Cahangir Əsgərovun həyat yoldaşının qazancı azalıb

“Ölkə.Az”ın məlumatına görə, cari ilin sentyabrın 30-na bankın cəmi aktivləri 802,134 mln manat təşkil edib. Bu isə ötən ilin eyni dövrü ilə müqayisədə 22,4% çoxdur.

Müştərilərə verilmiş kreditlərin həcmi illik müqayisədə 6,1% azalaraq 477,993 mln manat təşkil edib.

Bankın depozit portfeli 34,4% artaraq 575,773 mln manata çatıb. Bankın cəmi öhdəlikləri isə illik müqayisədə 32,2% artım nümayiş etdirərək cari ilin sentyabrın 30-na 619,417 mln manat təşkil edib.

Mərkəzi Banka borcu artıb

Bankın cəmi öhdəliklərinin tərkibində Mərkəzi Bank və dövlət fondları qarşısında öhdəlikləri 28,845 mln manat olub ki, bu da ötən ilin eyni dövrü ilə müqayisədə 2,8 mln manat və ya 10,6% çoxdur.

“Premium Bank”ın cəmi kapitalı isə illik müqayisədə 2,3% azalaraq 61,126 mln manata enib.

Cari ilin sentyabrın 30-na bankın xalis faiz gəlirləri 15,497 mln manat, xalis qeyri-faiz xərcləri isə 7,774 mln manat təşkil edib. Əməliyyat mənfəəti  7,723 mln manat olan “Premium Bank” mümkün zərərlərin ödənilməsi üçün xüsusi ehtiyatın yaradılmasına 3,712 mln manat ayırıb. 

Mənfəəti azalıb

Mənfəətindən vergi ödəməyən bank 2022-ci ilin üçüncü rübünü 4,012 mln manat xalis mənfəətlə başa vurub. Bu isə 2021-ci ilin üçüncü rübü ilə müqayisədə 2,987 mln manat və ya 42,7% azdır.

Xatırladaq ki, “Premium Bank” ASC-nin səhmlərinin 84,466%-i Zərifə Həmzəyevaya, 15,217%-i "VIP Aviasiya Xidmətləri Şirkəti" MMC-yə, 0,317%-i Elvira Əhmədovaya məxsusdur.

Qeyd edək ki, bankın əsas səhmdarı olan Zərifə Həmzəyeva “Azərbaycan Hava Yolları”(AZAL) QSC-nin prezidenti Cahangir Əsgərovun həyat yoldaşıdır.