Saakaşvili ABŞ-la əməkdaşlıq edəcək

Saakaşvili Dövlət departamenti ilə əməkdaşlıqla bağlı razılıq əldə edib.

Ölkə.Az xəbər verir ki, Ukraynanın Odessa vilayətinin qubernatoru, Gürcüstanın keçmiş prezidenti Mixail Saakaşvili ABŞ dövlət katibinin müavini Bill Braunfildlə ilə əməkdaşlıqla bağlı mümorandum imzalayıb.

"Amerika Birləşmiş Ştatları Odessaya könüllülərə pulsuz hüquqi, inzibati xidmətlərin göstərilməsi, gömrük islahatlarının aparılması sahəsində yardım edəcək", - deyə Saakaşvili "Facebook" səhifəsində yazıb.

Bill Braunfild qeyd edib ki, Vaşinqton Odessa rəhbərliyinin korrupsiya ilə mübarizəsini dəstəkləyir.

Son aylar, xüsusilə Gürcüstanın sabiq prezidenti Mixail Saakaşvilinin Odessa vilayətinin qubernatoru təyin edilməsindən sonra Odessa şəhərində partlayışlar seriyası baş verir. Onların çox hissəsi diversiya aktı kimi dəyərləndirilib. Məsələn, dəmir yolu, rabitə qovşağı, “Qarşılıqlı yardım” və “Azadlıq” partiyalarının ofislərində partlayış törədilib.

Mayın 31-də Saakaşvili Odessa vilayətinin qubernatoru təyin edilib. Rusdilli əhalinin böyük üstünlük təşkil etdiyi bir vilayətdəki bu təyinat Moskva tərəfindən olduqca sərt qarşılanıb.

Rusiyanın nəzarəti altındakı Dnestryanı ərazi ilə sərhəddə yerləşən Odessa vilayətinin Saakaşviliyə verilməsi Moskvanın separatçı regionla bağlı bir sıra planlarını poza bilər. Saakaşvili Dnestryanı ərazidən qaçaqmalçılıqla gətirilən məhsullara qarşı mübarizə aparacağını bəyan edib. Ekspertlərin fikrincə, Rusiyanın nəzarəti altında olan güclər Odessa vilayətində vəziyyəti “tərpətmək” üçün bütün vasitələrə əl atacaqlar.

Rəşid Mustafazadə

Ölkə.Az