Elariz: \"Son oxuduğum Çingiz Abdullayevin \"Oprokinutaya realnost\" əsəridir\"

"Heç vaxt rəqəm demərəm"

Tanınmış müğənni Elariz Məmmədoğlu Ölkə.Az-ın suallarını cavablandırıb.

- Elariz bəy, yaradıcılığınızda hansı yeniliklər var?

- Yaradıcılığımda hər şey qaydasındadır. Hər zaman olduğu kimi yeni mahnılar üzərində çalışıram. Mahnılar hazırdı, qalır aranjimançılarla işləmək.

- Hansı aranjimançılarla işləyəcəksiniz?

- Əvəz Muradov, Ülvi Qılıc, Elvin Musayev, Neyman Mustafazadə, Nazim Əhməd və Fərid Ağayevlə işləyəcəyik.

- On il öncə sizin ifanızla bağlı tənqidlər, hətta sərt fikirlər var idi. Amma bu yaxınlarda verilişlərin birində muğam ifa etdiyinizin şahidi oldum. Yəqin ki, sonradan muğam dərsləri almısınız...

- Mən musiqi məktəbinin tar və fortepiano siniflərini bitirmişəm, lap əvvəldən də fərdi şəkildə vokal dərslərinə getmişəm. Paralel olaraq Mədəniyyət və İncəsənət Universitetinin rejissorluq fakültəsində təhsil almışam. Bəyənməməyə gəlincə, yeni başlayanda paxıllıq edənlər var idi. Sonra da gördülər ki, mənə bata bilmirlər. Çünki savadlı, peşəkar incəsənət adamına batmaq mümkün deyil. Əvvəl danışırlar, sonra görürlər ki, bünövrə möhkəmdir.

- Mahnılarınızda özünüzün musiqi alətlərində ifa etdiyiniz olub?

- Mən özümü peşəkar musiqiçi yox, peşəkar müğənni sayıram.

- Səhv etmirəmsə, oğlunuz xaricdə təhsil alır...

- Bəli, oğlum Bolqarıstandakı ali məktəblərin birində hüquq fakültəsində təhsil alır.

- Bir müddət öncə oğlunuza elçi gəlinməsi barədə xəbər yayılmışdı. Doğrudan belə bir şey olmuşdu?

- Qız anaları mənim yoldaşıma yaxınlaşıb bildirmişdilər ki, gəlin uşaqları evləndirək. Həyat yoldaşım da cavab vermişdi ki, hələ gəncdir, yaşı azdır.

- Oğlunuzun neçə yaşı var ki?

- 21 yaşındadır.

- Üumiyyətlə, necə düşünürsünüz, övladların evliliklə bağlı seçiminə qarışmaq doğrudur, yoxsa, bu, o qədər də müsbət hal deyil?

- Müdaxilə etmək də olar, etməmək də. Ancaq istənilən halda hər şeyi nəzarətdə saxlamaq lazımdır. İlk növbədə valideyn bəyənməli, fikrini bildirməlidir. O qədər gənclər var ki, kor-koranə ailə qurub, sonra da uğursuz alınıb. Ailə qurmaq zarafat deyil. Gərək ciddi yanaşasan.

- Çoxları bilir ki, sizin aktyor kimi də bacarığınız var. Hətta bir neçə filmlərə çəkilmişdiniz. İndi də belə təkliflər var?

- Əvvəllər belə təkliflər çox olurdu. Mən "Məhəllə" filminə, "Kişiləri qoruyun"a, "Qış nağılı"na çəkilmişəm. "Kişiləri qoruyun" filmində çox tanınmış, peşəkar aktyorlarla çiyin-çiyinə işləmişəm. Bir filmdə iki rol oynayırdım. İndi nəsə belə təkliflər yoxdur. Amma təklif olsa, böyük məmnuniyyətlə çəkilərəm. Çünki bu işə çox böyük həvəsim var.

- Bunu onunla əlaqələndirmək olarmı ki, indi sizi peşəkar müğənni kimi qəbul edirlər və bu kimi dəvətlər azalıb...

- Ola bilər fikirləşirlər ki, əsas işi müğənnilikdir, toylara tez-tez dəvət alır deyə çəkilişə vaxtı olmaz.

