.2015
Əmək və Əhalinin Sosial Müdafiəsi Nazirliyinin (ƏƏSMN) mərkəzləşdirilmiş informasiya sistemində ünvanlı dövlət sosial yardımı üzrə Vahid Elektron Müraciət və Təyinat Alt Sisteminin (VEMTAS) yaradılması üçün müvafiq texniki infrastrukturun hazırlanması işləri artıq yekunlaşdırılıb.
Nazirlikdən Ölkə.Az-a verilən məlumata görə, vətəndaşlar tərəfindən ünvanlı dövlət sosial yardımının alınması üçün elektron formada müraciət (ərizə) göndərilməsi üçün proqram təminatı hazırlanaraq ilkin testləşdirmə işlərinə başlanılıb.
Azərbaycanın döyüş helikopterləri cəbhə xəttində
07.07.2015
Bu gün səhər saatlarında Azərbaycan Hərbi Hava Qüvvələrinə məxsus döyüş helikopterlərinin cəbhənin Füzuli rayonu istiqamətində uçuşları olub.
Ölkə.Az xəbər verir ki, yerli sakinlərin “AzeriDefence”yə verdiyi məlumatına görə, döyüş helikopterlərimiz cəbhə xətti yaxınlığında qrup halında ərazilərin üzərində uçuşlar həyata keçiriblər.
Müdafiə Nazirliyinin mətbuat xidməti “AzeriDefence”nin sorğusuna cavab olaraq faktı təsdiqləyib.
Nazirliyin mətbuat xidmətindən bildirilib ki, döyüş hazırlığı planına əsasən, Azərbaycanın Hərbi Hava Qüvvələrinin aviasiya vasitələri mütəmadi olaraq planlı şəkildə cəbhəboyu uçuşlar həyata keçirir.
Telekanallara son xəbərdarlıq
07.07.2015
Son zamanlar şou proqramlarda belə bir dəb düşüb. İki nəfər qonağı qladiator kimi atırlar ortaya. Onları döyüşdürürlər, vuruşdururlar. Özləri də kənardan baxıb gülürlər ki, alındı. Bu cür yaramaz.
Ölkə.Az xəbər verir ki, bunu APA-ya Milli Televiziya və Radio Şurasının (MTRŞ) sədr müavini Qafar Cəbiyev deyib. Sədr müavini bildirib ki, haqqında ciddi tədbir görüləcək verilişlərin sayı günbəgün artmaqdadır:
“Həmin verilişlərin sayı kifayət qədər çoxdur. Daha bir səhv, daha bir pozuntu artıq həmin verilişlə bağlı ciddi tədbir görülməsinə gətirib çıxaracaq. Biz indiyə kimi telekanallara şifahi şəkildə xəbərdarlıq etməklə kifayətləndik. Artıq bundan sonra belə olmayacaq”.
MTRŞ-dan “Space"ə son xəbərdarlıq
07.07.2015
Bu gün Milli Televiziya və Radio Şurasının (MTRŞ) növbəti iclası keçirilmişdir.
MTRŞ-dan verilən xəbərə görə, iclasda “Space Müstəqil Tele-radio Şirkəti” tərəfindən “Televiziya və radio yayımı haqqında” qanunun tələblərinin pozulması faktı müzakirə edilib.
İclasda “Space Müstəqil Tele-radio Şirkəti” rəhbərinin proqram siyasətində dəyişikliklər etməsi, qanun pozuntusuna yol vermiş işçilər barəsində ciddi tədbirlər görməsi müsbət hal kimi qeyd edilib. “Space” televiziyasında 2015-ci il sentyabr ayından başlayaraq şou xarakterli verilişlərin həcminin azaldılacağı, maarifçilik, mədəni, intellektual xarakterli verilişlərə üstünlük veriləcəyi barədə kanal rəhbərinin vədi nəzərə alınıb.
Etibar Babayevə ATV-də vəzifə verildi
07.07.2015
Tanınmış telejurnalist Etibar Babayevə yeni vəzifə verilib.
O, “Azad Azərbaycan” telekanalında yeni yaradılmış Bədii Şuraya sədr təyin edilib. E. Babayev bununla yanaşı, telekanalın vitse-prezidenti səlahiyyətlərini də həyata keçirəcək.
