Əhməd Davudoğlu: "İŞİD Türkiyə sərhədinə yaxınlaşmayacaqdı..."

Nazir razılaşmanın təfərrüatlarını açıqlamayıb.

Ölkə.Az xəbər verir ki, Türkiyənin baş naziri İŞİD terror təşkilatın qarşı mübarizə ilə bağlı ABŞ-la razılaşmanın əldə olunduğunu təsdiq edib.

Nazir razılaşmanın təfərrüatlarını açıqlamayıb.

"Artıq hər kəs Türkiyənin çoxdan qaldırdığı mövzuların nə dərəcədə mühüm olduğunu anlayıb. Əgər bizim 3 il əvvəl Suriyanın şimalında haqqında danışdığımız təhlükəsizlik zonası yaradılsaydı, İŞİD Türkiyə sərhədinə yaxınlaşmazdı və biz qaçqınların bu cür axını ilə üzləşməzdik. Biz ABŞ-la bizi narahat edən məsələlərlə bağlı razılaşma əldə etdik, ancaq təfərrüatları elan etməyəcəm", - deyə Davudoğlu bildirib.

Ötən gecə yarısından sonra havaya qalxan Türkiyə reaktivləri Suriya hava sahəsinə girmədən İŞİD-in 2 qərargahı, 1 toplama mərkəzini vurmuşdular.

Xatırladaq ki, dünən Türkiyə - Suriya sərhədində Kilis Elbeyli ərazisində İŞİD terrorçuları Türkiyə əsgərlərinə atəş açmışdı. Atışma zamanı 1 əsgər şəhid olmuş, 4 əsgər isə yaralanmışdı.

İyulun 20-i Türkiyənin Şanlıurfa vilayətinin Suruç rayonunda törədilən terror aktı törədilib. Amara Mədəniyyət Mərkəzinin həyətində partlayıcı qurğu işə salınıb. Nəticədə hadisə yerində 31 nəfər ölmüş, xeyli sayda yaralananlar olmuşdu.

Partlayışı İŞİD üzvü olan 18 yaşlı qızın törətdiyi bildirilmişdi.

Rəşid Mustafazadə

Ölkə.Az