- Yeri gəlmişkən, toy qiymətiniz nə qədərdi?

- Azərbaycanda toya hansı qiymət deyilirsə, mütləq belə bir cavab verilir-aşağı yeri var? (gülür) Onsuz da istədiyimiz qiymətdən aşağı gedirik.

- Başlanğıcda nə qədər deyirsiniz?

- Heç vaxt rəqəm demərəm.

- Sizin toy qiymətiniz 3000-3500 deyilirdi..

- Əvvəllər hə, indi bir az yüksəkdir. Rəqəm demək istəmirəm. İnsanlarla razılaşmaq lazımdır da. Hamının imkanı eyni deyil.

- Mütaliə edirsiniz?

-Bəli, mütaliəni həmişə xoşlamışam. Amma etiraf edim ki. axır vaxtlar mütaliəm bir qədər azalıb. Ümumiyyətlə, saytları da oxuyuram. Son oxuduğum isə Çingiz Abdullayevin "Опрокинутая реальность" əsəridir.

- Gənc yazarlardan kimləri oxuyursunuz?

- Gənc yazarlardan oxuduqlarım yoxdur.

- Həm də aktiv sosia şəbəkə istifadəçisisiniz...

- Bəli, "Facebook" və "İnstagram"da varam.

- Sosial şəbəkələrdən gün ərzində neçə saat istifadə edirsiniz?

- Bəzən günlərlə daxil olmuram. Dəvət aldığım verilişlərdən çəkdirdiyim fotoları "İnstagram" a qoyuram. o zaman həmin foto paralel şəkildə "Facebook"da da yayımlanır.

- Boş vaxtlarınızda nə ilə məşğul olursunuz? Hobbiniz nədir?

- Boş vaxtım çox olanda ova getməyi, balıq tutmağı xoşlayıram. Üzgüçülüklə də məşğul oluram. Nadir hallarda da futbol oynayıram.

- Konsert vermək fikriniz varmı?

- Həmişə demişəm ki, konsert vermək fikrim yoxdur.

- Səbəb?

- Azərbaycan vətəndaşları məni super toy müğənnisi kimi tanıyırlar. Bilirlər ki, Elariz Məmmədloğlu bizim toyumuza gələcək və o məclisi yüksək səviyyədə idarə edəcək. Təsəvvür edin ki, dünən oxuduğum toyda 500 nəfər məni görüb və bu gün də deyirəm ki, ay camaat, gəlin mənim konsertimə. Dünən məni toyda görən insan səhəri gün konsertə gəlməz. Konsert müğənnisi olmaq üçün heç olmasa, iki il toylara getməyəsən. Bununla yanaşı iki il ərzində mahnıların radiolarda, efirlərdə yayımlanmalıdır. İki il tamaşçı acmalıdır ki, desin görəsən bu müğənni hardadır. Bəli, onda camaat konsertə axışıb gələr. Müğənni sənətinə yiyələnədə baxır sən necə imic qazanırsan. Konsert müğənnisi, klub müğənnisi, toy müğənnisi, dövlət tədbirləri müğənnisi...

- Belə çıxır ki, siz sırf toy müğənnisisiniz...

- Uzun illərdi toylara gedirəm. Toy idarəçiliyində özümü Azərbaycanda lider sayıram. İnsanların psixlogiyasını duymaq və sair. Hərdən toylarda qonaq kimi oluram. Görürsən ki, adlı-sanlı müğənnidir, yaxşı da oxuyur. Amma onun aparıcılığın görəndə əsəb keçirirəm ki, bu niyə belə səhvlər edir? Artıq estrada üslubunda çalışan toy müğənnisi imicini qazanmışam.

- Efir pul verib çıxdığınız vaxtlar olub?

- On ildir ki, efirlərə pul ödəmirəm. Məni özləri dəvət edirlər. Amma əvvəl olub. Hər bir gənc müğənni efirə çıxıb özünü tanıtmaq üçün müəyyən məsrəflər xərcləməlidir. Əlbəttə 19-20 il əvvəl kliplərimin yayımlanmasi üçün pullar xərcləmişəm.

İntiqam VALEHOĞLU

Ölkə.Az