Məlumat ATV-dən təsdiqlənib.
Qeyd edək ki, E. Babayevin sonuncu vəzifəsi AzTV-nin nəzdində Televiziya və Radio Akademiyasının rektoru idi. O, bu vəzifədən öz ərizəsi ilə getmişdi.
Ermənilərin daha bir pilotsuz təyyarəsi məhv edildi
07.07.2015
Ermənistan Silahlı Qüvvələrinin daha bir pilotsuz uçan aparatı məhv edilib.
Müdafiə Nazirliyinin mətbuat xidmətindən Ölkə.Az-a verilən məlumata görə, cəbhənin Füzuli rayonu istiqamətində Silahlı Qüvvələrimizin mövqeləri üzərində uçuşlar həyata keçirməyə cəhd göstərən Ermənistan Silahlı Qüvvələrinə məxsus 1 ədəd "DJI Inspire1" (Quadcopter) tipli pilotsuz uçan aparat (PUA) bölmələrimizin sayıqlığı nəticəsində vaxtında aşkar olunaraq açılan atəş nəticəsində məhv edilib.
İlham Əliyevin reytinqi açıqlandı
07.07.2015
Azərbaycan əhalisinin ölkə prezidenti İlham Əliyevə etimadı yüksəkdir.
Bunu “Rəy” Monitorinq Mərkəzinin iyulun əvvəlində ölkə üzrə keçirdiyi ictimai rəy sorğusunun nəticələri göstərir.
Cavablardan görünür ki, əgər prezident seçkiləri qarşıdan gələn bazar günü keçirilsəydi, səsvermə məntəqələrinə yollanacaq respondentlərin tam əksəriyyəti, yəni 89,7 faizi öz səslərini hazırkı dövlət başçısı İlham Əliyevə verərdi.
Paytaxtın ictimai nəqliyyatında yenilik
08.07.2015
“Azərbaycan Dəmir Yolları” Qapalı Səhmdar Cəmiyyəti daha bir yeniliyə imza atır. Bakı-Sumqayit dəmir yolu üçün tikilən yeni platformalar artıq hazır vəziyyətə gətirilib. Bundan əlavə metronun “28 May” stansiyasının qarşısındakı keçiddən platformalara birbaşa keçid tikiləcək.
Bakı sərnişin daşıma stansiyasında və onun ətrafında yenidənqurma və təmir işləri davam edir. Artıq Bakı-Sumqayıt istiqamətinə gedəcək sərnişinlər üçün üç yeni platforma tikilib. 4-cü platformada isə tamamlanma işləri gedir.
Prezident Təqaüdü alan Milli Qəhrəmanların sayı açıqlandı
08.07.2015
2015-ci ilin iyulun 1-nə, Əmək və Əhalinin Sosial Müdafiəsi Nazirliyi (ƏƏSMN) tərəfindən 177 nəfər Azərbaycanın Milli Qəhrəmanı və ya onların ailə üzvləri Azərbaycan Respublikası Prezidentinin aylıq təqaüdü ilə təmin edilir.
Ölkə.Az xəbər verir ki, Milli Qəhrəmanlarımızdan 16 nəfərinin şəxsən özünə, digərlərinin isə həlak olduqları üçün ailə üzvlərinə Prezident təqaüdü ödənilir.
Qeyd edək ki, Azərbaycan Prezidentinin 2005-ci il 14 iyul tarixli 258 nömrəli Fərmanına əsasən, həmin ilin avqustun 1-dən Prezident təqaüdünün təyin olunmasına başlanılıb.
Azərbaycanda ardıcıl 4 gün qeyri-iş günü olacaq
08.07.2015
Bu il Azərbaycanda Ramazan bayramı ilə əlaqədar ardıcıl 4 gün qeyri-iş günü olacaq.
Nazirlər Kabinetindən Ölkə.Az-a verilən məlumata görə, Nazirlər Kabineti tərəfindən 2014-cü il noyabrın 21-də “2015-ci ildə Novruz, Ramazan, Qurban bayramları haqqında” qərar qəbul edilib.
Qərara əsasən, 17 və 18 iyul tarixləri Azərbaycanda Ramazan bayramı qeyd ediləcək. İyulun 18-i şənbə gününə təsadüf etdiyindən 5 günlük iş rejimi ilə işləyən müəssisələrdə iyulun 20-si - bazar ertəsi günü də qeyri-iş günü olacaq.
