Rənglər insanın ruhi vəziyyətinə necə təsir edir...

Lids Universitetində aparılan və rəngli işıqlardan istifadə edilən araşdırma nəticəsində fərqli rənglərin nəbz və qan təzyiqinə təsir etdiyi ortaya çıxıb. Qırmızı işıq altında olan subyektlərin ürək döyüntüləri daha sürətli döyünməyə başlayıb, mavi işıq altında olanların ürək döyüntüləri daha yavaş idi. Əslində bu təsirlərin kəşfi uzun illər əvvələ gedib çıxır. Yüz illər əvvəl Tibet və Uzaq Şərqdə başlanan rəng terapiyası rənglərin insan psixologiyasına təsirlərini öyrənirdi. Bu gün artıq rənglərin insan orqanizminə ciddi təsir etdiyi elmi olaraq sübut edilmişdir.

Bəs hansı rəng necə təsir göstərir?

Psixoloq Rəvanə Quliyeva Bizimyol.info xəbər portalına açıqlamasında bildirib ki, rənglər insan sağlamlığına və insan psixologiyasına, insan düşüncələrinə birbaşa təsir edir.

Sarı rəng

Sarı rəngin sıx istifadə edildiyi yerlərdə daha effektiv reaksiya göstərdiyi müəyyən edilib. Sarı diqqətin ifadəsidir. Ona görə də bütün dünyada taksilər sarı rəngdədir. Sarı rənglə siz insanların diqqətini çəkə bilərsiniz.

Qırmızı rəng

Qida və içki sənayesində bir çox aparıcı brendlərin seçimi qırmızıdır. Çünki qırmızı rəng insanların yeyib-içməsinə iştahaçıcı təsir göstərir. Araşdırmalara görə, qırmızı rəngin olduğu yerlərdə insanların ürək döyüntüləri, bədən enerjisi artır. Təqdimatlarda və müsahibələrdə qırmızı rəngdən istifadə edə bilərsiniz, çünki bu, insanlara tez qərarlar qəbul etməyə imkan verir.

Portağal rəngi

Yorğunluğu aradan qaldırır. Narıncı, maddələr mübadiləsini sürətləndirən və yorğunluğu aradan qaldıran rənglər arasındadır. Bu rəngi sevən insanların daha geniş ictimai əlaqələrə malik olduğu, hərəkətli, ekstravert insanlar olduğu deyilir.

Çəhrayı rəng

Araşdırmalara görə, çəhrayı rəng insanları tez sakitləşdirir. Məsələn, həbsxanalarda müəyyən ərazinin çəhrayı rəngə boyanması məhbusların aqressiv davranışını nəzərəçarpacaq dərəcədə azaldıb.

Mavi rəng

Daxili sakitliyi, sülh və əmin-amanlıq hisslərini gücləndirir. Kredit kartları, sığorta və kompüter şirkətlərinin loqoları adətən mavi rəngdə olur. Digər tərəfdən mavi rəngin də sakitləşdirici təsiri olduğu müşahidə edilib. İntiharın tez-tez baş verdiyi qərb ölkələrində intiharları azaltmaq üçün körpü dirəkləri mavi rəngə boyanır. Ərəbistanda mavi rəng, qan sızmasını yavaşladır. Göz muncuğunun mavi olması da bu tezisə əsaslanır.

Ağ rəng

Həkimlər və tibb bacıları ağ paltar geyinirlər, çünki ağ rəng təmizliyi simvollaşdırır. Aparılan araşdırmalarda ağ rəngin insan üzərindəki mənfi emosiyaları aradan qaldırdığı müşahidə olunub. Bağırsaq problemləri və şəkər xəstəliyinə də müalicəvi təsir göstərir.

Yaşıl rəng

Təravətləndirici xüsusiyyəti ilə tanınan yaşıl insanları daha məhsuldar edir. Təbiətin yaşıl rəngi bizi daha dinc hiss etdirir və bədənimizi canlandırır. Ağ rəng sinir sistemi və hüceyrələr üçün də çox faydalıdır. Təzyiqi aşağı salaraq yüksək təzyiqin qarşısını alır.

Bənövşəyi rəng

Bənövşəyi rəng fantaziyamızı gücləndirməklə yanaşı, yuxu problemlərinə də kömək edir. Böyrək xəstəlikləri kimi müxtəlif xəstəliklərə faydalı olan bənövşəyi rəng şəfa rəngi olaraq qəbul edilib.

Qəhvəyi rəng

Qəhvəyi rəng insanın hərəkətlərini sürətləndirən rəngdir. Bir çox restoran və kafelərin stolları qəhvəyi rəngdədir. Bu rəng seçimi təsadüfi deyil, burada məqsəd məkana gələn müştərilərin uzun müddət oturmasının qarşısını almaq və yeni müştərilərə qapı açmaqdır.

Qara rəng

Qara rəng kədəri, yası təmsil edir. Yas mərasimlərində adətən yas əhval-ruhiyyəsi olduğundan qara rəngli paltarlara üstünlük verilir. Həmçinin “qara çələng” müxalifəti təmsil etmək üçün istifadə olunur. Qara rəng, mədəniyyətlərə görə fərqli qəbul edilir. Məsələn, qara rəng bizdə və qərb ölkələrində matəm və kədəri təmsil etdiyi halda, uzaq şərq ölkəsi Yaponiyada xoşbəxtliyi təmsil edir.

“Xəstələrimiz üçün rəng və formalardan ibarət psixoloji testlərdən faydalanırıq. Bəzi xəstəliklərin aşkarlanmasında rənglərin də mühüm təsiri var. Məsələn xəstələrə müəyyən şəkillər çəkmək təklif edilir. Xəstələr depressiya dövründə tünd tutqun rənglərə, mania dövrlərində isə canlı və açıq enerjili rənglərə üstünlük verirlər”,- deyə psixoloq əlavə edib.