Azərbaycanlılar ərzağa 5 milyard manatdan çox pul xərcləyiblər

2015-ci ilin yanvar-iyun aylarında pərakəndə ticarət subyektlərində istehlakçılara 12 milyard manatlıq və ya 2014-cü ilin müvafiq dövrü ilə müqayisədə 13,4% çox əmtəə satılıb.

Bu barədə Ölkə.Az-a Dövlət Statistika Komitəsindən bildirilib.

Komitənin məlumatına görə, satılmış istehlak mallarının 49,5%-ni (5 milyard 940 milyon manatını) ərzaq məhsulları içkilər və tütün məmulatları, 50,5%-ni (6 milyard 060 milyon manat) qeyri-ərzaq malları təşkil edib və qeyri-ərzaq mallarının xüsusi çəkisi 2014-cü ilin yanvar-iyun ayları ilə müqayisədə 1,3% bəndi artıb.

“Cari ilin birinci yarısında elektron pərakəndə ticarət dövriyyəsinin həcmi əvvəlki ilin eyni dövrünə nisbətən 1,9 dəfə artaraq 6 milyon manat təşkil edib.

Əhali onlayn rejimində sifariş verdiyi istehlak mallarının 93%-ni hüquqi şəxslərin, 7%-ni fərdi sahibkarların elektron ticarət şəbəkəsindən almışdır. Elektron ticarət dövriyyəsinin 96,5%-ni qeyri-ərzaq malları təşkil edib”-deyə, komitə bildirib.

Bundan əlavə, 2015-ci ilin yanvar-iyun aylarında ictimai iaşə xidmətlərinin həcmi əvvəlki ilin eyni dövrü ilə müqayisədə 17,1% artaraq 473,1 milyon manat olub.

Xatırladaq ki, hüquqi şəxslər üzrə iaşə xidmətlərinin həcmi 202,2 milyon manat, bu sahədə fəaliyyət göstərən fərdi sahibkarların subyektləri üzrə isə 270,9 milyon manat təşkil edib.

 Ölkə.Az