Azərbaycan əhalisinin sayı açıqlanıb
09.07.2015
Azərbaycan əhalisinin sayı ilin əvvəlindən 43,3 nəfər və ya 0,5% artaraq, bu il iyun ayının 1-i vəziyyətinə 9 mln. 636,3 min nəfərə çatıb.
Dövlət Statistika Komitəsindən verilən məlumata görə, əhalinin sıxlığı bir kvadrat kilometrə 111 nəfərdir. Əhalinin ümumi sayının 53,1%-ni şəhər, 46,9%-ni isə kənd sakinləri təşkil edir, 49,8%-i kişilərdən, 50,2%-i qadınlardan ibarətdir. Əhalinin 22,4%-i 0-14 yaşda, 71,6%-i 15-64 yaşda, 6,0%-i isə 65 və yuxarı yaşda olanlardır. Hazırda hər 1 000 nəfər kişiyə 1 009 nəfər qadın düşür.
Bu ilin ilk 5 ayı ərzində ölkədə 66,4 min, yaxud hər gün orta hesabla 440 körpə doğulub, əhalinin hər 1 000 nəfərinə hesabı ilə bu göstərici 16,9 olub. Doğulan körpələrin 53,6%-i oğlan, 46,4%-i isə qız uşaqlarıdır. Körpələrin 1156-sı əkiz, 33-ü isə üçəm doğulub.
İsti hava beyin qanaması riskini artırır
09.07.2015
Beyin qanamaları hər yaşda müşahidə olunur. Xüsusilə də isti havalarda beyin qanamaları riski artırır.
Yayda meydana gələn tərləmə və su itkisi, mühitdə artmış olan nəm nisbəti ilə birləşəndə, bədəndə ifraz olunan bəzi
hormonlar, təzyiqdə düşmə və yüksəlməyə səbəb olur.
Təzyiqin oynamalar əsnasında, maye itkisinə səbəb olur və damarlar içərisindəki qan azalmağa başlayır. Bunun nəticəsində isə tıxanması yaranır. Əgər bu vəziyyət
beyində reallaşarsa, beyin qanaması, iflic və ya ürək damarlarında tıxanma ilə nəticələnə bilər.
Beyin qanamalarına qarşı lazım olan tədbirlər
Artıq çəkidən xilas olun.
Nizamlı şəkildə idman edin.
Stressdən mümkün qədər uzaq durun.
Siqareti tərgidin.
Təzyiq və ürək dərmanlarınızı vaxtında və tam qəbul edin.
11:00-16:00 saatları arasında məcbur qalmadıqca günəşə çıxmayın.
Bol maye qəbul edin, sulu meyvələr yeyin və gündə 2 ədədən artıq olmamaq şərtilə təbii mineral su için.
Azərbaycanda 15-17 yaşlı analar artıb
10.07.2015
Azərbaycanda 15-17 yaşlı analar tərəfindən doğulan uşaqların sayı 15,4 faiz artıb.
Dövlət Statistika Komitəsindən verilən məlumata görə, 2013-cü ildə Azərbaycanda 15-17 yaşlı analar tərəfindən 2 855, 2014-cü ildə isə 3296 uşaq dünyaya gəlib.
Əvvəlki illərdə olduğu kimi ötən il də bu yaşda dünyaya gələn uşaqların çoxu kənd yerlərinin payına düşüb. 2014-cü ildə 1054 uşaq şəhər, 2242 uşaq isə kənd yerlərində doğulub.
Mehriban Əliyevanın təşəbbüsü ilə Pakistanda iftar süfrələri açıldı
10.07.2015
İyulun 9-da Azərbaycanın birinci xanımı, Heydər Əliyev fondunun prezidenti, UNESCO və İSESCO-nun xoşməramlı səfiri Mehriban Əliyevanın təşəbbüsü və dəstəyi ilə Pakistan Nazirlər Kabinetinin nəzdində fəaliyyət göstərən “Pakistan Sweet Home” (Beyt-ul-Mal) təşkilatının Talassemiya Mərkəzində, həmçinin, Pakistanın Abbotabad və Lahor şəhərlərində kimsəsiz uşaqlar evlərində iftar süfrələri təşkil edilib.
