Daha 3 kənd ilk dəfə qaz verildi

Bu gün Ağcabədi rayonunun Köyük, Sabirabad rayonunun Qaralı və Balvar kəndlərinə ilk dəfə olaraq təbii qazın verilməsi, həmçinin Göyçay rayonunun Məlikkənd və Şıxbəy kəndlərinə təbii qaz verilişinin bərpa olunması münasibətilə tədbirlər keçirilib. 

Tədbirlərdə rayon İcra hakimiyyətlərinin və “Azəriqaz” İstehsalat Birliyinin təmsilçiləri, ictimaiyyət nümayəndələri iştirak ediblər. Bildirilib ki, Ağcabədi rayonunun 188 abonenti olan Köyük kəndinin qazlaşdırılması üçün birpilləli sistem əsasında ümumi uzunluğu 14 166 metr metal borularla daşıyıcı və məhəllədaxili qaz xətləri çəkilib, sayğac və fərdi tənzimləyicilər quraşdırılıb.

Sabirabad rayonunun Qaralı və Balvar kəndləri də ilk dəfə qazlaşdırılıb. Qaralı kəndinin 163, Balvar kəndinin 93 abonentinin qazlaşdırılması üçün birpilləli sistem əsasında polietilen və metal borularla daşıyıcı və məhəllədaxili qaz xətləri çəkilib, sayğac və fərdi tənzimləyicilər quraşdırılıb.

Göyçay rayonunun Şıxbəy kəndinin 116 abonentinin qazlaşdırılması üçün 1215 metrlik polietilen və 8825 metrlik metal borularla daşıyıcı və məhəllədaxili qaz xətləri çəkilib, 116 ədəd sayğac və fərdi tənzimləyici quraşdırılıb. Rayonun 141 abonenti olan Məlikkənd kəndinin qazlaşdırılması üçün birpilləli sistem əsasında 19 968 metr metal borularla daşıyıcı və məhəllədaxili qaz xətləri çəkilib, sayğac və fərdi tənzimləyicilər quraşdırılıb.

Ölkə.Az