Gürcüstan Rusiya ilə münasibətləri bərpa edir?

Gürcüstan parlamentində Rusiya ilə diplomatik münasibətləri bərpa etməyə çağırıblar.

Ölkə.Az xəbər verir ki, "Gürcü koalisiyası" adından Gürcüstan parlamentində təmsil olunan deputat, sovet dövrünün tanınmış aktyoru İoseb (Soso) Caçvliani plenar iclas zamanı Rusiya ilə 2008-ci ilin avqustunda Cənubi Osetiyadakı hərbi münaqişədən sonra pozulmuş diplomatik münasibətləri mümkün qədər tez zamanda bərpa etməyi təklif edib.

Onun fikrincə prezident və parlament vasitəçilər olmadan Rusiyalı həmkarları ilə danışıqlara başlamalıdır.

"Gürcüstan əraziləri işğal olunur. Biz bu prosesin davam etməməsi üçün ehtiyat sərgiləməliyik. Bu problemin iki həll yolu var. Birincisi, müharibə, ikincisi, Rusiya ilə diplomatik münasibətlərin bərpasıdır. Müharibənin bizə nə verdiyini biz gördük və bilirik. Heç kim bizi düşünmür - nə ABŞ, nə Avropa. Hamısı öz maraqlarına uyğun hərəkət edirlər", - deyə deputat vurğulayıb.

O bildirib ki, ABŞ və Avropa İttifaqı Rusiya ilə ümumi dil tapmağı söyləsə də, həmişə hansısa qüvvələr danışıqlara mane olur və osetin, abxazlarla birbaşa danışmağa imkan verilmir.

"Qısaca desək, bizim başımızı aldadırlar. Biz addım atmalı və vasitəçilər olmadan Rusiya ilə danışıqlar aparmağa başlamalıyıq. Başqa yolumuz yoxdur", - deyə Caçvliani bildirib.

Rəşid Mustafazadə

Ölkə.Az