“Torqovı” dünyanın ən bahalı küçələri siyahısında
10.07.2015
İngiltərənin “Daily Mail” nəşri şoppinq üçün dünyanın ən bahalı küçələrinin siyahısını tərtib edib.
Siyahıda Bakıdakı Nizami küçəsi (keçmiş Torqovı) də yer alıb.
“Bakının mərkəzindəki Nizami küçəsində geniş piyada və ticarət meydanı var. Bu küçədə yalnız bahalı pərakəndə ticarət mərkəzləri deyil, həmçinin bir sıra Avropa ölkələrinin səfirlikləri də var. Əgər hətta siz alış-veriş etmək istəmirsinizsə, Barokko stilindəki arxitektura sizi mütləq valeh edəcək”, - nəşr qeyd edib.
Qeyd edək ki, dünyanın ən bahalı küçələrinin siyahısına həmçinin Nyu-Yorkdakı 5-ci avenyu (ABŞ), Monten Avenyu – (Paris), Nyu-Bond küçəsi (London) və digər şəhərlər də daxil olub.
İkimərtəbəli qatarların istifadə vaxtı açıqlandı
10.07.2015
“Yeni dərs ili başlayana kimi Bakı-Xırdalan-Sumqayıt xətti üçün nəzərdə tutulan iki mərtəbəli qatarlar sərnişinlərin istifadəsinə veriləcək”.
Bu sözləri açıqlamasında "Azərbaycan Dəmir YollarıAzərbaycan Dəmir Yolları" QSC-nin mətbuat xidmətinin rəhbəri Nadir Əzməmmədov bildirib.
“İşlər yekunlaşmaq üzrədir və artıq 3 platforma tikilib. 4-cü platformada işlər aparılır. Bakı sərnişin stansiyasından ("28 May" metrosu) "Böyükşor" stansiyasına ("Koroğlu" metrosu) qədər dəmir yolunun kənarında çəpərləmə işləri həyata keçirilir. 63 km xəttin 52 km–lik hissəsi təmir olunub. Qalan hissədə isə təmir işləri davam etdirilir”.
Azərbaycanda çalışan əcnəbilərin sayı artdı
11.07.2015
2015-ci ilin iyulun 1-nə, cari ilin əvvəli ilə müqayisədə Dövlət Sosial Müdafiə Fondunun (DSMF) fərdi uçot sistemində qeydiyyata alınan əcnəbilərin sayı 11,03% artıb.
Ölkə.Az-a DSMF-dən verilən məlumata görə, iyun ayı ərzində əlavə olaraq 617 nəfər əcnəbi vətəndaş qeydiyyata alınıb və nəticədə fərdi uçot sistemindəki əcnəbilərin sayı 25 010 nəfərə yüksəlib.
Dövlət sosial sığorta sistemində fərdi şəxsi hesabı olan əcnəbilərin 88,57%-ni (22 152 nəfər) kişilər, 11,43 %-ni (2 858 nəfər) isə qadınlar təşkil edir.
Ümumilikdə 104 ölkənin vətəndaşlarını əhatə edən əcnəbilər arasında ən yüksək say göstəricisi Тürkiyə vətəndaşları üzrə (12 886 nəfər) müşahidə olunur.
Fərdi uçot sistemində qeydiyyata alınan əcnəbilərin sayına görə ikinci yerdə gələn Gürcüstan vətəndaşlarının sayı 2 739 nəfərə, üçüncü yerdə gələn Rusiya Federasiyasının vətəndaşlarının sayı isə 1 446 nəfərə çatıb.
Sonrakı yerlərdə İran İslam Respublikası (934), Çin Xalq Respublikası (811), Hindistan (773), Pakistan İslam Respublikası (507), Böyük Britaniya və Şimali İrlandiya Krallığı (496), Ukrayna (335), Banqladeş Xalq Respublikası (315), Özbəkistan (259), Almaniya Federativ Respublikası (217), ABŞ (216), Filippin Respublikası (206), Türkmənistan Respublikası (197), Qazaxıstan Respublikası (185), Koreya (181), İtaliya Respublikası (174) və s. ölkələr qərarlaşıb.
Öklə.az
